Kơpong kơphô̆ 6, bêng Quy Nhơn nôkố ai 67 toăng tuk tơnăng ká xi xŏng ƀă lối 200 ngế kuăn pơlê tơnăng ká xi xŏng đi đo tơnăng ton hâi a têa kơxĭ. Mâu hâi achê kố, drêng tuk ká vêh klêi kơ’nâi roh lăm a têa kơxĭ, jâ Mau Thị Gái, Kăn pơkuâ Tơdroăng pêi cheăng Mât trâ̆n kơpong kơphô̆ 6 ai mâ a kơpong tot plong tuk vâ pơtâng tối ‘na hâi tâ phĭu.

Akố, jâ xing xoăng theh, tối ‘na hâi khế tâ phĭu, tơdrêng amê mơhnhôk kuăn pơlê hbrâ chôu vâ pêi pro hnoăng dêi tơná ƀă hnoăng cheăng pơcháu ăm kơ mơngế ki tâ phĭu. Ƀă mâu tuk ká ối dế tơnăng ká xi xŏng tung dế têa kơxĭ, jâ mơhnhôk nhŏng o tung hngêi pơkuâ plong tuk tơpui ing mâu phôn, loa vâ tối tơbleăng, pơtâng kuăn pơlê tơnăng ká xi xŏng rĕng djâ dêi tuk vêh a tơnêi ‘lâng vâ veăng tâ phĭu. Jâ Mai Thị Gái tối ăm ‘nâi:

“Rêm hâi, tôh tâ phĭu pơtroh mơngế troh a hngêi mâu rơpŏng pơtâng tối, mơhnhôk vâi krâ kuăn pơlê mơdoh chôu lăm tâ phĭu. Mâu kăn ki tơbriât tâ phĭu a bêng Quy Nhơn xuân châ tơbleăng vâ kuăn pơlê ‘nâi tơdroăng, rah xo mâu ngế ki tơxâng rah xo pro kăn Kuô̆k hô̆i’’.

Châ pơtâng tối tơdrêng, hên kuăn pơlê tơnăng ká xi xŏng hlê plĕng nhên ki kơnâ kơtâ phĭu ƀă hbrâ veăng hâi tâ phĭu. Pôa Nguyễn Văn Tuấn, Kuăn pơlê tơnăng ká xi xŏng, ối a kơphô̆ 6, bêng Quy Nhơn tối ăm ‘nâi, nhŏng o tung tuk hiăng hbrâ mơdoh chôu tơdroăng cheăng vâ teăng troh a tơnêi ‘lâng tung hâi vâ tâ phĭu.

‘’Hbrâ troh hâi tâ phĭu lơ 15/3, á xuân pêi cheăng tiô pơkâ, kô pơtê môi hâi vâ kơxo má lăm tâ phĭu a bêng’’.

Pakĭng mâu tơdroăng pơtâng tối mơhno a mâ môi tiah paneau, áp-phích a kơpong tâ phĭu ƀă mâu troăng ki xiâm, khu râ kăn pơkuâ ối mơdêk pơtâng tối tơdrêng a kơpong ki plong tuk pơtê tot, gum kuăn pơlê hlê plĕng tâ tơdroăng ai xúa ƀă ki kal dêi roh tâ phĭu. Kơnôm mê, hên kuăn pơlê tơnăng ká xi xŏng hbrâ chôu vêh a tơnêi ‘lâng  vâ veăng tâ phĭu. Pôa Nguyễn Đức Toàn, Kăn hnê ngăn Vi ƀan Tâ phĭu bêng Quy Nhơn tối ăm ‘nâi, bêñg hiăng pêi pro hên troăng vâ tơniăn kuăn pơlê tơnăng ká xi xŏng, mâ kuăn pơlê ki tâ phĭu đi đo lăm tơnăng ká xi xŏng a têa kơxĭ ton hâi xuân pêi pro tŭm hnoăng tâ phĭu dêi tơná.

“Ki hên kuăn pơlê tơnăng ká xi xŏng pơrá ai nhŏng o a bêng. Mâu kơpong kơphô̆ ƀă tíu tâ phĭu hiăng pêi pro troh rêm rơpŏng, xing xoăng theh mơngế ki lăm tâ phĭu, ƀă ki rơhêng vâ tối cho xing xoăng hlá cơ ăm kuăn pơlê tơnăng ká xi xŏng vâ hâk ro hâi tâ phĭu. Mâu rơpŏng xuân hiăng tối teăm tơdrêng vâ kuăn pơlê tơnăng ká xi xŏng ‘nâi, ‘nâi chôu vâ vêh a tơnêi ‘lâng hâi 15/3 pêi pro hnoăng tâ phĭu rah xo kăn tiô pơkâ’’.

Tiô pôa Bùi Duy Ninh, Phŏ Kăn hnê ngăn Vi ƀan kuăn pơlê bêng Quy Nhơn Đông, pêi cheăng pơtâng tối mơhnhôk kuăn pơlê tơnăng ká xi xŏng veăng tâ phĭu châ bêng tơmâng khât. Bêng hiăng hnê mơhno mâu kơpong kơphô̆, tôh tâ phĭu tơrŭm ƀă mâu tôh khu tơnăng ká xi xŏng ‘nâi hâi lăm têa kơxĭ tơnăng ká xi xŏng vâ tơdroăng tơtro. Tơdrêng amê, thăm pơtâng tối ing loa rơ’jíu cheăm, mâu roh hôp pơlê pơla ƀă tơdrêng a kơno ká, kơpong tot plong tuk.

“Kuăn pơlê tơnăng ká xi xŏng tung bêng cho hên ‘nâng tung kơpong kuăn pơlê rêh ối tê mơdró cheăng kâ ƀă đi đo lăm têa kơxĭ tơnăng ká xi xŏng ton hâi xua mê tơdroăng pơtâng tối ƀă mơhnhôk kuăn pơlê veăng tâ phĭu châ bêng tơmâng hên khât. Tơdrêng amê, mơhnhôk kuăn pơlê mơdoh hâi lăm têa kơxĭ tơtro vâ veăng lăm tâ phĭu tŭm mơngế’’.

Ƀă tơdroăng ki veăng dêi tá khu cheăng kal kí, kuăn pơlê tơnăng ká xi xŏng a mâu cheăm bêng kĭng têa kơxĭ dêi kong pơlê Gia Lai hiăng ‘nâi nhên hnoăng pơkuâ ƀă hnoăng cheăng châ pơcháu dêi tơná, hbrâ mơdoh chôu veăng hâi tơkŭm sôk ro tâi tâng kuăn pơlê. Kơtâ phĭu dêi mâu ngế ki tâ phĭu đi đo rêh ối lăm tơnăng ká xi xŏng kô gum kal khât tung tơdroăng châ tơƀrê dêi roh tâ phĭu la ngiâ.