Tiô Khu xiâm ngăn Túa lĕm tro, Tơ’noăng ivá ƀă Ôm hyô kong pơlê Lâm Đồng, tâi tâng kơxô̆ mơngế lăm ôm hyô, koi pơtê rôh kố châ dâng 650.000 ngế, tung mê tơmối kong têa ê dâng 30.000 ngế; kơxô̆ liăn châ xo ing ôm hyô riân châ dâng 1.200 rơtal liăn. Mơngế ối pơtê a mâu hngêi pơtê tâng riân châ 70-80%, krê mâu tíu koi pơtê ki lĕm sap 3-5 hơlŏng châ 85-90%.

Vâ ai tíu ăm tơmối koi pơtê kâ ôu tơniăn, kong pơlê Lâm Đồng hiăng tơbleăng tơdrêng tâi tâng mâu troăng hơlâ rak tơniăn krúa kế kâ, kring vế tơniăn pơlê pơla, tơniăn ‘na troăng prôk, pro krúa lĕm tíu ối, klông troăng, hyôh kong prâi, pêi tơniăn krúa kế kâ. Mâu tíu mơdró kâ ôm hyô pêi kơtăng tơdroăng pơkâ yă tê, thế tê tro yă, pôi tá ăm ai tơdroăng pro hjip yă ki ôh tá tơniăn, lơ lông tơdjâ, pro ôm hyô lĕm tro rơkê plĕng, hlối hmâ hlế kơ tơmối.

Đà Lạt pơtối cho tíu ki hên rơpŏng hngêi rah lăm troh. Ngoh Lê Văn Trọng tơmối lo ing kong pơlê Dak Lak tối:

 “Hlo mơngế a kố pâ hlế kơ tơmối ing tíu kâ koi troh ối pơtê ƀă mâu tíu ki lăm ngăn xuân châ tơbleăng mơhno tơpui ro. Drêng lăm troh ngăn a kơdrum reăng mê á ối tâ hlo ki lĕm tơviah dêi kong pơlê Lâm Đồng môi tiah nếo xông tơƀrê dêi tơnêi têa drêng mot tung hơnăm nếo 2026”.

Tung pơla mê, kơpong peăng mâ hâi lo kong pơlê Lâm Đồng xuân tối ai hên tơmối troh. Ngoh Nguyễn Thành Công, tơmối ôm hyô lo ing Pơlê kong kân Hồ Chí Minh ăm ‘nâi:

“Á hmâ rah Phan Thiết ƀă Mũi Né cho tíu lăm ngăn. Á lăm troh a Suối Tiên, Lâu Đài drôu vang, to rơxế jeep, to sub ƀă hên ki ê... ƀă mơdoh hâi chôu pơtê ối hêi. Rôh lăm ôm hyô apoăng hơnăm kố á  tâ lĕm ro châ ngăn hlo kong kế”.

Rôh kố, hên tơdroăng pêi pro ‘na mơhno ki lĕm tro - châ tơkŭm po môi tiah Countdown – Koh hơnăm nếo 2026 a Đà Lạt, Mũi Né ƀă kơpong Tây Lâm Đồng; tơdrêng ƀă mơđah hơdruê xuăng, leh mơdĭng a mâu kơpong, tíu ôm hyô. Malối, Lâm Đồng tơkŭm po koh tơdah hneăng tơƀai kơneăng ki apoăng dêi hơnăm 2026, tơdah dâng 200 tơmối, veăng tơbleăng um méa tíu ôm hyô tơniăn, hmâ lĕm.

Kơnôm hbrâ rơnáu nhên, ôm hyô Lâm Đồng rôh Tết Dương lịch 2026 hiăng ai tiô mơngế ki vâ lăm hyô ngăn, pơtê ối dêi tơmối. Ing tơdroăng ki pơxiâm mê, Lâm Đồng pơkâ tơdah kơpêng 25 rôh tơmối tung hơnăm 2026, mơhno ki lĕm tíu ôm hyô ki lĕm má môi tung lâp tơnêi têa.