Kong pơlê Lâm Đồng klêi kơ’nâi ‘mot tơkŭm ai 5 to cheăm tơkăng kong mê cho Quảng Trực, Tuy Đức, Thuận Hạnh, Thuận An ƀă Dak Wil, tơdjêp ƀă kong têa Kul. Pái to hngêi trung ai tíu kâ koi ối pơtê péa râ châ mơjiâng pro a mâu cheăm Dak Wil, Thuận Hạnh ƀă Tuy Đức ai tâi tâng kơxô̆ liăn bro dâng 675 rơtal liăn. Tiô túa pro râ má III, ƀă mâu hngêi ki xŏn sap ing 1 troh 3 râ. Hâi khế pro cho sap ing khế 3/2026 troh khế 8/2027. Drêng hiăng pro klêi ah, mâu hngêi trung kố kô tơdah dâng 4.150 ngế hok tro sap ing râ má Môi trih râ má péa cho kuăn muăn dêi mâu hdroâng kuăn ngo troh hriâm tâp.

A cheăm Dak Wil, pôa Hồ Văn Mười, Kăn hnê ngăn Vi ƀan kong pơlê Lâm Đồng pơkâ thế ngế ki ‘no liăn pro, khu ki xo pro rak vế tơniăn tơdroăng pro; mâu khu râ, kơvâ cheăng xoăng mâu thái cô hnê, tơdrêng amê kong pơlê chêh tŭm inâi hok tro ki vâ hriâm. Pôa Hồ Văn Mười tối nhên.

“Pơkâ thế ngế ki ‘no liăn pro, mâu khu ki xo pro athế tơrŭm krá tơniăn, chêh pro lơgât, vâ pro tiah lâi tơbleăng bro vâ tơniăn tơdroăng pro ƀă ki krá kâk dêi hngêi trung athế cho tơdroăng ki xiâm. Ƀă Khu ngăn hnê hriâm ƀă hnê mơjiâng tuăn rơkê, pó athế tơmiât nhên tơdroăng ki rak tơniăn tŭm thái cô hnê; ƀă mâu kơbăng tăng ‘nân kế tơmeăm xúa tung hnê ƀă hriâm khŏm ai tŭm; lơ tơdroăng ki pơtâp ivá. Pro tiah lâi kố athế cho tơdroăng ki hnê hriâm tro pơkâ”.

Dak Wil châ tơkŭm sap ing péa to cheăm Ea Pô ƀă Dak Wil (ối tung tơring Čư̆ Jut, kong pơlê Dak Nông ton). Tơdroăng Đảng, Tơnêi têa tơmâng ngăn tŏng gum pro hngêi trăng troăng klông hnê hriâm cho tơdroăng ki gum mơdêk tuăn ngoâ rơkê ăm kuăn pơlê, veăng gum mơnhông cheăng kâ rêh ối pơlê pơla. Malối, ƀă mâu vâi o hok tro, hngêi trung ai tíu kâ koi ối pơtê péa râ cho tơdroăng ki tơmiât, tíu ki mâu vâi o châ hriâm tâp, rêh ối. O Nguyễn Trần Gia Linh, hok tro hriâm lâm5, cho 1 tung 10 ngế hok tro hriâm rơkê tơkâ luâ xơpá dêi cheăm Dak Wil, hâk tơngăm châ tơdah xo liăn hriâm rơkê drêng pơxiâm mơhno mâ Hngêi trung ai tíu kâ koi ối pơtê péa râ cheăm Dak Wil, kong pơlê Lâm Đồng, tối:

“Hâi kố troh akố á hâk tơngăm khât, hâk tơngăm ƀă ro xua châ tơdah xo tơmeăm ƀă liăn hriâm rơkê. Mot hriâm lâm 6. Á kô châ hriâm tâp a hngêi trung ki lĕm, ai tŭm kế tơmeăm. Hngêi trung ai tŭm tíu ôu kâ, ối pơtê, hriâm tâp, cho hngêi trung ki lĕm má môi ƀă á. Á tơhrâ kô mơeăm hriâm tâp, ăm gá lĕm tro vâ chiâng cô yăo, vâ pêi pro châ tiô tơdroăng ki nôu pâ, mâu kăn pơkuâ Đảng, Tơnêi têa hiăng tơmâng ngăn tŏng gum”.

