Mâu hâi ki kố, a kŏng trương mơjiâng hngêi nếo thôn Phú Phong, cheăm Hoà Thịnh, tơdroăng pêi cheăng tơkŭm po thâ sap ing kơxo má troh kơmăng. Rêm mô đô̆i têa kơxôu kơchoh ếo, tơhrâi ‘măn rêm pŭm găch, hơ’lâk prêi xơmong, thâ mơjiâng hngêi gum Kuăn pơlê. Hạ sĩ Thái Tiến Tài, Tiêuh đoân 35, Lưh đoân Đăk kŏng 198 tối ăm ‘nâi, rêm hâi ngăn mâu toăng hngêi chôa ‘lâng hiăng vâ kêi, nhŏng o tung đông kơbố xuân phiu ro:

‘’Á tâ hlo hâk tơngăm xua châ veăng Tơdroăng pro hngêi gum kuăn pơlê kơpong têa lân lu akố. Drêng chu akố, ngăn tơdroăng rêh ối kuăn pơlê pá puât, mâu toăng hngêi tơhnâp tâi môi tiah kố. Tá tui lui, ngăn tơdroăng ki châ tơƀrê môi tiah kố, á tâ phiu ro, hâk tơngăm ‘nâng’’.

Ƀă kuăn pơlê thôn Phú  Phong, cheăm Hoà Thịnh, tơdroăng ai mâ dêi mô đô̆i mâu hâi hiăng hluâ cho tíu hgiên hiâm mơno kân khât. Jâ Nguyễn Thị Tám (80 hơnăm), rơrêk tung hiâm mơno xua pơla kố nah rêh ối tung hngêi ki tro tơ’nhê, mê kố hiăng hbrâ mot hngêi nếo:

“Drêng nếo tro têa lân lu ngăn hơ-ui ‘nâng, ôh tá ‘nâi tơmiêt ti lâi mê á châ ai toăng hngêi nếo môi tiah kố ôh. Mê nôkố ai hngêi môi tiah kố cho lĕm ‘nâng, châ hngêi lĕm ki Mô đô̆i mơjiâng pro rĕng, kơhnâ pêi pro, rah khu hngêi, mơngiơk kố xuân lĕm. