Klêi kơ’nâi tơmot chiâng môi kơ koan pêi cheăng tơnêi têa, kong pơlê Lâm Đồng dế vêh pêi pro tơdroăng pơkâ mâu kơpong hngêi kơmăi kơmok, tơmiât inhên tah lôi mâu pơkâ 6 kơpong kơmăi kơmok; pơtroh 14 kơpong kơmăi kơmok ai tung pơla laga pá mơhnhôk mơ’no liăn cheăng troh mơnhên troăng prôk mơnhông kơ’nâi hơnăm 2030.

Tơdrêng amê, tơ’nôm nếo 15 kơpong hngêi kơmăi kơmok tung pơkâ hneăng hơnăm 2026 – 2030. Tiah mê, tung hneăng hơnăm 2026 – 2030, kong pơlê Lâm Đồng pơkâ pêi 62 kơpong hngêi kơmăi kơmok, po kân lối 2.300 hectar. Jâ Cao Thị Thanh, Phŏ Kăn pơkuâ Khu pơkuâ Kơmăi kơmok tê mơdró kong pơlê Lâm Đồng tối ăm ‘nâi, troăng tơmiât pêi cho pơhlêh pơkâ pêi sap ing kơpong ki pá mơhnhôk mơ’no liăn hceăng troh kơpong ki tơ’lêi vâ mơhnhôk mơ’no liăn cheăng.

Xua mê, mơnhên troăng prôk la ngiâ pơhlêh troăng mơnhông mâu kơpong kơmăi kơmok tung kong pơlê Lâm Đồng kô tơkŭm ki hên a kơpong achê têa kơxĭ, ối tung kong pơlê Bình Thuận ton.