Nôkố kong pơlê Dak Lak ai lối 252 rơpâu ngế mung liăn ing Hngêi rak liăn tŏng gum rêh ối pơlê pơla, ƀă tâi tâng kơxô̆ liăn mung lối 14.500 rơtal liăn. Mâu ngế châ mung mê, cho: rơpŏng kơtiê, vâ chê kơtiê, rơpŏng châ tơnêi têa gum, hdroâng kuăn ngo, hok tro, sinh viên; mâu rơpŏng kal châ tŏng gum pêi cheăng kâ, tê mơdró, pro hngêi ối, chiâ têa klôh.

Mung liăn tŏng gum hiăng tŏng gum ai xếo tơdroăng mung liăn xo liah hên a kơpong hngế hngo; gum hên pơlê cheăm pêi pro klêi tơdroăng pơkâ thôn pơlê nếo, ing mê rak vế gâk kring tơniăn Pơkâ 78 troh nôkố hiăng mơhno mâu tơdroăng pêi pro ối ‘ro môi tiah: kơlo liăn mung iâ; ai mâu tơdroăng ki ‘nâ ôh tá tơtro ƀă tơdroăng ki kal vâ khât; kơxô̆ liăn mung vâ lăm pêi cheăng a kong têa ối iâ; liăn liah dêi mâu tơdroăng ăm mung ối hên ƀă hên tơdroăng ki ê.

A rôh pêi cheăng, mâu rơkong tơpui tối pâ thế dêi kong pơlê tâ tá tơdroăng ki mơdêk kơlo liăn mung ăm hok tro – sinh viên tâk troh 100 rơtuh tung môi rơpŏng; kơlo mung pêi cheăng kâ, tê mơdró troh 200 rơtuh liăn ƀă mâu rơpŏng kơtiê; pro mơdon hâi khế mung ƀă mâu ngế ki pêi pro klêi rôh kroăng phâk sap ing 5 troh 10 hơnăm; tơdrêng amê hlối po rơdâ mâu ngế ki châ mung cho ngế ki lăm pêi cheăng a kong têa ê.

Khu ki lăm ngăn hiăng tơmâng xo mâu rơkong tơpui tối dêi kong pơlê Dak Lak, ƀă ăm ‘nâi kô rĕng hriăn ngăn vâ ai troăng hơlâ tŏng gum tơtro ƀă troăng hơlâ mâu khu ki mung dêi lâp tơnêi têa. Tơdrêng amê, hlối hriăn ngăn troăng hơlâ tŏng gum krê xúa ăm kong pơlê Dak Lak, môi tiah tơdroăng ki xúa kơxô̆ liăn dêi kong pơlê vâ ăm mung tiô troăng hơlâ tŏng gum.