A cheăm Ia Lốp, cheăm tơkăng kong peăng mâ hâi Lu kong pơlê Dak Lak, tơkăng ƀă kong pơlê Mondulkiri (kong têa Kul), mâu hâi kố, tơdroăng ‘nâ roh tâ phĭu đi đo châ tối troh tung mâu roh hôp pơlê pơla, mâu roh hôp thôn, pơlê lơ a tung loa rơ’jíu dêi cheăm. Ing mâu tơdroăng ‘na tâ phĭu, mơngế ki tâ phĭu tơpui tơno ƀă dêi pó ‘na mâu ngế ki tơbriât to pro kăn, ‘na tơdroăng pêi cheăng, ivá ƀă mâu tơdroăng veăng gum dêi rêm ngế ahdrối pơkâ tơdroăng rah xo ăm kơtâ phĭu dêi tơná. Pôa Lang Văn Tuyển, Kăn pơkuâ chi ƀô̆ thôn Chiềng, ngế ki tâ phĭu, cheăm Ia Lốp tối:

“Ing tơdroăng pơtâng tối mơhnhôk mê vâi krâ kuăn pơlê xuân hlê plĕng ki kal dêi hâi tâ phĭu ƀă kuăn pơlê xuân sôk phiu xua châ mơhnhôk ƀă vâi krâ kuăn pơlê tơkôm troh hâi tâ phĭu vâ ai tŭm mơngế lăm tâ phĭu’’.

Tung hneăng tâ phĭu roh kố, mơngế tâ phĭu kơpong tơkăng kong Dak Lak pơtroh hên tơdroăng loi tơngah ƀă pói vâ a mâu kăn teăng mâ kô ai  rơkong tơpui dêi tơná. Tiô jâ Vy Thị Hương, thôn Chiềng, cheăm Ia Lốp, mơngế ki tâ phĭu pói vâ kăn teăng mâ klêi kơ’nâi châ rah xo kô tơmâng hên tâ troh mâu tơdroăng ki kal dêi kơpong tơkăng kong môi tiah mơjiâng hngêi trăng, troăng klông, mơdêk tơdroăng rêh ối dêi kuăn pơlê, mơjiâng cheăng pêi krá tơniăn, gum rak krá gâk kring tơnêi têa, gâk kring tơniăn ƀă rak tơniăn tíu tơkăng kong dêi Tơnêi têa.

“Ngin rêm kơxêi tơmâng a rơ’jíu tối pơtâng ‘na tơdroăng lăm tâ phĭu. Vâi krâ kuăn pơlê xuân pói vâ châ rah xo mâu ngế ki ai hiâm mơno lĕm ai tuăn ngôa rơkê vâ ối tŏng gum kuăn pơlê xua tơdroăng rêh ối la ngiâ ƀă pói vâ mâu kăn teăng mâ châ rah xo kô rak ngăn tŏng gum tơdroăng rêh ối dêi kuăn pơlê lĕm tro tâ’’.

Rơtế ƀă mơngế ki tâ phĭu a pơlê, khu thái cô a kơpong tíu tơkăng kong xuân châ hên tơdroăng pói tơngah a mâu kăn teăng mâ ki kuăn pơlê rah xo tung hneăng la ngiâ. Jâ Huỳnh Thị Bích Vân, Cô pơkuâ Hngêi trung Mầm non Thiên Nga, cheăm tơkăng kong Ia Rvê tối ăm ‘nâi, rêm kơtâ phĭu ối cho tơdroăng pơtroh pói vâ ai tơ’nôm mâu troăng hơlâ tơmâng troh hnê hriâm kơpong tíu tơkăng kong.

‘’Ngin pói vâ mâu kăn teăng mâ klêi kơ’nâi châ rah xo kô tơmâng tŏng gum hên tâ troh hnê hriâm, ki rơhêng vâ tối cho hnê hriâm mầm non a kơpong tíu tơkăng kong’’.

Vâ tơniăn hâi tâ phĭu tơkŭm po tro pơkâ, tơdroăng hbrâ a mâu cheăm tơkăng kong dêi kong pơlê Dak Lak dế châ pêi pro thâ. Lâp kong pơlê ai 16 cheăm, bêng ối kơpong tơkăng kong, ai 4 cheăm tơkăng kong a tơnêi ‘lâng ƀă 12 cheăm, bêng kĭng têa kơxĭ. Inâi mơngế ki tâ phĭu châ séa ngăn inhên, tơdroăng ‘na mâu ngế ki tơbriât to pro kăn châ tĕm tơdrăng. Khu mô đô̆i Gâk tơkăng kong tơrŭm ƀă Khu râ kăn pơkuâ hnê ngăn cheăng Đảng, khu râ kăn pơkuâ cheăm mơdêk pơtâng tối, mơhnhôk kuăn pơlê veăng tâ phĭu. Trung tă Trịnh Xuân Tuyên, Kăn pơkuâ hnê ngăn Đảng ủi, Cheăng kal kí Đông Mô đô̆i gâk tơkăng kong Ia Rvê tối ăm ‘nâi:

‘’Đông lêng tơrŭm ƀă khu râ kăn pơkuâ hnê ngăn cheăng Đảng, khu râ kăn pơkuâ pơtâng tối vâ kuăn pơlê ‘nâi nhên hnoăng pơkuâ ƀă hnoăng cheăng pơcháu dêi tơná drêng veăng tâ phĭu, tơdrêng amê mơhnhôk kuăn pơlê veăng tâ phĭu tŭm’’.

Đăi tă Đỗ Quang Thấm, Chính ủi, Kăn pơkuâ Mô đô̆i Gâk tơkăng kong kong pơlê Dak Lak tối ăm ‘nâi, rơtế ƀă mơhnhôk, pơtâng tối kuăn pơlê veăng tâ phĭu, khu mô đô̆i gâk tơkăng kong xuân thăm séa ngăn, pơkuâ ngăn troăng tơkăng kong. Mô đô̆i gâk tơkăng kong Dak Lak mơnhên tơniăn păng ‘nâng gâk kring, tơniăn, gum pro tơ’lêi hlâu vâ kuăn pơlê hmiân tuăn veăng hâi tơkŭm hơniâp ro tâ phĭu.

‘’Ngin thăm ăm mơngế pêi cheăng chu a mâu pơlê, ki rơhêng vâ tối cho mâu pơlê ki kal vâ rak kring vế tơniăn, rak tơniăn lâp pơlê pơla a tíu tơkăng kong. Tơdrêng amê, tơkŭm po séa ngăn krá tơniăn tíu tơkăng kong, vâ tơniăn păng ‘nâng ăm roh tâ phĭu la ngiâ.

Ing mâu pơlê tíu tơkăng kong Tơnêi têa, mơngế ki tâ phĭu tơkăng kong Dak Lak dế hbrâ ăm hâi tơkŭm phiu ro kân dêi tâi tâng kuăn pơlê. Rêm kơtâ phĭu ôh tá xê to mơhno hnoăng pơkuâ ƀă hnoăng cheăng pơcháu dêi kuăn pơlê, mê ối pơtroh tơdroăng loi tơngah a mâu kăn teăng mâ mơhno ăm tơdroăng khŏm mơ-eăm, pói vâ dêi kuăn pơlê, gum mơjiâng kơpong tơkăng kong rế hía rế tơniăn ƀă mơnhông mơdêk.