Kơxô̆ ki kố châ tối a rôh hôp mơgêi cheăng hơnăm 2025, tơbleăng cheăng pêi hơnăm 2026 dêi kơvâ Túa lĕm tro, Tơ’noăng ivá ƀă Ôm hyô kong pơlê Dak Lak. Ôm hyô Dak Lak ai hvêa prôk pơhlêh rơdêi ƀă tâi tâng kơxô̆ liăn châ xo hơnăm 2025 tiô riân lối 13.600 rơtal liăn, luâ lối 8% túa pơcháu. Tâi tâng rôh ngế tơmối châ lối 7,3 rơtuh ngế, tâk lối 16% tâng pơchông ƀă túa pơcháu.

Tung lâp kong pơlê nôkố ai 782 tíu ối pơtê, tâk 34 tíu tâng vâ pơchông ƀă hơnăm 2024, pro ivá vâ ôm hyô rế hía rế chiâng kơvâ cheăng ki xiâm dêi kong pơlê. Hơnăm 2026, kong pơlê Dak Lak mơnhên pơtối mơdêk hnoăng cheăng dêi túa lĕm tro tung mơjiâng kuăn mơngế ƀă kong prâi rơdêi lĕm; tơkŭm hbrâ rơnáu mâu tơdroăng tơkŭm po Hneăng hôp Tơ’noăng ivá rêm râ; tơbleăng pêi tơƀrê Hơnăm ôm hyô kong pơlê Dak Lak, ing mê, pro ivá ăm mơnhông cheăng kâ ƀă mơnhông krá tơniăn tung hneăng ki nếo.