A Vương, cho cheăm kơpong kong ngo, 1 tung 3 tíu tơkŭm po tơdroăng khăm pơlât, xing xoăng pơkeăng xo xo, gum kuăn pơlê ki kơtiê xahpá. Kơtăn kố to lâi khế, kơpong kong ngo kố xua  kong mêi râ, têa kân kân lu ôh tá khoh prôk lăm pôu dêi pó, tơdroăng rêh ối ôh tá tơniăn. Sap ing kơxo má, dâng hrĭng ngế vâi krâ kuăn pơlê ki kơtiê hdrông mơngế Cơ Tu hiăng troh a tíu pêi cheăng dêi Vi ƀan cheăm vâ tơdah xo kế tơmeăm ƀă châ khăm tơdroăng châi tamo, tơdah xo pơkeăng xo xo.

Mâu vâi krâ, jâ pôa, vâi hdrêng, vâi kơdrâi pơrá châ mâu ƀok thái pơkeăng dêi hngêi pơkeăng kân Pơlê kong kân Đà Nẵng troh khăm ngăn mâu tơdroăng châi tamo, trối: mơheăm kơtâu têi, khăm ngăn tung châ, troăng klêa, troăng i hiâm, kơxêng, khăm pơlât mâ ƀă hên hĕng mâu tơdroăng tamo ki ê. Kuăn pơlê châ hnê mơhno, xing xoăng pơkeăng tê kơtê vâ pơlât, hbrâ mơdât pơreăng vâ rak ngăn ăm ivá mo dâi. Nâ A Lăng Thị Hiềm, ối a thôn Ta Lang, cheăm A Vương tâ hơtô tung i hiâm mơno, tối tiah kố:

“Ngin mơnê hên păng ‘nâng khu ƀok thái pơkeăng hiăng troh hbru kế tơmeăm ăm kuăn pơlê ngin akố. Châ khu ƀok thái pơkeăng troh khăm pơlât, kuăn pơlê akố phiu ro, hơniâp khât, phiu niu tơdah Têt ki hơniâp ro’’.

Veăng pêi hnoăng cheăng khăm pơlât akố ai lối 100 ngế thái pơkeăng, ƀok thái pơkeăng ki rơkê, Kăn pơkuâ, Phŏ Kăn pơkuâ mâu hngêi pơkeăng ki kân a Pơlê kong kân Đà Nẵng; Kăn pơkuâ, Phŏ mâu Kơvâ pơlât ối tung Hngêi pơkeăng kân Đà Nẵng, Hngêi pơkeăng Pơlât Ŭm tung châ Đà Nẵng, Hngêi pơkeăng Mơhum kuăn ngá, Hngêi pơkeăng pơlât Mâ Đà Nẵng, Hngêi pơkeăng pơlât êi xôu, Hngêi pơkeăng Kuân Y 17, Hngêi pơkeăng C, Khu ƀok thái pơkeăng hơnăm ối nếo Pơlê kong kân Đà Nẵng ƀă mâu Tíu xiâm khăm pơlât a kơpong.

Veăng pêi pro ‘na cheăng ki kố, mâu hngêi pơkeăng kân a Đà Nẵng hiăng pơtroh mâu thái pơkeăng, ƀok thái pơkeăng ki rơkê, djâ hên mâu túa kơmăi kơmok, tơmeăm khăm ki rơkê chal nếo, môi tiah kơmăi khăm ngăn tung châ, khăm ngăn plâi nuih, kơmăi xup X.Quang chiâng djâ lâp lu utâi utá… Ki rơhêng vâ tối, Khu  kăn pơkuâ ngăn lêng Kuân khu 5 ƀă mâu hngêi pơkeăng hiăng veăng pêi pro tơdroăng kố hiăng tŏng gum lối 1.000 khu pơkeăng, 300 mâ nhĕng, vĕn ta ăm mơngế hiăng krâ ƀă tơnông mâ nhĕng vâ xing xoăng ăm kuăn pơlê troh khăm pơlât. Pôa Phạm Minh Huy, Ƀok thái pơkeăng, Phŏ Kăn pơkuâ Kơvâ Ngoại chấn thương Chỉnh hình Hngêi pơkeăng kân Đà Nẵng tâ hơtô tung hiâm mơno drêng veăng pêi pro hnoăng cheăng ki kal kố.

‘’VOV kơpong peăng Tơdế tơnêi têa ƀă Khu ƀok thái pơkeăng hơnăm ối nếo Pơlê kong kân Đà Nẵng ƀă tâi tâng mâu hngêi pơkeăng tung lâp pơlê kong kân hiăng tơkŭm po tơdroăng “Diâp kơxu tơmeăm Têt Bính Ngọ hơnăm 2026 – Tơdjêp tơrŭm tung Đà Nẵng pro lân rơdâ tuăn pâ’’ cho kơnía kân. Ngin kô đi đo rơtế ƀă hên khu râ pơtối pêi pro mâu hnoăng cheăng khăm pơlât lân rơdâ troh lâp lu’’.

A tíu pêi cheăng kố, Khu tơkŭm po hiăng diâp 1.300 kơxu tơmeăm, rêm kơxu kơnâ 600 rơpâu liăn ăm kuăn pơlê ki pá puât a mâu cheăm tơkăng kong trối cheăm Hùng Sơn, A Vương, mâu kŏng nhân ai tơdroăng rêh ối pá puât dế pêi cheăng a Kơpong Kŏng ngê̆ Chal nếo ƀă mâu kơpong hngêi kơmăi dêi Đà Nẵng. Bu tung môi hâi, Tơdroăng pêi pro kố hiăng khăm trâu rơdâ ki xúa kŏng ngê̆ chal nếo, xing xoăng pơkeăng xo xo gum 600 ngế kuăn pơlê kơtiê a cheăm A Vương; 500 kŏng nhân ai tơdroăng rêh ối pá puât a Kơpong kŏng ngê̆ chal nếo ƀă mâu kơpong kơmăi kơmok Đà Nẵng; rah khăm pơlât plâi nuih ăm 500 ngế vâi hdrêng mâm non, Hngêi trung phôh thong râ má môi Ba Lế, cheăm A Vương, pơlê kong kân Đà Nẵng. Tâi tâng ki kơnâ dêi pơkeăng ƀă kế tơmeăm ki hbru ăm kuăn pơlê tung hnoăng pêi pro kố châ dâng 1 rơtal 500 rơtuh liăn.