A leh mơhnhôk, Khu hnê mơhno tơnêi têa ‘na ti tăng, tơkŭm ƀă mơnhên inâi kơxêng kiâ mô đô̆i châ pơkâ tung 500 hâi măng, mơ-eăm ti tăng, tơkŭm môi tíu châ 7.000 kơxêng kiâ mô đô̆i ƀă mơnhên inâi châ dâng 18.000 kơxêng kiâ mô đô̆i ki hlâ tung tơplâ xâ nah.

Tung pơla pêi pro Tơdroăng cheăng sap ing hâi lơ 15/3/2026 troh hâi lơ 27/7/2027, xông tơpui a leh mơhnhôk pêi pro, jâ Phạm Thị Thanh Trà, Phŏ Ngế pro xiâm hnê ngăn tơnêi têa pơkâ thế mâu khu xiâm, kơvâ cheăng, kong pơlê thế tơkŭm pêi pro kơtăng, tŭm ƀă ai hnoăng cheăng, tung mê, tơkŭm a mâu hnoăng cheăng ki xiâm, tung mê kal mơnhên inhên kố cho hnoăng cheăng kal kí ki kal; kal khât troăng pơkâ pêi séa ngăn, mơnhên ngăn, ngăn tơdroăng pêi pro krá tơniăn, păng ‘nâng; pơhlêh nếo troăng pêi tiô troăng xúa ó rơdêi khoa hok kŏng ngê̆; mơnhông hnoăng dêi mâu khu cheăng ƀă mơhnhôk tơdroăng ki veăng dêi lâp pơlê pơla; kal thăm mơdêk tơrŭm lâp plâi tơnêi, ki má lối cho mâu kong têa pú hmâ Lếo ƀă kong têa Kul.