Cô hnê chư Lê Hiếu Vy, Ngế pơkuâ Đoân Droh rơtăm Hngêi trung râ má pái phôh thong Ngô Gia Tự (bêng Phú Yên) cho ngế teăng mâ dêi kong pơlê Dak Lak châ vâi rah xo inâi lăm tơdah xo Pri Lý Tự Trọng hơnăm 2026. Nâ đi đo hbrâ pơ’lêh nếo túa pêi cheăng vâ tơ’mot, tơkŭm hên ngế đoân viên, hok tro. Tung rôh kong mêi têa lân lu mơ’nui hơnăm 2025, ôh tá xâu mơhé rơ-iô pá puât, nâ Vy hiăng krếo tơkŭm 30 ngế đoân viên lăm troh a mâu kơpong ki klâ krê vâ tŏng gum tơmeăm ăm kuăn pơlê ki dế kơklêa. Tuăn nâ đi đo vâ mơ-eăm, pleăng hnoăng tơná, nâ ôh tá xê to gum mâu kuăn pơlê mơ-eăm tơkâ luâ xơpá mê ối tơbleăng tơdroăng pêi pro ăm mâu hok tro, hnê thế ai tuăn kơdôu mơ-eăm, ‘nâi hnoăng cheăng dêi tơná ƀă hlối tối ăm mâu ki ê ‘nâi.

Ƀă cô Vy hlối hnê rơtế ƀă droh rơtăm cho túa ki mơdâ hdrê cho hnê ‘na cheăng pêi ƀă hnê thế ai hiăm mơno lĕm, tuăn rơkê pleăng tơná dêi rêm ngế hok tro ƀă mâu hơnăm ối nếo.

“Drêng rơtế ƀă pin pêi cheăng tơdjuôm ƀă hok tro. Hlo pin rơtế pêi mê pin mơhnhôk mâu hok tro rơhêng vâ pleăng hnoăng tơná, pêi a hdrối, pin mơhnhôk ôh tá xê pin khŏm thế pêi, hnê thế pêi. Hok tro kô chêh inâi, ƀă la lâi xuân chêh inâi tơkâ luâ kơlo. Rêm tơdroăng cheăng kô cho môi tơdroăng mơnúa pêi tơxâng chôu pâ ƀă mâu vâi o”.

Kơnôm hriăn plĕng, pêi ai pơxúa, pơla hơnăm 2020 - 2025, Đoân Droh rơtăm Hngêi trung râ má pái phôh thong Ngô Gia Tự cho môi tung mâu tíu pêi cheăng ki tơƀrê dêi kong pơlê Dak Lak. Krê hơnăm 2025, Hngêi trung Ngô Gia Tự ai 8 ngế hok tro châ mot Đảng.

Tơdrêng ƀă hngêi trung hriâm, tơdroăng cheăng đoân dế châ tơbleăng pêi a Dak Lak ƀă ki kal cho rơtế ƀă tơdroăng kal vâ khât a cheăm bêng. A bêng Buôn Ma Thuột, klêi pơxiâm pêi cheăng mâu kăn kong pơlê 2 râ, đoân viên droh rơtăm châ xoăng hnoăng cheăng pêi nhên, veăng kơjo kum kuăn pơlê châ pêi cheăng ƀă kơmăi tiô troăng hyôh, hnê túa cheăng ƀă kơxô̆ a tơrêm pơlê. Tiô nâ Lê Thị Anh Trâm, Kăn hnê ngăn Đoân bêng Buôn Ma Thuột, droh rơtăm pôi tá pro teăng ăm, mê thế hnê ăm kuăn pơlê pêi ti kô ti mê, hbrâ xêh ‘na tơdroăng pêi cheăng ƀă kơxô̆.  

“Tung pơla hdrối kố nah mê Đoân droh rơtăm bêng xuân hiăng mơjiâng khu lăm hnê Tíu xiâm pêi cheăng pro hlá mơ-éa mê cho tơbleăng rơdâ lâp lu troh 90 tôh kơphô̆ ƀă pơlê. Ôh tá pơtê to dâng a cheăng pêi veăng kum mê ối hnê troh tơdroăng rơtế veăng pêi ƀă kuăn pơlê vâ hnê kuăn pơlê cheăng pro hlá mơ-éa ƀă kơxô̆ vâ vâi hbrâ rơnáu xêh, chiâng tiê pro tung măng”.

