Pơtối mê, Khu pơkuâ Đoân Droh rơtăm kong pơlê Lâm Đồng hiăng mơjiâng tơdroăng chêh tin, ƀai pơtâng tối ‘na tâ phĭu tung troăng hyôh măng; po mâu chuyên đê, chuyên mục vâ tơbleăng tơdroăng ki xiâm, teăm tơdrêng troh đoân viên, droh rơtăm ƀă kuăn pơlê. Rơtế amê, Khu pơkuâ Đoân Droh rơtăm Lâm Đồng mơjiâng 535 khu pleăng hnoăng cheăng ƀă lối 6.700 đoân viên, droh rơtăm ai mâ a tâi tâng mâu cheăm bêng tung kong pơlê vâ veăng tŏng gum tơdroăng tâ phĭu.

Tơdroăng pêi cheăng dêi rơxông ối nếo kong pơlê Lâm Đồng gum troh lâp lu hiâm mơno pôu râng hnoăng cheăng châ pơcháu dêi mơngế ki tâ phĭu, tơdrêng amê tŏng gum mâu cheăm bêng tơkŭm po hâi tâ phĭu kuăn pơlê pơkuâ dêi tơdroăng cheăng, tro tơdroăng pơkâ ƀă tơniăn lĕm.