A thôn Bàu Trúc, cheăm Ninh Phước, tíu ki ai lối 95% pơ’leăng mâ mơngế cho kuăn ngo Chăm, cheăng hnê tối tâ phĭu châ tơbleăng troh rêm rơpŏng kuăn pơlê. Ngế ki châ kuăn pơlê loi tung thôn môi tiah pôa Đàng Chí Quyết kơhnâ troh rêm rơpŏng hngêi kuăn pơlê vâ mơhnhôk vâi krâ kuăn pơlê lăm tâ phĭu. Pôa xuân hnê vâi krâ nhŏng o tăng ‘nâi inâi, túa rêh ối, tơdroăng pêi pro dêi ngế ki tơbriât to pro kăn ing mâu tíu tối tơbleăng hdrối vâ tâ phĭu. Pôa Đàng Chí Quyết ăm ‘nâi:

“Cho kuăn pơlê dêi cheăm mê á hlê khôi túa tơlá dêi vâi krâ kuăn pơlê. Xua mê á lăm troh a rêm hơlâ troăng, tơgôu rêm toăng hngêi vâ mơhnhôk, malối cho rôh trâm mâu ngế pơkuâ rơpŏng hngêi, mâu ƀok xối jâ chĭng ƀă ngế pơkuâ hdroâng hdrê. Ing mê vâi pơtối hnê tối ăm nhŏng o rơpŏng hngêi vâi, kuăn cháo ‘na hâi chôu, tíu xuân môi tiah túa ki tâ phĭu, vâ vâi krâ kuăn pơlê hlê plĕng tung tơdroăng rah xo mâu ngế kăn ki ai hiâm mơno rơkê, lĕm, teăng ăm rơkong tơpui tối pâ thế ƀă tơdroăng púi rơhêng vâ dêi kuăn pơlê”.

Rơtế ƀă kuăn pơlê hdroâng kuăn ngo Chăm, hneăng ki kố mâu cheăm bêng peăng kong ngo dêi Khánh Hòa xuân mơdêk rơdêi hnê tối, mơhnhôk kuăn pơlê lăm tâ phĭu. A cheăm Trung Khánh Vĩnh, hên túa hnê tối tơkŭm po tơtro ƀă kơpong ki ai hên kơdrâm kuăn pơlê hdroâng kuăn ngo. Vi ƀan tâ phĭu cheăm tơrŭm ƀă krâ pơlê, ngế pơkuâ pơlê, ngế pơkuâ thôn vâ tơpui tối leăng Luât tâ phiưu ƀă nâl Raglai, hlối hnê kuăn pơlê tăng ‘nâi inâi chêh dêi mâu ngế vâ to pro kăn ƀă tơdroăng pêi pro dêi mâu vâi. Hên tơdroăng pơtih xuân châ mơ’no tối vâ mâu tôh tâ phĭu hriâm pât tơdroăng ki tơpui tối tung tơdroăng ki ai khât. Jâ Cao Thị Ngọc Thanh, Kăn hnê ngăn Vi ƀan cheăm Trung Khánh Vĩnh ăm ‘nâi:

“Ngin tơkŭm po trâm mâ tơpui tơno, hơdruê xoăng, tŏn chêng koăng vâ tơ’mot vâi krâ kuăn pơlê troh veăng, ing mê tŏng gum hnê tối ‘na ki pơxúa dêi rôh tâ phĭu. Ing mâu tơdroăng pêi pro kố, kuăn pơlê hlê tiah kố tâ phĭu ôh ti xê to hnoăng cheăng dêi kuăn pơlê mê ối cho hâi leh kân dêi tâi tâng kuăn pơlê”.

Mâu túa pêi ki rơkê, plĕng a Khánh Hòa hiăng gum kuăn pơlê tí tăng tơdroăng pêi pro, tơmiât nhên rah xo mâu kăn ki kơhnâ rơkê ‘na túa rêh ối lĕm ƀă ivá pêi cheăng. Tơdroăng tơmiât troh hâi tâ phĭu tơdjâk sap ing kong ngo troh kơphô̆ kĭng têa kơxĭ dêi Khánh Hòa, hbrâ rơnáu ăm hâi leh kân dêi tâi tâng kuăn pơlê.