Kơmăng lơ 12/3, a Tíu pêi cheăng Chin phuh, tơkŭm po Leh tơbleăng pơkâ dêi Ngế pro xiâm hnê ngăn Chin phuh ‘na tơdroăng rah xo kăn ƀô̆ pêi cheăng.

Diâp tơdroăng pơkâ rah xo ƀă diâp reăng, pôa Phạm Minh Chính, Ngế pro xiâm hnê ngăn tơnêi têa rơkâu pôa Trần Hồng Thái châ Đảng, Tơnêi têa loi tơngah pơcháu hnoăng cheăng ngế ối a ko Viê̆n Hàn lâm Khoa hok kŏng ngê̆ Việt Nam – Tíu xiâm hriăn plĕng khoa hok kŏng ngê̆ hên kơvâ, hên tơdroăng cheăng má môi, rak hnoăng cheăng pơcháu ‘’trăng xiâm’’ tung tơdroăng cheăng khoa hok tơnêi têa.

Ngế pro xiâm hnê ngăn tơnêi têa mơnhên tơdroăng Đảng, Tơnêi têa pơcháu tơdah hnoăng cheăng Kăn xiâm hnê ngăn Viê̆n Hàn lâm Khoa hok kŏng ngê̆ Việt Nam mơhno tơdroăng loi tơngah ƀă tơdroăng pói tơngah kân dêi Đảng, Tơnêi têa ƀă pôa Trần Hồng Thái xuân môi tiah ƀă tơdroăng mơnhông dêi Viê̆n Hàn lâm Khoa hok Kŏng ngê̆ Việt Nam tung chal nếo.

Xông tơpui tơdah hnoăng cheăng, pôa Trần Hồng Thái tơkêa kô tơrŭm môi tuăn, môi tuăn sap apoăng troh tá tui lui, pêi châ hnoăng cheăng Ngế pro xiâm hnê ngăn Chin phuh pơcháu, chôa ‘lâng mơdêk hnoăng cheăng, hnoăng cheăng châ pơcháu dêi Viê̆n Hàn lâm Khoa hok Kŏng ngê̆ Việt Nam; pơtối pêi pro mâu Tơdroăng pơkâ dêi Khu xiâm kal kí, Tơdroăng pơkâ tơdroăng cheăng dêi Chin phuh, ing mê, veăng gum hên tung pơkâ tơtêk 2 kơxô̆ dêi tơnêi têa tung la ngiâ.