Kơxo má, tơdroăng ki pêi cheăng hiăng hlo hơniâp ro a mâu hngêi nhĕng, hngêi hlâm ki châ pro a kơpong ƀăng tơnêi pêt kơchâi Đơn Dương, kong pơlê Lâm Đồng. Kơchâi châ pui xo, pro lĕm tâ tung tơdrong tiô mơ-éa tơkêa roê; reăng châ pơtroh a mâu kơpong pêt tơkŭm. Pôa Khắc Bình, kuăn pơlê cheăm D’ran, ro rih ăm ‘nâi, pơhlêh a kơpong pêt kơchâi kố troh tui lui ƀă cheăng mơjiâng thôn pơlê nếo:

“Vâi krâ nhŏng o mơnhông cheăng kâ xuân hlo tơƀrê khât. Kơnôm ai tơdroăng tŏng gum dêi Tơnêi têa mê cheăng kâ hiăng hlo mơnhông tơtêk tâ hdrối. pêt kơchâi môi tiah plâi tô mat, mâu kơchâi, hăng ƀă hên ki ê mâu hdrê pêt kố châ pêt tiô troăng pêi chiâk deăng xúa kơmăi kơmok chal nếo. Nôkố pơxiâm pêi tơ’nôm cheăng pêt reăng. Tơdroăng rêh kâ ối nôkố mơnhông tâ tâng vâ pơchông ƀă hdrối, tơdroăng rêh kâ ối dêi vâi krâ nhŏng o hiăng mơnhông tơtêk khât”.

Mơjiâng thôn pơlê nếo a kơpong pêt kơchâi Đơn Dương ai 4 to cheăm Đơn Dương, Ka Đô, Quảng Lập ƀă D’ran dêi kong pơlê Lâm Đồng, tro ƀă troăng tơmiât pêt kơchâi rơkê plĕng. Troh mơ’nui hơnăm 2025, kơchâi ƀă reăng pêt tiô rơxông nếo châ dâng 95% ƀăng tơnêi pêt; kơnâ dêi tơdroăng pêi chiâk tiô riân châ lối 220 rơtuh liăn tung ha tung môi hơnăm. Mâu cheăm ki kố pơrá hiăng pêi châ tiô tơdroăng pơkâ thôn pơlê nếo, tiô pơkâ.

Tiô ivá mơnhông tơdjuôm, mâu pơlê cheăm hdroâng kuăn ngo akố xuân pơhlêh rĕng. Pôa K’Bril, Ngế pơkuâ thôn Kambute, cheăm Đơn Dương ăm ‘nâi, tơdroăng pơhlêh mê ôh ti xê to a troăng pơkâ pêt mê ối mơhno nhên a tuăn ngoâ ki rơkê tung pêt ƀă tơdroăng rêh kâ ối dêi kuăn pơlê:

“Nôkố vâi krâ nhŏng o hiăng pêi châ tiô tơdroăng ki thế xúa kơmăi kơmok ki kân vâ pêt, roê klŏng tôh têa lo i iâ, kih thuât pêt hiăng rế hía rế châ mơnhông. Ing mê, pơhlêh ‘na túa rêh kâ ối xuân môi tiah pêi lo liăn, tơdroăng rêh ối mê tơniăn rế hía rế mơnhông. Thôn Kambute nôkố mâu rơpŏng pro hngêi 2 râ, 3 râ, ai rơpŏng ki ‘nâ hiăng roê ô tô. Ing mê, ngiâ méa dêi thôn tối krê, a cheăm tối tơdjuôm pơhlêh hên khât, pơhlêh rêm hâi”.

Tung pơla klâ xoăng tíu pêi cheăng ƀă xúa túa pêi cheăng kăn pơkuâ 2 râ, tơdroăng séa ngăn, mơnhên mâu tơdroăng pơkâ pêi mơjiâng thôn pơlê nếo châ mâu cheăm kơpong Đơn Dương tối cho hnoăng cheăng ki xiâm. Tiô pôa Trương Quang Kiên, Phŏ kăn hnê ngăn Vi ƀan cheăm D’ran, thôn pơlê nếo châ krâ tơrŭm ƀă tơbleăng pêi Pơkâ 57 ‘na mơdêk rơdêi xúa khoa hok kong ngê̆, pơhlêh nếo – tơmiât pêi rơkê ƀă pơhlêh kơxô̆.

“Pơkâ Hneăng hôp Đảng ƀô̆ cheăm D’ran hơnăm 2025 – 2030 hiăng pơkâ troăng pêi nhên. Tung mê, malối cho mơjiâng mâu túa pơkâ pêi vâ mơnhông, xúa kong ngê̆ tung pêi chiâk deăng, pêt tơmeăm, mơjiâng mâu Khu pêi cheăng tơrŭm, tôh pêi cheăng tơrŭm, pêi lo mâu tơmeăm OCOP, ing mê mơhnhôk mâu khu mơdró kâ ‘no liăn pêi cheăng a hngêi kơmăi uâ pơliê, mơdiê tơmeăm pêi lo ing chiâk deăng, mơdêk pêi lo liăn ăm kuăn pơlê”.

Ƀă cheăm Đơn Dương nếo – mơjiâng pro sap ing pơlê kân Thạch Mỹ, cheăm Đạ Ròn ƀă cheăm Tu Tra ton – kăn pơkuâ cheăm hiăng mơnhên nhên troăng prôk ăm hneăng ki pơtối. Pôa Trần Hùng Dũng, Kăn hnê ngăn Vi ƀan cheăm Đơn Dương, ăm ‘nâi:

“Klêi kơ’nâi ai mâu túa pơkâ pêi ‘na mơjiâng thôn pơlê nếo hơnăm 2026 - 2030 mê cheăm ai túa pơkâ nhên vâ pơtối mơdêk pêi lo liăn, kơlo rêh kâ ối, tơnêi tơníu hyôh kong prâi, rak vế ƀă mơdêk ki rơkê plĕng hngêi trăng troăng klông pêt tơmeăm ƀă tơdroăng rêh ối ƀă hên ki ê. Pro tiah lâi vâ chê tiô pơkâ cho mơjiâng cheăm thôn pơlê nếo rơkê plĕng”.

Sap ing kơpong pêi chiâk Đơn Dương, kong pơlê Lâm Đồng ăm hlo, tơdroăng mơjiâng thôn pơlê nếo dế mot tung hneăng mơdêk ki rơkê, tơmiât troh thôn pơlê nếo rơkê, pêt mơjiâng tơmeăm tro ƀă kơchơ mơdró kâ ƀă ki kơnía. Mâu tơdroăng ki pơhlêh mê ôh ti xê pro pơhlêh ngiâ méa thôn pơlê, mơdêk tơdroăng rêh kâ ối kuăn pơlê, mê ối veăng gum pêi pro pơhlêh mâu pơkâ mơnhông krá tơniăn ton ki Đảng hiăng mơnhên.