A 2 cheăm kố kô châ mơ’no liăn mơjiâng pro 27 tơmeăm. Kăn pơkuâ hnê ngăn cheăng Đảng kong pơlê Dak Lak tối nhên kố cho hnoăng cheăng ki thâ, pơkâ mơjiâng pro hên tơmeăm, tŭm on tơhrik, têa, kơpong tíu ối, hơpiâp on, hngêi mơdrah, tơmeăm tŏng gum mơngế hliăng tiâ pá puât; tơdrêng amê tơniăn pro krá, hbrâ ví têa lân lu, hbrâ ví mơhot, ai troăng vâ châ hluăn, kơmăi tơbleăng rĕng, mơhnhôk châ tơƀrê mơngế cheăng vâ rĕng djâ xúa tung tơdroăng cheăng; Pơkâ mâu kong pơlê thâ pêi pro, tơniăn pơxiâm pro hdrối hâi lơ 30/6 ƀă kêi đeăng hdrối hâi lơ 15/9 hơnăm kố.

Tiô Khu mơjiâng pro kế tơmeăm khoăng kong pơlê Dak Lak, tiô tối hdrối mơ’no 295 hngêi hôp tơdjuôm pơlê pơla hlối tơdjêp hbrâ, ví têa kân lân lu a 34 cheăm, bêng peăng mâ hâi Lo ƀă tâi tâng kơxô̆ liăn dâng 460 rơtal liăn.