Kơvâ khăm pơlât kong pơlê dế thăm pêi pro mâu troăng mơdât vâ kơdroh kơxô̆ ngế tro tâ nếo xuân môi tiah pơlât châ tơƀrê ăm ngế tro tâ pơreăng. Sap apoăng hơnăm troh nôkố, kong pơlê Dak Lak mơnhên ai 602 ngế tro tâ pơreăng thĕn kŏng chêng rơkong a vâi hdrêng, tâk 10% tâng pơchông ƀă roh kố hơnăm nah, tá hâi ai ngế ki lâi hlâ.

Mâu pơlê ai kơxô̆ mơngế tro tâ hên môi tiah bêng Buôn Ma Thuột, Tuy Hoà, mâu cheăm Sông Hinh, Krông Păč, Liên Sơn Lắk, Buôn Đôn, Čư̆ Mgar... Ƀok thái pơkeăng Hoàng Hải Phú, Kăn pơkuâ Tíu xiâm Mơdât pơreăng kong pơlê Dak Lak tối ăm ‘nâi, kong tô ó pro mơdêk ki xông tâ tú pơreăng thĕn kŏng chêng rơkong. Kơvâ khăm pơlât kong pơlê Dak Lak dế hbrâ pêi pro mâu troăng hbrâ, mơdât, tơdrêng amê thăm tối tơdroăng, pơtâng tối vâ mơdêk hlê plĕng hbrâ mơdât dêi kuăn pơlê.