Tơdroăng mơdât mơngế ƀă rơxế prôk lăm châ pêi pro ƀă kơpong ing chêng văng Prenn troh hdrối Kơpong ôm hyô xí Datanla, ối tung bêng Xuân Hương – Đà Lạt. Kố cho kơpong ai tro tơhnâp râ ó tá kơnâng péa pâ troăng tung roh kong mêi sap nah tá chói ai tung dế khế 11 hơnăm nah. Pơkâ pơtê ăm prôk troăng kân a văng Prenn vâ po rơdâ pêi pro tơdroăng rơnêu tíu tơhnâp a Km224 + 650.

Tung pơla 6 hâi, kuăn pơlê ƀă rơxế mot lo a tíu xiâm Đà Lạt châ pơchân tối prôk tơkâ hluâ văng Mimosa – Troăng kân tơnêi têa 20 lơ troăng kân văng Sacom Tuyền Lâm. Hdrối mê, kong pơlê Lâm Đồng hiăng tơbleăng tơdroăng ki tơ’nhê ‘na kong prâi ƀă troăng kân văng Prenn. Tiô pơkâ pêi, tơdroăng rơnêu mâu tíu ki tơhnâp ki ê nếo a văng Prenn kô kêi đeăng ăm rơxế prôk lăm hdrối Têt Lo hơnăm nếo Bính Ngọ 2026.