Pêi pro tơdroăng pơkâ kơxô̆ 154 hơnăm 2025 dêi Chin phuh, hâi 29/1/2026 kong pơlê Lâm Đồng pơkâ Túa pêi pro kơdroh ngế pêi cheăng hơnăm 2026. Túa pơkâ kố cho vâ pơtối klâ xoăng, pro rế lĕm kơ koan cheăng tơnêi têa, mơdêk ki xêt khât, tơƀrê tơdroăng cheăng dêi mâu kơ koan cheăng tơnêi têa, tíu pêi cheăng tơnêi têa a kong pơlê. Tiah mê, tung hơnăm 2026, tiô tối hdrối kong pơlê Lâm Đồng ai 605 ngế kăn ƀô̆, kong chưk, viên chưk ối tung 104 to kơ koan, tíu pêi cheăng, kong pơlê pro kơdroh kơxô̆ ngế pêi cheăng.

Tung mê, 468 ngế châ xúa troăng hơlâ tŏng gum pơtê cheăng hdrối hâi khế pơkâ ƀă 137 ngế châ pơxúa ing tơdroăng ki pơtê cheăng tro hơnăm pơkâ. Kong pơlê Lâm Đồng tối nhên ki xiâm ôh ti xê ‘na kơxô̆ ngế cheăng, mê ối cho tơdroăng pơkâ xúa, mơdêk ki rơkê dêi mâu ngế pêi cheăng, pêi châ tơdroăng púi vâ hnoăng cheăng pơcháu tung tơdroăng nếo, tơmiât troh mơjiâng tíu pêi cheăng rế lĕm, rơkê, pêi cheăng xêt, tơƀrê.