Tung pơla pêi pro túa pêi cheăng mâu kăn kong pơlê 2 râ, pơkâ thế ƀă mâu khu tơrŭm cheăng Đoân thế rah tro tơdroăng cheăng, pơcháu tro mơngế, pơtối rak hnoăng cheăng pêi dêi droh rơtăm ing cheăm bêng. Drêng xo pêi hnoăng cheăng nhên, tơdroăng mê ôh tá pá, mê thế rơtế ƀă mâu tơdroăng cheăng ki pơxúa khât.

Bú tung pơla iâ tê, mâu droh rơtăm ki pleăng hnoăng tơná a Dak Lak hiăng kơjo kum rơpâu ngế kuăn pơlê pêi pro hlá mơ-éa ƀă kơxô̆. Kố cho mâu ki mơhno djâ troăng tíu tơdjêp ki kal pơla mâu kăn kơxô̆ ƀă kuăn pơlê, malối a kơpong hơngế hơngo, ngoh Lương Minh Tùng, Kăn hnê ngăn Đoân Droh rơtăm kong pơlê Dak Lak tối, vâ ai tiô pơkâ ki nếo nôkố, khu tơrŭm cheăng Đoân kal thế pơtối hơ’lêh nếo troăng hơlâ pêi cheăng, tơmâng pêi nhên khât.

“Tơrŭm cheăng đoân thế ai ki pơ’lêh nhên. Kăn ƀô̆ Đoân a cheăm bêng thế rơkê ƀeăn tung pêi tơdroăng kal kí a cheăm bêng. Hơnăm kố kăn ƀô̆ đoân râ cheăm rah mâu tíu xiâm, tơdroăng ki kal,  achê ƀă tơdroăng ki ai khât a pơlê cheăm, malối klêi tơ’mot tơdjuôm, vâ ing mê xo pêi mâu tơdroăng cheăng ki pá, mâu tơdroăng cheăng thế kal ai hnoăng dêi droh rơtăm tung mâu kăn kong pơlê 2 râ’’.

Pôa Y Giang Gry Niê Knơng, Phŏ kăn pơkuâ hnê ngăn Tỉnh ủi, Kăn hnê ngăn Vi ƀan Măt trâ̆n tơnêi têa Việt Nam kong pơlê Dak Lak tối, tung pơla nôkố, khu tơrŭm cheăng Đoân kal pơ’lêh nếo rơdêi nếo troăng pêi cheăng ăm tơtro ƀă nôkố tiô troăng mơnhông nếo. Malối, đoân viên droh rơtăm thế cho mâu ngế djâ troăng ahdrối pơ’lêh hriăn plĕng ki nếo ƀă pơ’lêh kơxô̆, mâu kơvâ cheăng ai pơxúa ƀă mơnhông dêi kong pơlê, tơnêi têa.

Ƀă ivá rơkê ƀĕng dêi tuăn ngôa rơkê ƀă cheăng ‘na kŏng ngê̆ nếo, droh rơtăm cho mâu ngế ki rĕng mơhno djâ tuăn tơmiât hriĕn plĕng ki nếo, pêi cheăng kơxô̆, veăng mơnhông cheăng kâ-pơlê pơla ƀă mơhno hnoăng cheăng dêi mơngế ki pêi cheăng tung la ngiâ dêi tơnêi têa.

“Pơ’lêh kơxô̆ ‘nâi nhên cho tơdroăng ki tơƀrê ƀă droh rơtăm thế xo pêi apoăng tung tơdroăng pêi pro mê. Ôh ti xê to ahdrối xúa kŏng ngê̆, mê thế cho mâu ki xiâm kơjo kum kuăn pơlê pêi cheăng tơdrêng tung troăng hyôh măng, ‘mâi hơ’lêh tơdroăng cheăng pêi. Tơdroăng cheăng dêi Đoân thế djâ kŏng ngê̆ kơxô̆ troh a pơlê, hnê kuăn pơlê chiâng pêi cheăng ƀă kơxô̆, mơ-eăm tah ki kơtăn hơngế pơla pơlê kong kân ƀă thôn pơlê, kơpong hơngế hngo”.

Tung pơla pơkâ kal mơnhông rế tơbrê, kong pơlê Dak Lak ‘nâi nhên droh rơtăm cho môi tung mâu ngế ki xiâm kal khât vâ pêi tơdroăng púi vâ mơnhông, hlối cho loăng rêk hdró ki mơnhông krá tơniăn. Xua mê, tơdroăng tơbâ hnoăng cheăng pêi, hnoăng cheăng púi vâ pleăng tơná dêi rơxông nếo kô pơtối cho tơdroăng ki kal, veăng mơjiâng Dak Lak mơnhông rĕng tơƀrê hlối krá tơniăn.