Hâi mơ’nui măng tĭng, a cheăm Ea Kly, kong pơlê Dak Lak, tơdroăng ki hbrâ rơnáu ăm rôh tâ phĭu hlo hơniâp ro khât. Sap ing kơxo má tá troh kơxê măng, kăn ƀô̆ mâu thôn hiăng klâ xoăng dêi pó hên tôh ki kŭn, vâ lăm troh a mâu pơlê cheăm, kơpong kuăn pơlê ối, “lăm troh rêm hơlâ troăng, tơgôm rêm toăng hngêi” vâ xoăng phĭu ƀă hnê tối, mơhnhôk kuăn pơlê lăm tâ phĭu pôk kăn Kuô̆k hô̆i hneăng XVI ƀă kăn Hô̆i đong hnê ngăn kuăn pơlê rêm râ pơla hơnăm 2026- 2031. A thôn Chợ, cheăm hiăng mơjiâng 7 tôh troh tơdrêng a rêm rơpŏmh hngêi kuăn pơlê xoăng phĭu. Ngoh Nông Ngọc Thắng, ngế ki ối tung Tôh gâk kring thôn Chợ, ăm ‘nâi, thôn ai vâ chê 1.400 ngế kuăn pơlê. Troh nôkố phĭu pôk hiăng xoăng troh a kŏng kuăn pơlê.

“Kố cho á xoăng phĭu ăm vâi krâ nhŏng o, lăm troh amê (tíu tâ phĭu) mê ai hên ngế hnê ăm vâi krâ kuăn pơlê ‘na túa ki kơchuâ inâi lơ ôh tá kơchuâ inâi ăm gá tơtro. Troh a hngêi ki lâi cho vâi krâ nhŏng o tơrŭm ƀă hngêi ki mê xua kố cho hnoăng pơxúa dêi vâi”.

Xoăng phĭu pôk troh rêm rơpŏng kuăn pơlê châ tơbleăng pêi tơdâng tơ’mô, rĕng a tâi tâng mâu cheăm, bêng a kong pơlê Dak Lak. Ôh ti xê tơ’lêi hlâu cho xoăng ăm phĭu troh kŏng kuăn pơlê, kăn ƀô̆ ối tơrŭm hnê tối, tơpui tối leăng, hnê kuăn pơlê tăng ‘nâi tơdroăng ‘na ngế ki tơbriât to pro kăn, ‘nâi nhên hnoăng ƀă tơdroăng cheăng pôu râng dêi tơná hdrối hâi tâ phĭu. Ing mê, pro ăm tơdroăng hnê tối rôh tâ phĭu tơdjâk trâu rơdâ , veăng gum mơdêk hlê plĕng ƀă hiâm mơno pôu râng dêi kuăn pơlê ƀă hâi leh kân dêi tơnêi têa. Pôa Nguyễn Doãn Kiều, tôh kơphô̆ 6A, bêng Thành Nhất, kong pơlê Dak Lak tối:

“Ngin hiăng châ hnê tối a tôh kơphô̆, mê mâu túa hnê tối tung um tơvi, rơ’jiu, loâ, thăm nếo cho Vi ƀan Măt trâ̆n Tơnêi têa hiăng hnê tối troh tíu ối ƀă tâ phiu ro khât. Ƀă á hiăng hbrâ rơnáu lăm pêi pro hnoăng cheăng ƀă hlối mơhnhôk rêm ngế kuăn pơlê veăng lăm tâ phĭu tung rôh ki kố ah”.

A Dak Lak, pakĭng hnê tối tơdrêng, hên cheăm bêng po rơdâ túa hnê tối tơdroăng kal vâ kuăn pơlê tơ’lêi tâng, tơ’lêi hlê tâ. Pakĭng hôp kuăn pơlê, pơchuât tung loâ, pano, mâu cheăm bêng ối ứng dụng kong ngê̆ kơxô̆, măng xah hô̆i, video clip vâ tối tơbleăng ‘na ngế ki to briât to pro kăn. Túa pêi kố gum ăm kuăn pơlê rĕng, ‘nâi nhên tơdroăng, tơchĕng nhên rah xo ngế ki tơxâng. Pôa Đặng Gia Duẩn, Kăn pơkuâ ngăn ủi, Kăn hnê ngăn Hô̆i đong bêng Ea Kao, kong pơlê Dak Lak ăm ‘nâi:

“Ngin tơkŭm po hên mâu túa hnê tối ki phá dêi rơpó, sap ing hnê tối tiah hmâ troh hnê ki rơkê plĕng tiô chal nôkố tro ƀă pơhlêh kơxô̆. Ngin djâ troăng ahdrối tung ứng dụng kong ngê̆ kơxô̆ tung cheăng hnê tối ‘na lĭ lich trích ngang dêi mâu kăn ngế ki lo tơbriât pro kăn”.

Ƀă tơdroăng cheăng hnê tối a mâu pơlê cheăm, mâu túa ki hnê tối tung um tơvi, rơ’jiu xuân châ tơbleăng pêi tơdâng tơ’mô tung lâp kong pơlê. Hên troăng prôk, kơpong kuăn pơlê ối a Dak Lak hiăng rơ’eăng to pa-nô, ƀăng rôn, áp phích ki lĕm ăm rôh tâ phĭu, pro chiâng tơdroăng tơkôm troh hâi leh kân dêi tâi tâng kuăn pơlê. Tiô pôa Trần Hồng Tiến, Kăn pơkuâ Khu ngăn Túa lĕm tro, Tơ’noăng ivá ƀă Ôm hyô kong pơlê Dak Lak, mâu tơmeăm ki hnê tối châ tơbleăng tơdâng tơ’mô sap ing kong pơlê troh pơlê cheăm, veăng ăm tơdroăng hnê tối rôh tâ phĭu troh achê tâ ƀă kuăn pơlê.

“Ngin hiăng chêh pro mâu tơmeăm hnê tối môi tiah mâu video clip, mê mâu mơéa hnê tối troh a cheăm pơlê, mê nếo hlối tơrŭm ƀă mâu ƀâng tung măng xah hô̆i vâ thăm mơnhông cheăng hnê tối hdrối, tung ƀă klêi kơ’nâi rôh tâ phĭu”.

Lối 2,4 rơtuh ngế kuăn pơlê a kong pơlê Dak Lak dế tơkôm hâi tâ phĭu. Tơdroăng ki veăng pêi pro dêi khu xiâm pơkuâ cheăng kal kí rơtế ƀă hên túa hnê tối rơkê hiăng veăng pro ăm tơdroăng ki hnê tối rôh tâ phĭu troh achê kuăn pơlê, pro chiâng tơdroăng loi ƀă hbrâ rơnáu veăng tung hâi leh kân dêi tâi tâng kuăn pơlê.