Nếo pơxiâm a kơxo má, Tíu xiâm pro hlá mơ-éa cheăng kâ rêh ối ƀă tơnêi têa cheăm Đăk Đoa hiăng hlo kơdrâm kơdrĕng kuăn mơngế. Tíu xiâm nếo mơjiâng pro, kân rơdâ, lĕm phuâng, ai tŭm kơƀăng tăng vâ rêm ngế ‘nân tơkôm vâ troh dêi roh tơná bro hlá mơ-éa. A péa cho Kiosk vâ kuăn pơlê tiê kơxô̆ ki hdrối kơ’nâi, pơchuât ngăn ‘noăng chư chêh ƀă chêh tơ’mot ‘noăng chư tung Cổng dịch vụ công. Nếo klêi pro mơ-éa mung liăn hngêi arak liăn gum rêh ối pơlê pơla vâ teăm tơdrêng rak ngăn dêi kơphế rơnó nếo, pôa Ayó, krâ pơlê Piơm phiu ro tối ăm ‘nâi:

“Klêi kơ’nâi tơmot chiâng môi cheăm nếo vâ pro mơ-éa tơ’lêi hlâu, ahdrối kuăn pơlê pin thế hbrâ tŭm mơ-éa. Á lăm mung liăn vâi pro mơ-éa hâi ki lâi tơkêa hâi mê vâi pro klêi mơdrếo mơ-éa ăm á tro hâi. Ki kal cho pin thế hbrâ tŭm mâu mơ-éa ahdrối, tiah mê kô ôh tá trâm pá bu kal tĕp xo kơxô̆ hdrối kơ’nâi klêi mê tơkôm troh roh tơná mê pêi. ‘Na mâu hlá mơ-éa ki ê mê á ôh tá ‘nâi laga mung kố á hiăng pro ƀă hlo tơ’lêi hlâu’’.

Ngoh Sun, ối a pơlê Groi 1, nếo tơdah klêi hlá mơ-éa ăm dêi kuăn lăm hriâm cheăng pêi, tối: hngêi ngoh a ngiâ Vi ƀan cheăm Glar (ton). Sap ing cheăm tơmot chiâng môi chiâng cheăm Đăk Đoa, troăng xŏn tâ mê pro hlá mơ-éa pơtối ‘nâng ‘nâi:

“Hdrối nah, tíu pêi cheăng cheăm achê hngêi á laga tơdroăng pro mơ-éa ki tâi ki tá mê hrá, pá puât tâ. Ƀă nôkố tíu pêi cheăng hơngế tâ, prôk hơngế tâ laga pro hô sơ mê rĕng ‘nâng. Troh tíu mê châ nhân viên hnê mơhno inhên troh drêng pro mơ-éa klêi, klêi mê, tơkêa hâi mơdrếo hlá mơ-éa. Tối tơdjuôm rĕng ƀă tơ’lêi hlâu’’.

Tối ‘na tơdroăng pêi pro hlá mơ-éa, pôa Bônh, Kăn pơkuâ thôn pơlê Piơm, cheăm Đăk Đoa, tối:

‘’Tiô á hlo, apoăng drêng 3 to cheăm tơ’mot chiâng môi chiâng môi, hên ngế kuăn pơlê troh pro hlá mơ-éa, kơmăi kơmok pêi cheăng tá hâi tơxâng xua mê pro mơ-éa xuân hrá, kuăn pơlê xuân ai tơpui ti kố ti tá. Laga kơ’nâi mê 3 khế mê pơxiâm tơniăn, tơdroăng pro mâu hlá mơ-éa ăm kuăn pơlê cho tơ’lêi hlâu. ‘Na mâu tơdroăng ki pá ƀă kuăn pơlê hdroâng kuăn ngo ngin ki hên vâi krâ tá hâi plĕng nhên, ai hên ngế ôh tá chiâng chêh chư, tá hâi ‘nâi chêh dêi tơdroăng tung hô sơ, má péa nếo, cho mâu tơdroăng mơ-éa ôh tá tŭm xua mê drêng pro kô pro pá puât tơvâ tơvân’’.

