Tối mơgêi rôh hôp, pôa Tô Lâm khĕn kơdeăn ƀă tối vâ môi tuăn ƀă mâu tơdroăng veăng hnê tối, tơtro ƀă tơdroăng ki ai khât dêi mâu kăn veăng hôp ƀă mâu tơdroăng hiăng châ pêi pro tung hơnăm kô hía nah, ki tơƀrê cho pê klêi hên tơdroăng pơcháu, pro pơxúa khât ing mê kum mâu khu xiâm kơvâ cheăng, kong pơlê cheăm hlê plĕng tâ hiăng hlo pơ’lêh nhên, chôa lâng rơtế xúa khoa hok kong ngê̆ tung pêi hnoăng cheăng dêi tơrêm khu xiâm kơvâ cheăng ki tơdjâk troh; hiăng hlo mâu tíu ki ‘nâ túa pêi cheăng tơrŭm ƀă dêi rơpó pơka khu mơdró ƀă mâu tíu xiâm tơƀrê nhên; malối tơdroăng ki tơxâng tơmâng xo cho hơnăm hdrối kô nah ai veăng pêi kơhnâ khât dêi khu mơdró ƀă hên khu cheăng khoa hok tung tơnêi têa ƀă kong têa ê.

Tối nhên 7 tơdroăng cheăng ki mâu khu xiâm, kơvâ cheăng ƀă tá khu cheăng Kal kí thế pêi pro tung la ngiâ, Kăn xiâm pơkuâ hnê ngăn Đảng pơkâ thế, thâ pêi tơdrêng mâu troăng hơlâ tah 7 tíu ki xiâm pro pá hiăng châ chêh mơhno tung hlá mơ-éa tơbleăng, hlối mơdêk xúa ư̆ng dụng mâu khoa hok, kong ngê̆ rơdêi tâ tung tơdroăng mơdêk ivá pêi cheăng pêi lo tơmeăm, mơdêk pêi cheăng rơkê tơbrê, pơxúa tung pơla rak ngăn dêi mâu khu mơdró.