A kơpong  tơnâp pôa Trần Phú, Kăn xiâm pơkuâ hnê ngăn Đảng  ki apoăng dêi Đảng Kŏng sản Việt Nam, pôa Tô Lâm, Kăn xiâm pơkuâ hnê ngăn Đảng ƀă mâu kăn xiâm tơnêi têa troh pleăng reăng, têk nhang tơbâ hlối mơhno hiâm mơno pâ nhoăm, mơnê kơ hnoăng hiăng pleăng kân kĭn dêi pôa tung tơdroăng pêi cheăng kăch măng ki lĕm dêi Đảng ƀă dêi hdroâng mơngế Việt Nam.

Tơdroăng ki lĕm dêi kăch măng, ivá rơdêi tuăn vâ châ mơhno nhên dêi mơngế lêng kŏng sản ki lĕm, khên tơnôu, ôh tá xâu klâi dêi pôa Trần Phú đi đo châ pơ-eăng, vâ mâu rơxông ối nếo dêi kăn ƀô̆, đảng viên ƀă khu râ kuăn pơlê pin hriâm ƀối. Pơtối mê, a kơpong Tơbâ ton nah râ tơnêi têa malối Pái hơlâ troăng Đồng Lộc, pôa Tô Lâm - Kăn xiâm pơkuâ hnê ngăn Đảng ƀă mâu kăn ki lăm pêi cheăng dêi Tíu xiâm hiăng têk nhang, ‘măn rơvĭng reăng a Hngêi meăm chêh inâi ngế rơtăm ki pleăng hnoăng tơná tơplâ ta troh hlâ a Ngã Ba Đồng Lộc.

Tơdroăng tơplâ troh hlâ khên tơnôu dêi mâu vâi droh pleăng hnoăng tơná hiăng chiâng tơdroăng ki mơhno ai hnoăng kân dêi rơpâu ngế droh rơtăm xua tơnêi têa piu tơná, ôh tá mơjo dêi hơnăm ối nếo xua vâ pro tơleăng lĕm hdroâng mơngế, lâp tơnêi têa tơrŭm môi.