A bêng Phan Thiết, bêng tíu xiâm kơpong têa kơxĭ dêi kong pơlê Lâm Đồng, plâ mâu hâi hiăng hluâ, tơdroăng ‘na tâ phĭu đi đo kơdrâm phiu ro a mâu kơpong kuăn pơlê rêh ối. Mơngế ki tâ phĭu thăm ti tăng plĕng inâi, tơdroăng chêh ‘na tơdroăng hriâm tâp, pêi cheăng ƀă tơdroăng pêi pro dêi mâu ngế ki tơbriât to pro kăn vâ rah xo mâu kăn teăng mâ ki tơxâng. Ƀă kuăn pơlê akố, lăm tâ phĭu ôh tá xê to hnoăng ki pơxúa mê ối cho hnoăng cheăng pơcháu dêi kuăn pơlê ƀă tơnêi têa. Pôa Trần Hữu Trung, Tôh kuăn pơlê kơphô̆ 14, bêng Phan Thiết, tối:

‘’Má môi cho tung rơpŏng kuăn pơlê vâi krâ nhŏng o tung kơtâu, kơphô̆ hâi Tĭng xing xoăng tơdroăng cheăng klêi mê lăm tâ phĭu tŭm. Akố tiô khôi vâi krâ sap ing nah troh nôkố a chôu kơhâi dế cho tâ phĭu hiăng klêi tâi tâng. Kuăn pơlê, mơngế ki tâ phĭu pói vâ cho tâi tâng mâu ngế ki ai hiâm mơno lĕm, tuăn ngôa rơkê vâ pơkuâ Kuăn pơlê ƀă ki rơhêng vâ tối cho hneăng cheăng kố pơhlêh nếo tơmiât pêi rơkê xua mê mơngế ki tâ phĭu sôk ro ‘nâng’’.

Tơdroăng hbrâ ăm hâi tâ phĭu xuân dế troh lâp lu troh mâu kơpong kong ngo dêi kong pơlê Lâm Đồng. A thôn Long Lanh, cheăm Lạc Dương, tíu rêh ối dêi kuăn pơlê hdroâng kuăn ngo K’Ho, mâu tơdroăng ‘na tâ phĭu châ kuăn pơlê tơmâng, tơpui tơno tung mâu roh hôp pơlê pơla ƀă tung rêm rơpŏng. Nâ Dà Ju K’Tim, tối ăm ‘nâi:

‘’Drêng trâm mâ pú hmâ xuân cho tơpui tơno tung rơpŏng hngêi mê á xuân hmâ tơpui tơno ƀă tối tơ’nôm mâu tơdroăng xiâm ki tơdjâk troh tâ phĭu. ‘Na hâi chôu tâ phĭu, mâu ngế ki tơbriât to pro kăn roh kố ƀă tíu tâ phĭu. Hneăng roh kố cho môi hneăng ki tơviah má môi, á xuân pói tơngah á ƀă mâu ngế ki tâ phĭu ki ê kô rah xo châ mâu ngế ki ai hiâm mơno lĕm, ai tuăn ngôa rơkê ƀă ai pôu râng dêi hnoăng cheăng, ai tơdroăng ki pơhlêh nếo vâ mơjiâng Tơnêi têa dêi kuăn pơlê, cho pêi ăm kuăn pơlê ƀă xua kuăn pơlê’’.

Ing kơpong têa kơxĭ troh kong ngo dêi kong pơlê Lâm Đồng, tâi tâng pơrá dế hâk vâ chêh troh hâi tâ phĭu rah xo kăn teăng mâ Kuô̆k hô̆i hneăng má XVI ƀă kăn teăng mâ Hô̆i đong kuăn pơlê mâu râ hneăng hơnăm 2026 - 2031 ƀă tơdroăng loi tơngah ƀă pói vâ kân kĭn. Hâi lơ 15/3 lối 2,7 rơtuh ngế tâ phĭu dêi kong pơlê Lâm Đồng ƀă rêm kơtâ phĭu châ tơmiât inhên, rak inhên cho tơdroăng vâ pơtroh loi tơngah dêi Kuăn pơlê a mâu ngế ki teăng mâ tơxâng, mâu ngế ai hiâm mơno lĕm, ai tuăn ngôa rơkê, tá hiâm mơno pêi cheăng vâ gum ăm Tơnêi têa ƀă Kuăn pơlê.