A tíu tơdah pro hlá mơ-éa kơxô̆ 8 – Tíu xiâm pro hlá mơ-éa cheăng kâ rêh ối ƀă tơnêi têa cheăm Đăk Đoa, nâ Sim mơngế Bơhnéa tá hiâm mơno tơdah hô sơ dêi kuăn pơlê. Nâ tối ăm ‘nâi:

“ ‘Na tơdroăng á pơkuâ môi hâi tơdah pro dâng 6 ƀô̆ hô sơ, ki hên pro mâu hô sơ ‘na mơngế krâ, ‘na khôi túa lĕm tro, hnê hriâm, khăm pơlât… Drêng pêi mê á tá hiâm mơno hnê mơhno ăm kuăn pơlê, tŏng gum kuăn pơlê pro troh tá tui lui. Ki pá puât má môi a tơdroăng pro mơ-éa cheăng kâ rêh ối ƀă tơnêi têa nôkố ki tro gá mâu mơ-éa vâi krâ vâi chêh dêi, vâi pro dêi laga vâi krâ ôh tá ‘nâi chư ôh, má péa nếo, cho ôh tá ai tai khoăn VNEID mê kăn ƀô̆ pêi cheăng ngin kô xúa tai khoăn krê dêi tơná, chêh tơ’mot ăm vâi krâ klêi mê pơtroh a kŏng, dâng 5 hâi mê nếo klêi’’.

Châ kuăn pơlê kơnôm troh gum chêh tơ’mot mâu tơdroăng tung Cổng Điện tử pro mơ-éa cheăng kâ rêh ối ƀă tơnêi têa, ngoh Hmên, ối a pơlê Tuơh Ktu, cheăm Đăk Đoa, tối:

‘’Cổng dịch vụ Tơnêi têa ai tŭm mâu phân mêm vâ pro mâu mơ-éa, môi tiah khai sanh, tơnêi tơníu…tâi tâng mâu kơvâ pơrá chêh tung mê tâi tâng, laga môi iâ kuăn pơlê tá hâi chiâng pro. Krê á mê hiăng tơniăn, xúa chiâng, hiăng chiâng pêi tơ’lêi hlâu xua hiăng pro ăm vâi krâ kuăn pơlê hên. Ƀă vâu krâ kuăn pơlê mê trâm pá hên. A tíu xiâm pro mơ-éa cheăng kâ rêh ối ƀă tơnêi têa xuân ai ngế tŏng gum chêh tơ’mot laga vâi krâ xuân krếo á troh a cheăm xua nôkố vâi krâ pro hô sơ hên tâng pơchông ƀă cheăm ki ê’’.

Tiô pôa Nguyễn Thành Thoại, Phŏ Kăn pơkuâ Tíu xiâm pro mơ-éa cheăng kâ rêh ối ƀă tơnêi têa cheăm Đăk Đoa, tíu pêi cheăng hiăng châ mơ’no liăn kế tơmeăm khoăng lĕm phuâng, ai 9 tíu pro mơ-éa cheăng kâ rêh ối ƀă tơnêi têa, 10 kơmăi vi tĭnh ƀă 1 Kiosk gum kuăn pơlê pêi pro mâu tơdroăng chêh chư a Cổng điện tử. Sap ing khế 7/2025 troh tâi khế 1/2026, Tíu xiâm tơdah lối 5.400 hô sơ. Kơxô̆ hô sơ ki pro tro hâi khế pơkâ châ lối 98,6%.

Pakĭng kơvâ tơnêi tơníu dế ai mâu tơdroăng tơvâ tơvân xua ôh tá tơdâng tơ’mô ‘na ‘noăng chư chêh, ki ê tâi tâng mâu tơdroăng pro mơ-éa pơrá châ pêi pro rĕng. Pôa Nguyễn Thành Thoại, tối ăm ‘nâi:

“Kong pơlê pêi pro kơtăng tơdroăng kố. Mơ’nui rêm hâi mê cho ngin thế tơbleăng a kơmăi. Ai trâm pá môi tiah lâi mê mơjiâng mâu tôh, khu, krếo phôn, chêh chư pơtroh vâ pro lơ kơnôm tŏng gum ôh tá lôi kreăng. Mê kong pơlê hnê mơhno kơtăng, tơtro rơkê tung tơdroăng pro mơ-éa cheăng kâ rêh ối ƀă tơnêi têa a tíu pro mơ-éa cheăng kâ rêh ối ƀă tơnêi têa’’.

Ki nhên khât ing cheăm Đăk Đoa, kong pơlê Gia Lai, khu râ kăn pơkuâ 2 râ dế pêi pro cho tơdroăng pro mơ-éa achê kuăn pơlê, hlê plĕng kuăn pơlê ƀă gum kuăn pơlê pro mơ-éa. Ƀă pơlê pơla mơngế hdroâng kuăn ngo a Đăk Đoa, rơnó hơngui kố rế lĕm, thăm hơtô. Kuăn pơlê rak krá tơniăn loi tung tơdroăng pơkuâ dêi Đảng, tung tơdroăng la ngiâ eăng dêi pơlê, tơnêi têa!