Pôi tá kơdrâ tung tơdroăng rak tơniăn ‘na tâ phĭu rah xo kăn a Dak Lak
Thứ sáu, 10:00, 09/01/2026
Tơplôu: Gương/VOV Tây Nguyên
Tơplôu: Gương/VOV Tây Nguyên
VOV.Xơ Đăng - Hâi lơ 8/1, Khu kăn séa ngăn, tăng ngăn dêi Tiểu ban pro tơniăn pơlê pơla - Hô̆i đong Tâ phĭu xah xo kăn têi tơnêi têa hiăng pêi cheăng ƀă Ƀơrô Kăn sát cơ động, Kŏng an kong pơlê Dak Lak ƀă Tiêuh đoân 303, Trung đoân 584, Khu xiâm pơkuâ ngăn lêng kong pơlê ‘na tơdroăng cheăng hbrâ tơplâ, tơniăn tung rôh tâ phĭu rah xo kăn Kuô̆k hô̆i hneăng 16 ƀă mâu kăn Hô̆i đong kuăn pơlê rêm râ hneăng 2026-2031.
A rôh pêi cheăng, Kăn hnê ngăn Ƀơrô Kăn sát cơ động ƀă Tiêuh đoân 303 ăm ‘nâi, mâu tíu pêi cheăng hiăng hbrâ mơjiâng tŭm pơkâ, troăng hơlâ, tơkŭm xing xoăng mâu ngế pêi cheăng hbrâ tơplâ tro tiô hnê mơhno dêi râ kơpêng, tơniăn pơkâ, tíu ki kal, hbrâ rơnáu vâ teăm ‘mâi rơnêu tơleăng mơnhên mâu tơdroăng nếo ai.
Trung tướng Trần Đức Thuận, Phŏ pơkuâ Vi ƀan ‘na lêng kring tơniăn hlối Tơpui kâ dêi Kuô̆k hô̆i tối, khế kơdeăn mâu ki ‘nâi hnoăng cheăng tơná, hbrâ rơnáu, pêi tro tiô pơkâ dêi mâu tíu pêi cheăng tung hbrâ ƀă tơbleăng tơdroăng cheăng tơniăn, pơxúa ăm tơdroăng tâ phĭu.
Viết bình luận