Pôa K’Bé cho môi tung mâu ngế ki kuăn pơlê pâ nhoăm ối a kơpong kong ngo Cao Sơn. Hơnăm kố pôa hiăng 60 hơnăm, luâ hên hnoăng cheăng pro kăn pêi cheăng a kong pơlê, pêi cheăng ki lâi, pôa xuân châ kuăn pơlê mơngế K’Ho, Raglai ối a kố hâk vâ pâ nhoăm .

Drêng hiăng pơtê cheăng xua hơnăm hiăng krâ, pôa ối châ kuăn pơlê rah xo cho Ngế kuăn pơlê pâ nhoăm. Pôa K’Bé hiăng kơhnâ rơtế ƀă Khu kăn thôn hnê kuăn pơlê troăng hơlâ dêi Đảng, luât Tơnêi têa. Malối cho hnê kuăn pơlê veăng mơjiâng thôn pơlê nếo, mơnhông cheăng kâ, mơjiâng tơrŭm môi tuăn, rak tơniăn pơlê pơla ƀă hlối kơhnâ pơtối rak ki kơnía túa lĕm tro hdroâng kuăn ngo.

“Á hlo hnoăng cheăng dêi tơná hngăm hngo tâ tâng vâ pơchông ƀă tơdroăng cheăng kuăn pơlê, ƀă vâi krâ nhŏng o ki ối tung pơlê. Xua mê, tung hơnăm kố hía nah, á rơtế ƀă vâi krâ nhŏng o tung pơlê ai mâu tơdroăng veăng hnê tối tăng ‘nâi plĕng mâu tơdroăng ăm râ ủy, mâu kăn kal pêi tro ƀă tŭm tâ mâu troăng hơlâ, vâ ti lâi tơdroăng rêh ối dêi kuăn pơlê rế mơnhông tơƀrê. Ai tiah mê ‘nôi , tuăn loi dêi kuăn pơlê ƀă Đảng, Tơnêi têa thăm mơdêk tâ nếo. Ki nhên tâ, ing mâu troăng hơlâ mê, tung mâu hơnăm hdrối kố nah, hiăng veăng ‘no hnoaewng mơnhông rêh ối dêi kuăn pơlê hdroâng kuăn ngo a cheăm Phan Sơn”.

Pơtối rak vế ki djâ ahdrối tung pêi cheăng, pôa K’Bé ôh tá xê to rak vế pêi pro tro troăng hơlâ, luât pơkâ dêi Đảng, Tơnêi têa mê ối cho ngế ki kơhnâ tung mơnhông cheăng kâ dêi rơpŏng hngêi, ngế ki mơhno djâ troăng lĕm ahdrối ăm kuăn cháu ƀă kuăn pơlê akố pêi pro ƀối.

Ôh ti xê to ‘nâi pêi cheăng pro kro mơdrŏng ăm to dêi rơpŏng hngêi tơná, pôa K’Bé ối hnê mơhnhôk dêi nhŏng o hdrông hdrê, kuăn pơlê ki achê pơ’lêh hdrê pêt, mơnăn păn, khên mung liăn dêi hngêi rak liăn vâ pêi cheăng kâ. Mê pôa ối mơhnhôk kuăn pơlê tah túa tơlá ton nah ki ôh pá tro, malối cho túa tơlá lơ rĕng xo on veăng drêng tá hâi tro hơnăm.

Pôa K’Vi Ang, ối a cheăm Phan Sơn, kong pơle Lâm Đồng ăm ‘nâi, hdrối nah, tung pơlê ai hên ngế rĕng xo on veăng, ai o kơdrâi  xo kơnốu drêng nếo 13- 14 hơnăm. Klêi châ pôa K’Bé tối nhên, hnê tối ăm kuăn pơlê ‘nâi ki ôh ta khoh ki tơdjâk dêi tơdroăng xo on veăng drêng tá hâi tro hơnăm hnê tối tung mâu rôh hôp thôn, pơlê, kum kuăn pơlê hlê nhên ki tơdjâk ‘mêi dêi tơdroăng rĕng xo on veăng drêng hâi tro hơnăm. To lâi hơnăm kố tơdroăng rĕng xo on veăng hâi tro hơnăm nê hiăng chu kơdroh hên.

“Tăm K’Bé ai hnoăng cheăng kân troh mơnhông cheăng kâ xuân môi tiah mâu tơdroăng mơhnhôk cheăng a pơlê. Mê cho mơhnhôk kuăn pơlê pleăng tơnêi vâ pêi mâu tơdroăng pơcháu pro troăng prôk, kâng rơchôa, pro troăng kân. Tăm K’Bé xuân hnê tối thế kuăn pơlê pơtối rak tuá lĕm tro dêi hdroâng kuăn ngo, hlối hnê kuăn pơlê pêi tro mâu tơdroăng pro tơniăn a cheăm Phan Sơn”.

Kơnôm mơ-eăm, veăng ‘no hnoăng dêi mơngế kuăn pơlê loi nhoăm, troh nôkố cheăm Phan Sơn, kong pơlê Lâm Đồng hiăng pêi châ tơƀrê mâu tơdroăng tung mâu kơvâ cheăng, mâu troăng prôk tung thôn châ toh ƀê tông, rơpŏng kuăn pơlê châ xúa on tơhrik dêi tơnêi têa; mâu thôn xuân ai hngêi tơkŭm hôp, kơxô̆ rơpŏng kơtiê kơdroh rêm hơnăm... Khôi túa vêa vong hdroâng kuăn ngo châ pơtối rak vế, rak tơniăn cheăng kal kí, rak tơniăn pơlê pơla, pơtối rak ki tơrŭm môi tuăn hdroâng kuăn ngo.

Pôa Bùi Ngọc Sơn, Phŏ Kăn pơkuâ Tíu pêi cheăng ngăn Kuăn ngo ƀă Loi tĭng tiô khôp kong pơlê Lâm Đồng ăm ‘nâi, vâ mơdêk hnoăng cheăng pêi dêi ngế kuăn pơlê pâ nhoăm, troh nôkố, Tíu pêi cheăng hiăng tơkŭm po 4 to lâm hnê hriâm tơ’nôm ƀă mơdêk ivá cheăng dêi mâu ngế kuăn pơlê pâ nhoăm tung lâp tơnêi têa, vâ Ngế kuăn pơlê pâ nhoăm ‘nâi nhên ƀă hnê pêi ai pơxúa tơƀrê tâ troh kuăn pơlê.

Ƀă tơdroăng kuăn pơlê loi nhoăm tơá, pôa K’Bé ôh ti xê to pơtối rak hnoăng cheăng pro tíu ki tơdjêp mê ối veăng pro tíu ki tơbleăng luât tŏng gum ƀă mơdêk mơnhông kơpong kuăn ngo a cheăm kong ngo Phan Sơn dêi kong pơlê Lâm Đồng.