Mâu hâi ki kố, a Hngêi ối tơkŭm vâi o khu hdrông kuăn ngo Têrêsa, ối a bêng Tân Lợi, Dak Lak, tơdroăng ki mơhriâm, pơtâp rêi prôa, tôu không, tôu chêng koăng tâng ro rih păng ‘nâng. Tung môi to kơbong ki tiah hmâ, idrâp klŏng put, idrâp prôa không chuât châk xơtó, rơtế chuât tơniâ vâ mơhno tơbleăng rơnó hơngui hiăng vâ chê troh. Mâu vâi pú hơnăm ối nếo mơngế Rơteăng dế kơhnâ khât tung tơdroăng mơhriâm, pơtâp mâu tơdroăng vâ mơđah ăm vâi krâ-nhŏng o ƀă tơmối tung mâu hâi apoăng lo hơnăm nếo.

Lo têa kơxô pêng lâp ếo, ngoh A Bảo, 23 hơnăm, lo ing pơlê Đăk Rơ Wa, bêng Kon Tum, kong pơlê Quảng Ngãi-nôkố dế pêi cheăng a Hngêi ăm kuăn ‘nĕng hdrông kuăn ngo Têrêsa, ai tối tiah kố:

“Mâu prôa, tơmeăm ki xah hêi tiô khôi hmâ kuăn ngo ôh tá păng lôi tung tơdroăng rêh kâ ối rêm hâi, ga trối cho hmê kơchâi kâ ăm tuăn i hiâm. Tung rêh ối athế ai prôa, ai tơdrá mê tơdroăng rêh ối ga kơ thăm rế ro tâ. Trối mâu rơxông jâ pôa pin roh nah ối tâ tá a kơnoh on vâ hmâng idrâp klŏng put, tơrưng ƀă mâu rơvŏng, prôa ki ê, rêi, tôu ăm dêi pó i tơmâng; nôu pâ têa klŏng put, tôu không vâ pơlông dêi kuăn ‘nĕng koi i hlâk, ăm tơdroăng rêh ối thăm rế hơniâp ro. Malối a mâu roh leh mơdĭng, rơnó hơngui hơnăm nếo, idrâp klŏng put, tơrưng chuât xơtó pơtroh tơdroăng ki hơniâp ro ăm vâi krâ-nhŏng o troh vâ tơmâng, mê cho tơdroăng ki hơniâp ro”.

Tối ‘na ngoh Karôly, 29 hơnăm, ối a ƀuôn Kon Hring, cheăm Čư̆ Mgar, kong pơlê Dak Lak ai tối, ing idrâp tơdrá prôa kố hiăng pro kuăn pơlê tơrŭm dêi pó, cho mơhúa, cho ki hơniâp ro dêi pơlê pơla drêng troh a rơnó po mơdĭng, rơnó hơngui troh. Xua ti mê,  mâu vâi o, vâi muăn a hngêi tơkŭm hdrông kuăn ngo mê đi đo hnê pơtâp vâ rak vế khôi túa, vêa vong dêi hdrông kuăn ngo, ôh tá xê to tơdroăng ki hâk git vâ kơ  mâu túa prôa, tơdrá dêi kuăn ngo, mê ối cho hnoăng cheăng ki pơtâp, mơhriâm vâ lăm troh mơđah ăm pơlê pơla, cheăm bêng:

“Á hâk git kơ mâu prôa, mâu tơmeăm xah hêi dêi hdrông kuăn ngo tơná pin. A rơnó hơngui, hâi leh, hâi Têt, ngin hmâ têa klŏng put, prôa không rơtế tôu ƀă chêng koăng, rơtế dêi pó rơngê ting ting, kơhnhon xuăng vâ rơtế ƀă vâi krâ-nhŏng o, mâu tơmối ki lăm pôu, lăm troh. Kố xuân cho roh ki vâ tơdjuôm môi i hiâm môi mơno, mơjo pâ, tơrŭm tâ nếo tung pơlê cheăm. Drêng tôu mâu prôa, mâu tơmeăm xah ôm hêi kố, tung i hiâm mơno á tâ hơniâp ro, sôk suâ hên tâ, maluâ tung mâu hâi lo hơnăm nếo, rơnó hơngui, hâi têt châ trâm nôu pâ, jâ pôa, ngoh nâ o, pú hmâ; á têa klŏng put kố cho vâ rêm ngế rơtế kơhnhon xuăng, tơdrêng mê, tơdroăng ro thăm rế ro tâ”.

