Jâ Nguyễn Thị Thanh, Phŏ kăn xiâm hnê ngăn Kuô̆k hô̆i ăm ‘nâi: rôh tâ phĭu pôk kăn Kuô̆k hô̆i hneăng XVI ƀă kăn Hô̆i đong hnê ngăn kuăn pơlê rêm râ pơla hơnăm 2026-2031 hiăng po tung tơdroăng ki phiu niu, tơniăn lĕm, tơdâng tơ’mô, tro luât, kơdĭng ƀă hiăng ƀlêi trâng, cho hâi leh kân dêi tơnêi têa, Hâi leh kân dêi tâi tâng kuăn pơlê. Kố cho tơdroăng kal kí ki kal ƀă hâi khế hbrâ rơnáu nhên ƀă hiâm mơno pôu râng, veăng tơdjuôm ivá môi hiâm mơno dêi khu pơkuâ cheăng kal kí sap ing Tơnêi têa troh kong pơlê.

Ki tơniăn lĕm dêi rôh tâ phĭu cho mơhno ki lĕm tro ‘na ivá rơdêi dêi khô̆i tơrŭm tâi tâng hdroâng mơngế, ‘na ivá cheăng pơkuâ dêi Đảng ƀă tơƀrê tơdroăng cheăng dêi khu pơkuâ cheăng kal kí; tơdrêng amê hlối tối rơdêi tơdroăng ki loi khât dêi Kuăn pơlê a Đảng, Tơnêi têa”.

‘Na klêi kơ’nâi rôh tâ phĭu pôk kăn Kuô̆k hô̆i, lâp tơnêi têa hiăng pôk tŭm 500 ngế kăn sap ing 863 ngế to briât vâ pro kăn. Tung mê, 214 ngế kăn xua Tơnêi têa tơbleăng inâi, châ hên kơxô̆ ngế pôk. Troăng pơkâ rah xo pơtối hlo tơniăn tiô troăng kơdroh mâu kăn ki pêi hên tơdroăng cheăng, mơdêk kơxô̆ ngế kăn ki pơkuâ cheăng. Kơxô̆ ngế kăn Kuô̆k hô̆i tiô tối hdrối pêi cheăng ki châ kuăn pơlê pôk hên má môi sap nah troh nôkố, châ 40%. Malối, Kuô̆k hô̆i hneăng 16 ƀă hên tơdroăng ki nếo tung tơdroăng pơkâ rah xo mâu kăn cheăng: rôh apoăng ai kăn teăng mâ dêi hdroâng kuăn ngo Ơ Đu châ pôk; kơxô̆ ngế kăn kơdrâi châ dâng 30%, pơtối rak a kơlo ki hên. Kố xuân cho rôh apoăng kơxô̆ ngế kăn xua Tơnêi têa tơbleăng ăm kong pơlê vâ to pro kăn châ kuăn pơlê pôk chía hên. Pôa Lê Ngọc Chung, a bêng Phước Thắng (Bà Rịa - Vũng Tàu ton), Pơlê kong kân Hồ Chí Minh hâk vâ xua mâu kăn Kuô̆k hô̆i ki châ kuăn pơlê pôk kố gá hên, hlối tơ’mô ai hên mâu kăn ối châ kuăn pơlê vêh pôk. Ai tuăn ngo hriâm rơkê, hên mâu kăn cho kuăn pơlê hdroâng kuăn ngo.

“Cho môi ngế kuăn pơlê á hlo tiah kố, tung inâi mâu kăn Kuô̆k hô̆i nếo tơbleăng ai tŭm mâu ngế ki kal, tá tung khu pơkuâ cheăng kal kí, cho văn ngê̆ sih, khu mơdró kâ, khu lêng kring vế. Kố cho môi tơdroăng ki ro, mơhno tơdroăng ki hên ƀă troăng ki ngăn tung mâu ngế ki veăng cheăng tung Kuô̆k hô̆i. Ƀă malối, hnoăng cho cho mâu kuăn pơlê ‘na môi rôh ki nếo dêi tơnêi têa, á rơhêng vâ mâu kăn ki châ kuăn pơlê pôk mê mơhno ivá khŏm mơeăm, hnoăng pôu râng, tuăn ngoâ rơkê, kơhnâ. Tơxâng cho ngế kăn châ kuăn pơlê pôk vâ veăng gum ivá tung mâu troăng hơlâ djâ tơnêi têa krá rơdêi mot tung chal ki nếo”.

