Hơnăm 2007 ngoh Lê Văn Thuận, a thôn 7, cheăm Hàm Thuận, kong pơlê Lâm Đồng, pêt 100 xiâm hdrê loăng plâi tuâk. Hlo loăng plâi xông kân lĕm a kơpong tơnêi prêi, troh hơnăm 2010 ngoh pêt tơ’nôm 400 xiâm nếo, pêt ƀăng a tơnêi lối 1,7ha. Klêi kơ’nâi 2 hơnăm pêt, plâi tuâk hiăng ai reăng, kơ’muăn plâi ƀă troh hơnăm má 3 hiăng ai plâi châ krí tơniăn. Hơnăm 2015, hlo kơdrum loăng plâi tuâk phuâng lĕm, tơtro ƀă tơdroăng ki păn í peâp, ngoh Thuận roê hlâm B40 kâng tâ tá, pro kơdroăng rông, tơdrêng amê hlối roê hdrê í kong pin kơ’nêi tung kơdâm xiâm loăng plâi tuâk.

Apoăng ngoh bu păn rêm rơnó to lâi chât to xo. La klêi kơ’nâi hên rơnó păn hlo tơƀrê ‘na liăn ngân châ xo, ngoh roê kơmăi kơ-âm kơtâ vâ kơ-âm xêh a hngêi. Tiah mê, í păn rế hía rế tâk hên tiô rêm hơnăm, troh hơnăm 2018 mê kơxô̆ í hiăng châ lối 3.700. Ngoh Lê Văn Thuận ăm ‘nâi, kơnôm ing rak ngăn krâu, túa pêt tơmeăm hlối tơrŭm păn í dêi ngoh hiăng pro pơxúa châ xo liăn ngân tơƀrê.

“Apoăng rơpŏng xuân mơnhên tơdroăng pêt plâi tuâk tơrŭm ƀă păn í cho vâ mơnhông cheăng kâ pêi lo liăn ăm rơpŏng. Xua mê rơpŏng pơkâ păn ƀă kơxô̆ í păn hên vâ tê ăm kơchơ mơdró, pakĭng tơdroăng ki păn í vâ kâ, rơpŏng ối kơ-âm kơtâ vâ pro rế ai hên hdrê í vâ tê ăm vâi krâ nhŏng ki rơhêng vâ roê păn”.

Ngoh Thuận tối, vâ hbrâ mơdât pơreăng ăm í, ngế ki păn kal rak ngăn tro pơkâ ƀă séa ngăn mâu í mê tơniăn. Pâk pơkeăng hbrâ mơdât pơreăng rêm khế ăm í cho tơdroăng ki pơklât athế pêi pro kơtăng, tâng hlo í tro tâ pơreăng mê athế rĕng roê pơkeăng pơlât. Pakĭng mê, ngoh Thuận ối pro hdrê tê ăm kơchơ mơdró ƀă yă tê 17 rơpâu liăn môi to, rêm khế ngoh tê 2.700 - 3.000 to. Tâi tâng kơxô̆ liăn châ xo ing păn í dêi rơpŏng ngoh rêm hơnăm châ lối 1,5 rơtal liăn, ôh tá riân liăn hrê roê ki kố ki tá mê ối châ xo liăn laih lối 450 rơtuh liăn.

Pôa Nguyễn Quốc Tuấn, teăng Khu ngăn kuăn pơlê pêi chiâk  cheăm Hàm Thuận, kong pơlê Lâm Đồng ăm ‘nâi, pôa Lê Văn Thuận khên tơmiât, ‘nâi pêi, ngoh hiăng mơdêk ki pơxúa kơpong tơnêi prêi dêi pơlê xiâm.

“Sap ing kơpong tơnêi prêi ki ôh tá hơpok lĕm kố, on veăng ngoh Thuận xuân chiu pá pêi vâ ai liăn xúa tung rơpŏng. Tung mâu hơnăm hdrối, túa pêt plâi tuâk hlối păn í dêi rơpŏng ngoh Thuận hiăng hlo tơƀrê khât ‘na pêi lo liăn. Kố cho môi tung mâu túa pêi ki hên dêi cheăm ƀă kô po rơdâ tung la ngiâ, veăng gum mơdêk pêi lo liăn ăm vâi krâ nhŏng o a cheăm”.

Ƀă ki tơƀrê ‘na liăn ngân, nôkố túa pêt plâi tuâk hlối păn í dêi ngoh Thuận dế châ hên ngế hriâm tâp, pêi tiô ƀối. Ngoh ê Văn Thuận xuân cho môi tung mâu rơpŏng djâ troăng ahdrối pêt plâi tuâk tiah hmâ a tơnêi prêi a thôn 7, cheăm Hàm Thuận, kong pơlê Lâm Đồng, po troăng tơmiât pêi krá tơniăn, vâ pro kro mơdrŏng ăm rơpŏng ƀă pơlê pơla.