Pái khế apoăng hơnăm 2026, ki tâk dêi kong pơlê Dak Lak dâng 7,5%, tâi tâng kơxô̆ liăn ‘no pêi cheăng dêi tâi tâng pơlê pơla châ lối 12.200 rơtal liăn, xo liăn ngân lối 5.000 rơtal liăn. A rôh hôp, mâu kăn tơkŭm tối nhên ki xiâm u ối, hlối pâ thế hên tơdroăng kal tơdjâk troh luât, luât pơkâ tŏng gum ƀă mâu tơdroăng ối tơvâ tơvân tung pêi pro.

Mâu tơdroăng veăng hnê tối a rôh hôp pâ thế Tíu xiâm rĕng pơkâ kơxô̆ xúa tơnêi; tah mâu tơdroăng tơkêa bro ki u ối; pơkâ nhên tơdroăng xing xoăng liăn ‘no pêi pro tơmeăm khoăng tơnêi têa pơla hơnăm 2026-2030; hlối pê klêi pơkâ ‘na rah xoăng mâu ngế pơkuâ cheăng, mơhno cheăng pêi râ cheăm bêng kong pơlê.

Khu kăn Kuô̆k hô̆i kong pơlê Dak Lak ăm ‘nâi, tơdroăng pâ thế luât, luât tŏng gum ôh tá xê to tah ki xơpá mê ối hriĕn pro ki nếo, pro xiâm mơnhông krá ton. Khu kăn kô tơkŭm tŭm tâi tâng, tối mâu tơdroăng pâ thế ăm troh Kuô̆k hô̆i ƀă Tíu xiâm vâ pê klêi luât, tah tíu ki pá ƀă tơdroăng ‘na luât tơ’lêi hlâu ăm mơnhông tơƀrê tung la ngiâ.