A rôh leh, mâu kăn hiăng pleăng reăng, têk nhang tơbâ ƀă mơdoh iâ môi péa phut hmái hơtĭng mơhno tuăn pâ nhoăm kơ 64 ngế kăn ƀô, mâu lêng Tuk Kuăn pơlê Việt Nam hiăng hlâ rôh tơplâ kring vế hnoăng pơkuâ têa kơxĭ, chuăn ki tĭng dêi Tơnêi têa.

Klêi pro leh tơbâ, khu kăn hiăng têk nhang a kơpong mâu tơnâp ki kơđu ƀă tơnêi tê, lăm ngăn kơpong tơbleăng tơmeăm khoăng ƀă tíu mơđah tơbleăng a kơpong tơbâ, tíu ‘măn rak mâu hlá mơ-éa chêh ing nah, tơmeăm rơtế ƀă tơdroăng rêh ối ƀă tơplâ hlâ rêh dêi mâu lêng tung rôh tơplâ kring vế chuăn Gạc Ma, rơlốu  Trường Sa, kong pơlê Khánh Hòa a hơnăm 1988.

Kơpong tơbâ chêh inâi mâi lêng hlâ a Gạc Ma “cho tíu tơplâ ó” ai pơxúa kal kân khât tung hnê mơhno tơdroăng lĕm tro ton nah, veăng tơbâ tơbêng hiâm mơno pâ nhoăm tơnêi têa, vâ rêm ngế hlê  ƀă kring vế hnoăng pơkuâ têa kơxĭ, rơlố ăm khu rơxông nếo.