Hvái ngăn ‘na ki rơkê, troăng pơkâ rah xo mâu kăn ki châ kuăn pôk cheăng tung Kuô̆k hô̆i hneăng 16, jâ Tạ Thị Yên, Phŏ pơkuâ Vi ƀan Cheăng khu kăn, Phŏ pơkuâ ƀơrô cheăng Hô̆i đong tâ phĭu tơnêi têa tối nhên:

“ ‘Na tuăn mơno rơkê dêi mâu kăn ki châ pôk pơtối châ mơdêk tiô túa ki nhên. Troăng hơlâ pơkâ inâi mâu kăn mê xuân hiăng châ rak tơniăn tro cho ngế teăng mâ xuân môi tiah pro tơdâng pơla mâu ngế cheăng ƀă hlối ai mâu tơdroăng pêi pro pơhlêh ki kal rế tâk kơxô̆ ngế mâu kăn ki ai tuăn ngoâ rơkê ‘na tơdroăng cheăng xuân môi tiah túa pêi cheăng ki khât tơniăn tro cho ngế kăn kơdrâi mê nếo kăn hơnăm ối nếo hdroâng kuăn ngo”.

Hô̆i đong Tâ phĭu tơnêi têa mơnhên tối, rôh tâ phĭu hiăng ƀlêi trâng tơniăn lĕm, rak tơniăn tơdrăng khât, pêi pro tro luât ƀă tơniăn. Tơdroăng pơkuâ, hnê mơhno kơtăng dêi Đảng cho tơdroăng ki kal vâ tơniăn ƀlêi chiâng rôh tâ phĭu. Tơdroăng cheăng mâu ngế pêi cheăng châ hbrâ rơnáu tơdrăng, pơtó pơla rêm râ. Tơdrêng amê hlối, tơtrŏng hnê hriâm tơdroăng cheăng, thăm mơnhông séa ngăn, vâ teăm hlo tŏng gum mâu tơdroăng xơpá tơvâ tung pơla tơkŭm pêi pro. Pôa Nguyễn Hữu Đông, Pơkuâ Vi ƀan Cheăng khu kăn, Ngế cheăng tung Hô̆i đong tâ phĭu tơnêi têa tối rơdêi:

“Klêi kơ’nâi tâ phĭu hiăng pôk tm 500 ngế kăn cheăng tung Kuô̆k hô̆i, 2.552 ngế kăn cheăng tung Hô̆i đong hnê ngăn râ kong pơlê ƀă lối 72.437 ngế kăn cheăng tung Hô̆i đong hnê ngăn râ cheăm, hiăng tối rơdêi cheăng ‘na mâu ngế pêi cheăng châ hbrâ rơnáu nhên, tơdrăng, tro luât pơkâ. Kơxô̆ ngế kuăn pơlê kân má môi, kơxô̆ kuăn pơlê lăm tâ phĭu châ hên má môi sap nah troh nôkố hiăng mơhno nhên ki hlê plĕng ‘na cheăng kal kí ƀă hnoăng pôu râng dêi kuăn pơlê; tơdroăng cheăng pơkuâ, hnê mơhno dêi râ đảng, kăn pơkuâ rêm râ châ tơbleăng pêi kơtăng, tơdâng; cheăng tối tơbleăng châ tơkŭm po lâp lu, tơƀrê”.

Ƀă tơdroăng ki ƀlêi chiâng dêi rôh tâ phĭu, pơtối tối rơdêi hiâm mơno, tơdroăng loi ƀă tơdroăng môi tuăn khât dêi Kuăn pơlê ƀă Đảng, Tơnêi têa, pro chiâng krá rơdêi ăm Kuô̆k hô̆i hneăng XVI pêi pro tro hnoăng cheăng tung hneăng ki nếo.