Tung hngêi pêi cheăng dêi Khu pêi cheăng tơrŭm Pêi chiâk deăng ƀă tê mơdró mơjiâng pro ƀŭn – miê̆n – phơh khăng Chi Lăng – Khánh Xuân, bêng Thành Nhất, kong pơlê rế kơtóu ƀŭn – miê̆n – phơh châ pro têng khăng, tâ tung tơdrong vâ tê ăm kơchơ. Pôa Hà Văn Tuyến, Kăn pơkuâ hlối cho kăn hnê ngăn Hô̆i đong quăn trĭ khu pêi cheăng tơrŭm ăm ‘nâi: Rêm khế khu pêi cheăng tơrŭm kố tê ăm kơchơ sap ing 15 – 20 tâ̆n ƀŭn, miê̆n, phơh tŭm túa.

Sap ing châ mơnhên ƀŭn miê̆n phơh OCOP 3 hơlŏng, ƀŭn – miê̆n - phơh dêi khu pêi cheăng tơrŭm rế hía rế châ hên kuăn pơlê ‘nâi troh ƀă roê kâ. Pôa Hà Văn Tuyến ăm ‘nâi:

“Apoăng hơnăm yương lĭt ƀă mơ’nui hơnăm âm lĭt mê ngin hbrâ pro dâng 40% ƀŭn miê̆n phơh khăng tâk hên tâ tâng pơchông ƀă mâu khế hdrối. Pakĭng mê, ngin xuân ai ngế pêi cheăng ki hbrâ pêi tiô hâi chôu tơ’mô ƀă kơxô̆ tơmeăm pêi lo tiô tối hdrối tâk tơ’nôm vâ tơtro ƀă ai tŭm ƀŭn miê̆n phơh vâ tê ăm kơchơ mơdró tung rôh Têt”.

Tơdroăng pro kơhnâ tơvâ xuân mơhno nhên a mâu khu mơdró kâ ki uâ pơliê mơdiê tơmeăm pêi lo ing chiâk deăng túa ki kân. A Kŏng ti pêi cheăng tiô rơnó Đức Thịnh, môi tung mâu tíu pêi cheăng pro, uâ pơliê mơdiê kloăng hôt a kong pơlê, mâu kơmăi kơmok uâ pơliê, tâ tung tơdrong dế pêi cheăng tâi ivá.

Jâ Nguyễn Ngọc Thùy Sơn, Kăn pơkuâ kŏng ti ăm ‘nâi, pakĭng tơdroăng ki tê ngi kong têa ê, malối cho kơchơ kong têa Sinuâ, rôh mơ’nui hơnăm khu mơdró kâ tơkŭm hên tâ ăm tơdroăng ki tê ăm khu mơdró tung tơnêi têa, malối cho tơdroăng ki vâ roê kâ a rôh Têt. Khu mơdró kâ hiăng hbrâ rơnáu hiăng pro mâu túa ki nếo, tơtrŏng túa pro ki lĕm, tơdrong tâ xuân lĕm vâ mơdêk tơdroăng ki ngăn nhên inâi.

“Khu mơdró kâ hiăng hbrâ rơnáu chêh pro mâu túa tơmeăm ki nếo ƀă mâu túa ki lĕm ai pơxúa ‘na tơrŭm, tơkŭm. ‘Na yă tê, kŏng ti hiăng pro tơniăn tiô yă dêi hngêi kơmăi tê, la xuân ai mâu túa tơmeăm ‘mâi pơhlêh yă mơdêk yă tê dâng 5% xua kơxô̆ liăn roê phái vâ pro gá to. Tung rôh Têt, mâu ƀŭn miê̆n phơh tê ăm kơchơ tung tơnêi têa tâk dâng 10%.

A kơpong peăng mâ hâi Lo kong pơlê Dak lak, hên tíu pro tơmeăm OCOP cho rơpŏng hngêi pro xuân ‘mâi mơnhông châ ki xơpá klêi kơ’nâi têa kân lân lu, teăm tê tơmeăm ăm kơchơ rôh Têt. A tíu tê tơmeăm OCOP a cheăm Sông Hinh, mâu tơmeăm môi tiah í tâm po tiu, hơ’nêh ro têng môi hâi tôu, hơ’nêh ro têng a drá peăng, hơ’nêh chu têng a drá peăng, hơ’nêh í khăng, hơ’nêh chu khăng châ pro ƀă tâ tung tơdrong đi đo.

Pôa Nguyễn Duy Hùng, ngế ki pơkuâ tíu mơjiâng pro tơmeăm kâ Hùng Miên ăm ‘nâi, rôh kong mê khía mơhot têa kân lân lu pơla hdrối kố nah hiăng tơdjâk kân troh mâu tơmeăm ki vâ pro xuân môi tiah tơdroăng ki pro, la tíu pro hiăng teăm ‘mâi mơnhông cheăng vâ pro mâu tơmeăm tê ăm kơchơ vâ roê.

“Ngin tơkŭm mơjiâng pro pơtối hlối vâ teăm tê ăm kơchơ rôh Têt. Rôh Têt hơnăm kố, tơdroăng ki vâ roê kâ tâk hên dâng 35% tâng vâ pơchông ƀă hâi tiah hmâ, laga yă tê ôh tá tâk hên to lâi oh”.

Rơtế ƀă ivá mơ-eăm dêi khu mơdró kâ ƀă rơpŏng ki mơjiâng pro, cheăng pơkuâ ngăn kơchơ mơdró, rak vế tơniăn krúa kế kâ xuân châ kơvâ cheăng ki ai tơdjâk pêi kơtăng. Trung tă Nguyễn Đức Duy, Phŏ pơkuâ Ƀơrô Kăn sat Cheăng kâ, Kŏng an kong pơlê Dak Lak ăm ‘nâi khu ki ai tơdjâk troh hiăng pêi pro kơtăng tơdroăng ki lăm ngăn, mâu tíu mơjiâng pro tung rôh ki kố.

“Kơxô̆ kŏng an kô tơtrŏng hbrâ mơdât mâu tơmeăm ki roê vâ xúa tung mơjiâng pro, uâ pơliê pro kế kâ ăm hngêi ki ôu kâ, tê mơdró, rak tơniăn ôh tá xúa trếo ki mơdât, tơmeăm ki ôh tá ăm phêp xúa, ing mê châ hbrâ mơdât hơ-ol kế kâ, vâ gum kuăn pơlê tơdah Têt tơniăn”.

Tơkâ luâ mâu rôh xơpá xua kong mê khía mơhot têa kân lân lu, ƀă hiâm mơno hbrâ rơnáu, mơ-eăm dêi mâu ki mơjiâng pro, tê mơdró rơtế ƀă tơdroăng veăng gum kơtăng dêi mâu kơ koan ki ai tơdjâk, kơchơ mơdró tơmeăm a Dak Lak rak tơniăn tŭm hên tơmeăm, tro tơdroăng púi vâ roê dêi kuăn pơlê tung rôh Têt Lo hơnăm nếo.