Mâu hâi apoăng dêi hơnăm 2026, a tíu pro Hngêi trung Phôh thong ai tíu kâ koi ối pơtê péa râ Buôn Đôn (thôn Thống Nhất, cheăm Buôn Đôn, kong pơlê Dak Lak), lối chât ngế kŏng nhân, kih sư rơtế ƀă mâu rơxế kơmăi kơmok dêi ngế ki xo pro, xoăng pro hên khu, vâ poê mâu meăm, hơ’lâk xơmong vâ pro trăng; ki ê cho hâng pơklêp meăm, vâ ok ƀê tong pro râ má 1 hngêi xiâm 3 râ. Pôa Trần Văn Long, ngế ki hnê mơhno pro hngêi trung kố ăm ‘nâi, mâu khu ki xo pro xuân ối pơtroh mâu hên mâu ngế pro, kơmăi kơmok vâ rĕng pro klêi. Nôkố hngêi trung kố hiăng pro châ tơkâ luâ pơkâ mơ’no:

“Nôkố, a tíu ki pro hngêi trung ai 5 khu ki xo pro ai tơdjâk, dế xoăng rêm khu xo pro 1 ngế pơkuâ ngăn hnê mơhno, 5 ngế kih sư rơtế ƀă 40 – 50 ngế kŏng nhân pro 5 to hngêi trung dêi tơdroăng tơkêa. Mâu tơdroăng pêi pro châ tơbleăng pro cho vâ rak vế tơniăn tơdroăng ki pro. Ngin dế mơ-eăm ‘mâi mơnhông pro tung pơla kong prâi tô lĕm, tơkŭm pro hên  kơhâi ta kơmăng vâ pro klêi luâ tơdroăng pơkâ, pơcháu ăm kong pơlê vâ xúa”.

Tiô ngế ki teăng mâ cho ngế ki ‘no liăn, cho pôa Võ Văn Lợi, Phŏ pơkuâ Khu pơkuâ tơdroăng tơkêa pro hngêi trung dân dụng ƀă Kong nghiê̆p kong pơlê Dak Lak (Ban B), troh nôkố tâi tâng mâu hngêi trung hdroâng kuăn ngo ai tíu kâ koi ối pơtê râ má 1. Kơxô̆ liăn ‘no châ lối 32%, tơ’mô dâng 120 rơtal liăn, mơni kô tro tơdroăng pơkâ. Mot tung rơnó tôu mơdrăng, Khu kố hiăng mơjiâng pro túa pơkâ tŏng gum mâu khu ki xo pro tơkŭm pro vâ pro klêi hngêi trung kố a khế 8, tá drêng ai kong mê. Pôa Võ Văn Lợi tối ăm ‘nâi.

“Troh nôkố, hngêi trung kố hiăng tơniăn tơdroăng ki pro. Laga, xua kong mê khía mơhot a kơpong tơkăng kong Dak Lak a hơnăm 2026 ôh tá ‘nâi hdrối, ngin hiăng chêh pro mâu túa pơkâ tŏng gum ‘na kơmăi kơmok, rơxế, mâu ngế cheăng ƀă tơkŭm pêi 3 vâ rĕng pro klêi. Ing mê, xúa mâu hâi ki tôu lĕm tung rơnó mơdrăng vâ tơbleăng pro”.

Tiô pôa Nguyễn Thiên Văn, phŏ kăn hnê ngăn Vi ƀan kong pơlê Dak Lak, klêi kơ’nâi hnê mơhno dêi khu ki ‘no liăn pro, mâu kong pơlê mâu khu ki xo pro hiăng mơ-eăm mơdêk rĕng tơdroăng ki pro, rĕng pro klêi vâ ăm hok tro kơpong tơkăng kong châ mot hriâm, tơdrêng amê hlối koh hâk xuân môi tiah ăm Pơkâ Hneăng hôp XIV dêi Đảng mot tung tơdroăng rêh kâ ối. Pôa Nguyễn Thiên Văn tối nhên.

“Tơbleăng Tơdroăng pơkâ Hneăng hôp XIV dêi Đảng nếo châ tơbleăng, kong pơlê kô pêi pro pơhlêh tơtro ƀă tơdroăng ki ai khât dêi kong pơlê, vâ mơjiâng pro mâu troăng hơlâ tŏng gum ki pơxúa ƀă mâu thái cô ƀă hok tro kâ koi ối pơtê, pro tơ’lêi hlâu má môi vâ thái cô ƀă hok tro hmiân tuăn hnê, hriâm tâp. Ing mê, pêi pro tơƀrê mâu tơdroăng pơkâ pêi tung hnê hriâm ƀă hnê mơjiâng tuăn ngo rơkê a mâu cheăm tơkăng kong tối krê ƀă tung lâp kong pơlê Dak Lak tối tơdjuôm”.

Mâu trăng trêi ki krá kâk châ pơkâ, mâu trăng mơnât châ meăn rế xŏn, pro ivá râng ăm mâu trêi ƀê tong krá kâk a mâu hngêi trung hdroâng kuăn ngo ai tíu kâ koi ối pơtê kơpong tơkăng kong Dak Lak. Sap ing hơnăm 2026 – 2027, tíu kố kô chiâng tíu hnê hriâm tuăn mơno tung hriâm tâp, mơ-eăm vâ tung la ngiâ, ƀă ivá hơnăm ối nếo ƀă tuăn mơno rơkê dêi tơná, veăng gum mơjiâng kơpong tơkăng kong Dak Lak rế hía rế tơniăn, mơnhông, kro mơdrŏng.