Hneăng hôp hiăng môi tuăn tơbleăng 145 ngế lo tơbriât pro kăn Kuô̆k hô̆i pơkuâ cheăng hneăng 16 a Tíu xiâm. Tơbleăng mơgêi a rôh hôp, pôa Trần Thanh Mẫn, Kăn xiâm hnê ngăn Kuô̆k hô̆i  pơcháu ăm khu kăn Vi ƀan cheăng ngăn ‘na mâu kăn tơrŭm pêi cheăng ƀă mâu kơ koan pơtối mơnhên hồ sơ, pro klêi hlá mơ-éa tơbleăng dêi Vi ƀan pơkuâ cheăng Kuô̆k hô̆i ‘na inâi mơngế châ tơbleăng vâ tơbriât pro kăn Kuô̆k hô̆i pêi cheăng hneăng 16 a Tíu xiâm ƀă tơbleăng troh mâu kơ koan, mâu ngế vâ tơmâng xo tơdroăng hnê tối dêi kuăn pơlê a a tíu pêi cheăng ƀă tơbleăng pro hồ sơ rah xo kăn hnê ngăn Kuô̆k hô̆i pơkuâ hneăng 16 a Tíu xiâm tơniăn tro tiô pơkâ dêi Luât; pê klêi Pơkâ pôk ngế kum cheăng ăm Phŏ kăn hnê ngăn Kuô̆k hô̆i.

Kăn hnê ngăn Kuô̆k hô̆i hnê mơhno ăm Ƀơrô Kuô̆k hô̆i Vi ƀan pêi cheăng dêi mâu kăn tơkŭm Hôp tơmâng xo tơdroăng kuăn pơlê hnê tối a tíu pêi cheăng ƀă mâu ngế ki châ rah xo vâ lo tơbriât dế pêi cheăng a mâu kơ koan dêi Kuô̆k hô̆i.