Xông tơpui mơgêi a roh hôp má 56 dêi Vi ƀan pơkuâ Kuô̆k hô̆i, roh hôp má mơ’nui lui dêi Kuô̆k hô̆i hneăng má 15, pôa Trần Thanh Mẫn, Kăn xiâm hnê ngăn Kuô̆k hô̆i tối nhên, tung plâ hneăng cheăng hiăng hluâ, Vi ƀan pơkuâ Kuô̆k hô̆i hiăng đi đo tơrŭm môi tuăn, mơ-eăm, pôu râng hnoăng cheăng, tơrŭm krá tơniăn ƀă Chin phuh, mâu kơ koan ki tơdjâk vâ pêi pro kơxô̆ tơdroăng cheăng kân, pơkâ kân, tung mê hên hnoăng cheăng hdrối nah tá hâi chói ai, kal khât, pá puât, gum tung tơdroăng ki châ tơƀrê dêi Kuô̆k hô̆i hneăng má XV ƀă tơdroăng mơnhông tơdjuôm dêi tơnêi têa.

Pôa Trần Thanh Mẫn, Kăn xiâm hnê ngăn Kuô̆k hô̆i mơnhên, troh nôkố, tơdroăng hbrâ ăm Hneăng hôp má môi, Kuô̆k hô̆i hneăng má  XVI ki xiâm hiăng châ hbrâ tơdâng tŭm tâi tâng, inhên, pêi tiô troăng hơlâ, troăng prôk kân dêi Đảng, pơkâ dêi tơdroăng nôkố ƀă pơkâ dêi luât.

 Pôa Trần Thanh Mẫn, Kăn xiâm hnê ngăn Kuô̆k hô̆i pơchân, mơhé hneăng má XV hiăng vâ mơgêi, laga hnoăng cheăng dêi Vi ƀan pơkuâ Kuô̆k hô̆i, mâu kơ koan dêi Kuô̆k hô̆i xuân ối hên, ing kố troh drêng Kuô̆k hô̆i rah xo Vi ƀan pơkuâ Kuô̆k hô̆i ƀă kêi đeăng rah xo mâu kơ koan dêi Kuô̆k hô̆i hneăng má XVI, kêi đeăng tơdroăng pơcháu pơla péa hneăng.