Hngêi hôp kân kơxô̆ 2 dêi Hngêi pơkeăng kân kơpong Tây Nguyên mâu hâi ki kố eăng bâ lĕm hlá cơ khêi. Kố cho kơpong tâ phĭu kơxô̆ 44 ối tung Vi ƀan tâ phĭu bêng Buôn Ma Thuột, kong pơlê Dak Lak. Ƀok thái pơkeăng Nguyễn Ngọc Thịnh, Phŏ Kăn pơkuâ hngêi pơkeăng, Tôh trương Tôh tâ phĭu a Hngêi pơkeăng, tối ăm ‘nâi, troh nôkố, rêm tơdroăng pêi cheăng ăm roh tâ phĭu hiăng hbrâ rơnáu.

‘’Tâi tâng mơngế cheăng tung hngêi pơkeăng ngin hiăng tơdah châ theh vâ lăm tâ phĭu. A hngêi pơkeăng ai môi tơdroăng ki phá tơ-ê cho ngế tamo châi ƀă nhŏng o ngăn mơngế tamo châi ối a hngêi pơkeăng, xua mê Tôh tâ phĭu dêi hngêi pơkeăng xing xoăng 2 ngế pêi hnoăng cheăng pơcháu pơkuâ kơthung tâ phĭu troh lâp lu, djâ troh rêm kơbong mơngế tamo châi vâ mâu ngế ki tâ phĭu cho mơngế tamo châi ôh tá chiâng prôk lăm kô chiâng prôk lăm tâ phĭu a xoăng koi pât’’.

Điêu dưỡng Nguyễn Thị Cẩm Vân, tối ăm ‘nâi: kố cho roh má pái nâ veăng tâ phĭu a hngêi pơkeăng. Mơhé tơdroăng cheăng rak ngăn mơngế tamo châi tơvâ tơvân ‘nâng, laga hbrâ chôu pơtê, nâ hmâ troh tíu tĕm inâi mơngế ki tâ phĭu ƀă tơdroăng hriâm pêi cheăng dêi mâu ngế ki tơbriât to pro kăn vâ pơchuât ngăn tơdroăng. Nâ pói vâ tơdroăng rah xo dêi mâu ngế rơkê, ai hiâm mơno lĕm vâ pơtroh mâu tơdroăng tơmiât, pói vâ dêi tơná.

‘’Á pói vâ rah xo châ mâu kăn teăng mâ ki ai hiâm mơno lĕm, kơhnâ khât, cho kông tơdjêp pơla kơvâ khăm pơlât ƀă Đảng, Tơnêi têa. Mâu kăn ki châ rah xo mê kô teăng mâ ăm tơdroăng khŏm mơ-eăm, pói vâ dêi ngin; tơdrêng amê rơkong tơpui dêi ngin ing mâu kăn ki mê kô troh ƀă Đảng, Tơnêi têa vâ tơmâng hên tâ, mơ’no liăn hngêi trăng, troăng klông kế tơmeăm ăm hngêi pơkeăng lĕm tro tâ vâ gum tung tơdroăng rak ngăn ivá kuăn pơlê kong pơlê Dak Lak lĕm tro tâ’’.

Hngêi pơkeăng kân kơpong Tây Nguyên ai 1.200 xoăng koi pơlât ƀă lối 1.250 kăn ƀô̆, ƀok thái pơkeăng, mơngế pêi cheăng. Tung roh tâ phĭu kơxo ah, mơngế ki tâ phĭu cho kăn ƀô̆, nhân viên, mơngế pêi cheăng rơtế rơpâu ngế tamo châi ƀă nhŏng o mơngế tamo châi dế ối tung hngêi pơkeăng ngăn mơngế tamo châi, pơlât a hngêi pơkeăng kô veăng tâ phĭu a tíu tâ phĭu kơxô̆ 44, ối tung Vi ƀan tâ phĭu bêng Buôn Ma Thuột, kong pơlê Dak Lak. Ƀă tơdroăng ki hbrâ inhên, roh tâ phĭu a tíu tâ phĭu ‘’tơviah má môi’’ kố kô po châ tơƀrê, tơniăn, tro tiô pơkâ.