A kơpong ôm hyô pơlê pơla ƀuôn Akŏ Dhông, bêng Buôn Ma Thuột, tơdroăng ki tŏn chêng koăng rơtế ƀă mâu tơdroăng hơdruê xoăng chal krâ hiăng tơ’mot hên tơmối lăm ngăn tung mâu hâi apoăng hơnăm nếo. Nâ Freya, tơmối lo ing Mih, ăm ‘nâi, tâ tá drêh ngiât lĕm, hyôh kong prâi hơtôu rơtế ƀă tơdroăng hâk nâ kơ tơmối dêi kuăn pơlê ƀă túa lĕm tro akố cho mâu tơdroăng ki ‘măn chôu ăm á ôh tá kâi piu.

“Ngin châ tơdah tơpui tơno hâk tơngăm khât, ro drêng châ ối akố ƀă tâ môi tiah rơnó tôu mê há, tơdroăng ki ngin ôh ti hmâ khât xua rơpŏng ngin ối a Mih, hyôh kong prâi hngíu apoăng hơnăm nếo. Xua mê, ngin ro drêng châ trâm ki hơtôu a rơnó kố. A Mih, rêm ngế hmâ ôu kâ hên tâ, akố, tâ hlo tơdroăng tơrŭm tơkŭm ƀă ôu kâ hâk ro rơtế ƀă rơpŏng tâ cho mâu vâi pú ƀă ngế ki tơviah”.

Ƀă tơmối tung tơnêi têa, Dak Lak xuân cho tíu troh tung rôh apoăng vâ hlối tơrŭm ối pơtê, châ ôm hyô tung kong kế nhâ loăng têa ƀă tăng ‘nâi túa lĕm tro dêi mâu kơpong. Ngoh Nguyễn Ngọc Chân, ing Pơlê kong kân Hồ Chí Minh tối, mâu rôh lăm môi tiah kố pro ăm mâu vâi kuăn ngo ai tơ’nôm ki hlê plĕng ƀă châ ngăn khât ƀă mâ.

“Tung rôh apoăng hơnăm nếo mê péa ngế muăn tơxĭn châ pơtê hriâm, mê rơpŏng hngêi ngin lăm a Ƀuôn Ma Thuột cho tíu pêt kơphế hên má môi dêi Việt Nam, rơhêng vâ ăm péa ngế muăn lăm tăng ‘nâi ‘na túa lĕm tro, ‘nâi khôi túa lĕm tro dêi kong pơlê xuân môi tiah ‘na tơnêi tơníu, ăm prế muăn hlê kơpong Tây Nguyên kố gá môi tiah lâi”.

Tung túa lĕm tro dêi mơngế Rơđế, tơdroăng ki kâ mâu kế kâ chal krâ, ngăn vâi kơ’nhon xuăng, hơdruê ƀă trâm hlo mâu ngê̆ nhân hiăng pro pơxúa hơniâp ăm tơmối châ ngăn ôh tá kâi piu. Sap ing mâu tơdroăng ki kơnía hiăng ai hlâu, vâi krâ kuăn pơlê a mâu pơlê cheăm hiăng rế hía rế mơjiâng pro ôm hyô ngăn tung túa lĕm tro pơlê pơla.

Tiô pôa Y Nuel Niê, krâ pơlê ƀuôn Akŏ Dhông, mâu hơnăm achê kố, mơjiâng pro mâu túa tơrŭm hlối châ ngăn kong kế nhâ loăng têa tơbleăng tơ’nôm mâu kế tơmeăm ƀă tơdroăng cheăng vâ mơdêk ki rơkê tung tơdah tơmối.

"Mâu tơmeăm, malối cho ‘na mâu kế kâ ai hên tâ tâng vâ pơchông ƀă hơnăm 2026, mâu túa pơkâ pêi ki ê ‘na hơdruê xuăng xuân athế pơhlêh nếo hơniâp ro tâ. Tung pơlê ngin mê rêm khế kô ai rôh po hơdruê xuăng ăm tơmối ôm hyô ngăn tê kơtê”.

Ƀă mâu khu mơdró kâ ôm hyô a Dak Lak, mơjiâng pro ôm hyô tro ƀă kong kế nhâ loăng têa ƀă túa lĕm tro pơlê pơla cho troăng prôk krá ton. Jâ Nguyễn Thị Ngọc Anh, Kŏng ti tơlo liăn ôm hyô kong kế nhâ loăng têa pơlê pơla Akŏ Tam, bêng Tân Lập, ăm ‘nâi, ôm hyô kong kế nhâ loăng têa pơlê pơla ôh ti xê pro pơxúa ăm liăn châ xo, mê ối tơmiât troh rak vế kong prâi tơnêi tơníu, mơnhông tơdroăng ki hâk vâ pêi chiâk-păn mơnăn a kong pơlê:

“Xua kơpong ôm hyô kong kế, nhâ loăng, têa, túa lĕm tro pơlê pơla mê ngin tơkŭm ‘mêng pro tơnêi tơníu ăm gá lĕm, hbrâ mâu kơchâi plâi pôm sap ing păn, pêt vâ pế pơchên kế kâ. Xua ngin hbrâ rơnáu hdrối ƀă păn roăng pêt akố hlối mê tâi tâng mâu hâi leh, têt, yă tê châ ngin rak tơniăn ôh tá pơhlêh, xuân ôh tá xo tơ’nôm mâu kơxô̆ liăn ki lâi tâng vâ pơchông ƀă hâi ki tiah hmâ”.

Mơnhông túa lĕm tro pơlê pơla ƀă tơdroăng ki tơdrăng lĕm tung rôh châ ngăn châ hlo, ôm hyô Dak Lak dế rế hía rế châ râng chêng tơmối. Tung mâu hâi apoăng hơnăm nếo, cho idrâp chêng, túa kơ’nhon xuăng ƀă tơdroăng hâk nâ kơ tơmối dêi vâi krâ kuăn pơlê mâu pơlê hiăng chiâng tơdroăng ki tơ’mot tơmối ôm hyô kong pơlê.