Kong prâi hngíu ki phá tơ-ê, kơpong kân rơdâ ƀă kong ngo Măng Deang lĕm mơnâ mâ ngăn ƀă eăng tung dế kơpong kân rơdâ kong kế ngiât lĕm. Kong prâi hngíu lĕm, rế thăm pro eăng mơngiơk reăng tơpo, mơjiâng tíu leh tơbleăng hơtô, pêng păm tơdroăng ki tâ rơrêk tung hiâm mơno sap ing mâu hâi apoăng hơnăm nếo.

Măng Deang sap ing nah châ pơto pơtih môi tiah ‘’kong plêng ngiât’’, tíu tơnêi kong plêng trâm dêi pó, ki hiâm dêi kong krâ rơtế tơdroăng rêh ối tơniăn lĕm hơniâp ro. Hơnăm 2025, Măng Deang pơtối mơnhên tíu cheăng cho môi tung mâu tíu troh ki má môi dêi Việt Nam drêng tơdah vâ chê 2 rơtuh roh tơmối, tung tâi tâng kơxô̆ dâng 5 rơtuh roh tơmối troh Quảng Ngãi, veăng gum kal tung tâi tâng pêi lo liăn ôm hyô lối 3.700 rơtal liăn dêi lâp kong pơlê.

A leh pơxiâm po Măng tĭng Mơhno khôi túa lĕm tro – Ôm hyô Măng Deang 2026, jâ Y Ngọc, Phŏ Kăn hnê ngăn hnê mơhno má môi Vi ƀan kong pơlê Quảng Ngãi, tối ăm ‘nâi, kong pơlê tơkêa kêi đeăng, pro tơniăn tíu mơ’no liăn cheăng ôm hyô; xúa châ tơƀrê kơxô̆ liăn, khŏm mơ-eăm mơjiâng Măng Deang chiâng tíu troh ôm hyô ngăn loăng pơlái kong kế, pơtê ki lĕm hôm má môi, mơnhông mơdêk krá tơniăn, tơxâng râ cho hmốu kơnía dêi kơpong ƀă lâp plâi tơnêi:

‘’Măng Deang hâi kố ôh tá xê to môi tíu troh ki krê xêh mê hiăng chiâng tíu tơdjêp, tơkŭm tung tơdroăng tơdjêp Kong – Têa kơxĭ dêi kong pơlê Quảng Ngãi nếo. Tơdjêp ki hngíu dêi kơpong kân rơdâ Măng Deang ƀă khía pê ôh tá xêa dêi têa kơxĭ rơlố Lý Sơn, Mỹ Khê; tơdjêp tíu mơhno khôi túa lĕm tro chêng koăng tơdroăng ki ai khât ƀă mâu tơmeăm kơnía khôi túa lĕm Sa Huỳnh’’.

Tơdroăng ngê̆ thuât châ pro rơkê, klâ chiâng 3 tơdroăng: ‘’Tíu kong plêng tơnêi tơkoh’’, ‘’Mơngiơk kơpong kân rơdâ’’ ƀă ‘’Mơjo pâ kơpong ki pốu’’. Mâu tơdroăng rơhdruê xuăng ki má môi mơtiah: Truyền thuyết Măng Đen, Sắc đào Măng Đen, Tình ca Măng Đen, Đêm hội cồng chiêng, Ngọn lửa cao nguyên…  Vêh mơhno ai ti lâi mơhno ti mê ki lĕm dêi kong kế, khôi túa lĕm ƀă kuăn mơngế Măng Deang, djâ troh ăm tơmối môi troăng ki tâ rơrêk tung hiâm mơno pêng păm tơdroăng kân rơdâ.

Pôa Dương Tấn Nhựt, kuăn pơlê kơpong cheăng kâ Lý Sơn, kong pơlê Quảng Ngãi troh ôm hyô a Măng Deang, tâ:

‘’Roh leh, Têt dêi hơnăm nếo, á hlo tơdroăng rơhdruê xuăng á hâk vâ ‘nâng, phiu ro ‘nâng. Ing mê troh lâp lu, gum mơdêk khôi túa lĕm, ôm hyô dêi kong pơlê Quảng Ngãi. Quảng Ngãi ƀă Kon Tum nếo tơmot chiâng môi, xua mê kuăn pơlê xuân tơ’lêi vâ châ hriâm a dêi pó, trâm mâ mơhno khôi túa lĕm pơla péa kơpong Peăng mâ hâi Lo ƀă Peăng mâ hâi Luô dêi kong pơlê Quảng Ngãi’’.

Măng tĭng Khôi túa lĕm tro – Ôm hyô Măng Deang 2026 ƀă hên tơdroăng po hên hĭn mơtiah: Leh hô̆i ping pŏng, todroăng ngê̆ thuât ‘’Măng Deang hâi nếo’’, kơchơ mơđah tơbleăng kế kâ OCOP, roh kơchơ tơmeăm pêi lo ing chiâk deăng ƀă loăng pơkeăng, mâu tơdroăng tơ’noăng ivá – châ tâ châ hlo kong kế ƀă mâu tour ôm hyô ngăn loăng pơlái kong kế, djâ troh ăm tơmối mâu tơdroăng châ tâ châ hlo ki má môi, pá kâi hiât a kơpong tơnêi kơpong kân rơdâ Măng Deang.