Roh mơhriâm mơ’nui măng tĭng, plông hngêi trung Râ má môi Tô Hiệu, bêng Ea Kao, kong pơlê Dak Lak hiăng kơdrâm kơdrĕng, phiu ro mâu tơdroăng châ hlo ‘na khôi túa lĕm tro vâi krâ nah. Mâu vâi o hok tro veăng kơchuâ, pôe, tĕm, klêp... pêi pro mâu tơdroăng ki vâi thái cô hnê. Mâu kơtâ hlá mơ-éa rơbông chôa ‘lâng mơhno a ngâ tơmeăm ki rơneăm a ếo pơtâk, kong kế pơlê, tơdroăng xah hêi tiah hmâ rêm hâi.

Um méa hngêi trá xŏn, prôa, têng nêng, không, klŏng put châ vêh mơhno ƀă kế ki vêh mơjiâng pro, hlối ai tơdroăng ki pơchuât a ngiâ lâp hngêi trung. O H Trâm Niê, hok tro lâm 5E, ai tối tiah kố:

“Á hâk vâ má môi cho tơdroăng STEM dêi mâu lâm hiăng tơbleăng xua mơhno khôi túa lĕm tro hdroâng kuăn ngo Rơđế. Á hâk tơngăm ‘na khôi túa lĕm tro hdroâng kuăn ngo tơná, á pói vâ la ngiâ ah hngêi trung kô tơkŭm po tơ’nôm hên tơdroăng tâ vâ á mơnhông mơdêk khôi túa lĕm tro dêi hdroâng kuăn ngo á’’.

Ki ro má môi cho tơ’noăng Kơ’ngrâu Kơ’lêng Mêa ƀă khu tơdroăng kơ-êng ‘na ki rơkê tiô khôi túa lĕm tro mâu hdroâng kuăn ngo a kong pơlê môi tiah Rơđế, M’Nông. O Đinh Diệp Anh, hok tro lâm 3A tối ăm ‘nâi: Mâu tơdroăng tiâ ăm hlo tơdroăng ki hbrâ ti tăng hlê plĕng dêi hok tro ƀă mâu túa ki rơkê tơtro ‘na hngêi trá xŏn, leh mơdĭng, ‘na chêng koăng…

“Á tâ sôk ro ƀă hâk nâ ‘nâng. Á châ ‘nâi tơ’nôm hên tơdroăng ‘na khôi túa lĕm tro Rơđế môi tiah hngêi trá xŏn, chêng koăng, ếo pơtâk ƀă mâu leh mơdĭng tiô khôi vâi krâ nah djâ ki kơnía trâu hơngế dêi hdroâng mơngế Rơđế’’.

Tơdroăng phiu ro dêi vâi hdrêng xuân troh lâp lu troh a mâu nôu pâ hok tro. Pôa Lê Đình Nam, ai kuăn dế hriâm a hngêi trung Râ má môi Tô Hiệu tối, ƀă troăng hriâm ƀă châ tâ kố mâu vâi muăn hiăng ai mâu tơdroăng pơhlêh tung tuăn mơno păng ‘nâng.

‘’Mâu ngin kuăn hâk tơngăm ƀă hbrâ rơnáu a hâi tơkuăm phiu ro STEM, hâi ki lâi vêh xuân hơ’muăn hâi kố á kuăn châ kơchuâ um, hâi kố á kuăn châ pơtâp xuăng ƀă mâu cô, á kuăn hâk vâ ‘nâng, á kuăn koi ôh tá kâi hlâk xua mê nôu pâ xuân tâ hâk ro ƀă mâu ngin kuăn’’.

Tiô jâ Đoàn Thị Tuyết Yến, Cô pơkuâ Hngêi trung râ má môi Tô Hiệu, hngêi trung ai vâ chê 1.200 ngế hok tro, tung mê ai hên vâi o cho hok tro hdroâng kuăn ngo, mâu tơdroăng kố kô mơjiâng tíu vâ hok tro châ trâm dêi pó, châ mơhriâm, tơbêng ki hlê plĕng ‘nâi mơnê nhuô̆m, rak vế ƀă troh lâp lu mâu ki kơnía dêi khôi túa lĕm tro.

‘’Kố ôh tá xê to tơdroăng pêi pakong hoă đơn mê ối cho môi tíu mâu vâi o châ tâ, châ pêi pro tuăn ngôa rơkê mê ối cho môi tíu mâu vâi o châ tâ, châ tơmiât pêi rơkê ƀă xúa mâu ki rơkê tung tuăn ngôa STEM hiăng châ hriâm vâ vêh mơhno mâu tơmeăm, troăng pêi tiô khôi túa lĕm tro dêi mơngế Rơđế, vâ rak vế ƀă troh lâp lu mâu tơdroăng ki kơnía tiô khôi túa lĕm tro dêi pơlê pơla’’.

A kong pơlê Dak Lak, hên hngêi trung phôh thong hiăng châ tơkŭm po tơdroăng châ tâ, châ hlo tiô khôi túa lĕm tro ƀă hên troăng pêi phá dêi pó. Drêng tơmiât athế pêi rơkê, ti tăng plĕng ƀă tối ăm dêi pó mâu tơdroăng ki rơkê tơtro, mâu vâi o pơtối tơmâng xo túa ki rơkê tơtro ƀă mơjiâng tuăn mơno ki hâk tơngăm, hlê plĕng rak vế mâu  ki kơnía khôi túa lĕm tro pơlê xiâm. Mâu vâi o hok tro mê cho xiâm kối vâ khôi túa lĕm tro vâi krâ nah châ pơtối ối rak vế, lân lĕng rơdâ kân troh lâp lu tung pơlê pơla.