Ƀă ngoh A Tùng, 29 hơnăm, xuân ối a Ƀuôn Hring tối, tơdroăng ki hâk vâ, mơnê nhuô̆m mâu prôa, mâu tơdrá kuăn ngo cho hnoăng cheăng ki pơkal athế châ pơtối rak  vế khôi túa, vêa vong dêi nôu pâ, jâ nôa roh chal krâ nah troh nốkố:

“Klŏng put, prôa không ga cho tơmeăm xah hêi ki kal tung tơdroăng rêh ối, ‘na tuăn mơno dêi hdrông kuăn ngo Rơteăng ƀă mâu hdrông kuăn ngo ki ê. Mâu prôa, mâu tơmeăm xah hêi ki kố xuân kal trối chêng koăng ha, cho tơmeăm ki kal athế pơtối châ rak vế tơmeăm khoăng, túa lĕm tro dêi kuăn ngo. Chal vâi krâ roh nah, tung mâu hâi lo hơnăm nếo, a mâu hâi leh mơdĭng, trối tĭng kâ báu nếo, hâi tê, ôh ta păng lôi idrâp dêi klŏng put, idrâp chêng koăng rơtế tơmot tung tơdroăng rơngê, ting ting, pro ăm hâi hơnăm nếo, hâi mơdĭng, hâi têt thăm rế hơniâp ro, sôk suâ ƀă veăng gum rak vế khôi túa lĕm tro tiô khôi hmâ dêi mơngế Rơteăng”.

Tơdroăng ki hâk git, kơhnâ mơ-eăm mơhriâm dêi mâu vâi ngoh A Bảo, Karôly lơ A Tùng ôh tá xê to veăng lăm mơđah ăm vâi krâ-nhŏng o ai mâu tơdroăng ki kro mơdrŏng ‘na túa lĕm tro, mê ối pơtroh tơdroăng ki lân rơdâ ki hâk mơnâ tung pơlê pơla. Ngoh Pâ Đoan, mơngế ối tung Buôn Hring, hiăng hên hdroh châ ngăn, châ hlo mâu vâi o hmâ lăm mơđah a pơlê tung mâu roh leh, mâu hâi mơdĭng, phoih ƀriê tung i hiâm mơno:

“Mâu vâi o, vâi muăn akố rơkê ‘nâng, ‘nâi tôu, ‘nâi rêi mâu khu prôa dêi kuăn ngo, ‘nâi rak vế tơdrá, idrâp chuât ki krê dêi kuăn ngo. Xua vâi o mê hâk git khât ƀă tơmeăm khoăng xah hêi dêi vâi krâ roh nah, mê vâi o mơhriâm rĕng chiâng, vâi o ối lăm mơđah a hên tíu, vâi krâ-nhŏng o tung pơlê bô bố ta hâk nâ, phiu niu”.

Ôh ta xê to tung  tơdroăng rêh ối rêm hâi, a mâu roh leh mơdĭng, mâu hâi tĭng ki kal, trối Tĭng kâ báu nếo, idrâp prôa, idrâp ki chuât ing phêa, kơlá dêi mâu vâi o, vâi muăn ki ối a Hngêi ối tơkŭm vâi o khu hdrông kuăn ngo Têrêsa ki mơđah mê hiăng chiâng tơdroăng ki hơniâp ro, sôk suâ, ing mê, veăng pơtroh tơdroăng ki hơniâp ro ƀă mơhno tối ki tơrŭm ăm pơlê pơla, cheăm bêng. Pôa A Vi Voan, Kăn thôn Kon Hring, cheăm Čư Mgar, kong pơlê Dak Lak tối:

“Mâu vâi o, vâi muăn akố hơnăm ối nếo la ‘nâi hâk git, vâ khât, rak vế khôi túa lĕm tro dêi hdrông kuăn ngo tơná, ‘nâi rơkê rêi, tôu khu prôa, chêng koăng, prôa không, têa klŏng put, rêi têng nêng ƀă hên mâu tơmeăm ki ê. Pơlê pơla ngin hâk tơngăm ‘nâng xua ai khu rơxông hơnăm ối nếo ‘nâi mơnhông khôi túa lĕm tro dêi pâ pôa”.

Ing mâu roh ki mơhriâm pơtâp kơhnâ khât a Hngêi ối tơkŭm vâi o khu hdrông kuăn ngo Têrêsa ta troh a mâu roh lăm mơđah hơniâp ro a mâu hâi leh mơdĭng dêi pơlê pơla, mâu vâi o, vâi muăn hơnăm ối nếo mơngế Rơteăng dế pơtối rak vế hiâm mơno ki hâk git dêi khôi túa, lĕm tro hdrông kuăn ngo ăm rơxông pơtối ah nếo. Mê cho tơdroăng pói vâ, pôu râng hnoăng cheăng cho i hiâm mơno ki vâ rak vế idrâp klŏng put, prôa không, têng nêng, chêng koăng ƀă hên mâu tơmeăm xah hêi ki ê đi đo châ chhâk hơngế, vâ khôi túa, vêa vong lĕm tro dêi Rơteăng pơtối châ rêh ối krá tơniăn tiô hâi khế hơnăm.