A rôh hôp, pôa Phạm Minh Chính, Ngế pro xiâm hnê ngăn tơnêi têa tối nhên: tơdroăng cheăng mơnhông cheăng kâ rêh ối pơlê pơla hơnăm 2025 ƀă  pơla hơnăm 2021-2025 tung pơla lâp plâi tơnêi ai hên tơdroăng hơ’lêh rĕng, rơ-iô, hên tơdroăng hâi chói hlo, luâ tơdroăng tối hdrối. A tung tơnêi têa, cheăng kâ dế tung pơla hơ’lêh, thế mơdoh hên ivá, hâi khế xing xoăng ngăn nếo “Tơnêi têa’’ tá tíu xiâm ƀă kong pơlê; kong prâi pro ôh tá tơniăn, khía mơhot kân têa lân lu ó pro pá ăm tơdroăng mơjiâng tơmeăm tê mơdró ƀă tơdroăng rêh ối dêi kuăn pơlê.

Mơhé ti mê mâu hnoăng ki mê, tơdroăng ăm hlo ki kal châ tối tơƀrê a tâi tâng kơvâ cheăng. Hơnăm 2025 Việt Nam pêi châ tâk 8,02%, tung khu mâu kong têa tâk hên dêi kơpong, lâp plâi tơnêi, hlối rak ki tơniăn cheăng kâ kân, séa ngăn liăn ôh tá kơnâ yă; tơniăn pơlê pơla, rêh ối kuăn pơlê châ tơniăn; cheăng lêng kring tơniăn châ ‘mâi mơnhông, mơdêk; tơpui kâ, tơrŭm cheăng ƀă lâp plâi tơnêi châ mơdêk; loi nhoăm, ki rơdêi tơnêi têa pơtối châ mơdêk.

Pê klêi mâu pơkâ tah hngêi pơtân, hngêi xi kơchoh. Mơjiâng hên 100 to hngêi trung râ má môi ƀă râ má péa a mâu cheăm tơkăng kong. Tiô khu lâp kong têa, kơxô̆ hơniâp dêi Việt Nam hơnăm 2025 ối má 46, tâk 37 râ tâng pơchông ƀă hơnăm 2020. Tơbleăng kơtăng, pêi tơƀrê tơdroăng xing xoăng, pro rế lĕm mâu kăn cheăng tung Chin phuh ƀă khu pêi cheăng mâu kăn kong pơlê 2 râ rơtế ƀă mơdêk xoăng râ, xoăng hnoăng pêi cheăng.

Hneăng hôp pơkâ 10 khu tơdroăng cheăng, troăng hơlâ ki kal  ki xiâm mơnhông cheăng kâ - pơlê pơla 2026 ƀă mâu hơnăm pơtối, pơtối hơ’lêh nếo tuăn tơmiât tơbleăng pêi kơtăng, ai pơxúa pơkâ hneăng hôp kân má 14 dêi Đảng, mâu tơdroăng pêi pro dêi Chin phuh.