A cheăm Ea Ƀung, kong pơlê Dak Lak hiăng pơxiâm pro Hngêi trung Phôh thong ai tíu kâ koi ối pơtê péa râ râ má môi – râ má péa Ea Ƀung.  Hngêi trung kố ai tâi tâng kơxô̆ liăn pro dâng 250 rơtal liăn sap ing kơxô̆ liăn Tơnêi têa ƀă kong pơlê, mơjiâng pro a ƀăng tơnêi dâng 6 ha a thôn 1. Drêng hiăng pro klêi, hngêi trung kô pêi châ tơdroăng ki rơhêng vâ hriâm dêi lối 1.300 ngế hok tro cho kuăn muăn hdroâng kuăn ngo a kơpong tơkăng kong. Pôa Phạm Thủy Tiên, Kăn hnê ngăn Hô̆i đong cheăm Ea Ƀung ăm ‘nâi, cheăm Ea Ƀung châ mơjiâng tơdroăng ki ‘mot tơkŭm sap ing cheăm Ea Ƀung prếi cheăm Ia Tờ Mốt, cheăm kân rơdâ, kuăn pơlê ối tơprâ tơprŭng, tơdroăng prôk lăm hriâm tâp dêi hok tro malối cho rơnó mê gá ối xơpá. Tơdroăng ‘no liăn cheăng pro hngêi trung ai tíu kâ koi ối pơtê péa râ châ tơngah rôh ki pơhlêh tung mơdêk ki rơkê plĕng tung hnê hriâm kơpong tơkăng kong.

“Troăng hơlâ pơkâ dêi Đảng ƀă Tơnêi têa ‘no liăn pro ăm cheăm Ea Ƀung hngêi trung kố vâi krâ kuăn pơlê phiu ro khât. Ai hngêi trung kố mê má môi kuăn ‘nĕng châ troh hngêi trung hriâm ƀă mâu kơƀăng tăng gá ai tŭm, krá kâk tơniăn ăm tơdroăng prôk lăm, rak ngăn ivá châ chăn mâu vâi tro tâ. Ngin loi tiah kố kuăn muăn a kơpong tơkăng kong kố tung la ngiâ ah kô châ rak ngăn krâu, hnê hriâm tơniăn tâ vâ tơmiât troh la ngiâ kơpong tơkăng kong dêi Tơnêi têa kô krá rơdêi tâ”.

Quảng Ngãi cho môi tung 17 to kong pơlê tơkăng kong a tơnêi ‘lâng tung lâp tơnêi têa tơkŭm mơjiâng pro hngêi trung hriâm. 5 tơdroăng tơkêa bro Hngêi trung Phôh thong ai tíu kâ koi ối pơtê péa râ Râ má môi – Râ má péa châ pơxiâm pro a kơxo kố a mâu cheăm: Bờ Y, Ia Tơi, Ia Đal, Đăk Long và Đăk Plô, kong pơlê Quảng Ngãi, tâi tâng kơxô̆ liăn ‘no pro lối 1.116 rơtal liăn. Rêm to hngêi trung châ pro a ƀăng tơnêi kân dâng 5 ha, kơxô̆ ngế hok tro hriâm sap ing 700 troh 1.600 ngế, tro ƀă rêm to cheăm bêng. Mâu tơdroăng tơkêa châ tơbleăng pro tiô túa hngêi trung hdroâng kuăn ngo ai tíu kâ koi ối pơtê péa râ Râ má môi – Râ má péa, tro ƀă tơdroăng ki xing xoăng mâu hngêi trung hriâm, kơdroh mâu hngêi trung pro tơprâ tơprŭng, mơjiâng mâu hngêi trung hriâm tơkŭm. Jâ Y Ngọc, Phŏ kăn hnê ngăn Vi ƀan kong pơlê Quảng Ngãi ăm ‘nâi, tơdroăng ki mơjiâng pro mâu hngêi trung hriâm kố kô veăng pro mơdêk ki rơkê plĕng tung hnê hriâm a kơpong tơkăng kong tơnêi ‘lâng:

“Drêng hiăng mơjiâng pro klêi ƀă pơxiâm mot hriâm ah, Hngêi trung Phôh thong hdroâng kuăn ngo ai tíu kâ koi, ối pơtê péa râ Râ má môi – Râ má péa cheăm Bờ Y ƀă mâu cheăm rơtế pơxiâm mơjiâng pro hâi kố kô chiâng môi tung mâu hngêi trung hnê hriâm ki lĕm kâk má môi, tíu ki păn roăng mâu tơdroăng tơchĕng tơmiât, pơxiâm mâu tơdroăng púi rơhêng vâ hriâm tâp dêi mâu rơxông hơnăm ối nếo kơpong tíu tơkăng kong, veăng gum tơdroăng hnê mâu ngế pêi cheăng ăm tơdroăng mơnhông dêi cheăm bêng, kơpong ƀă kong pơlê”.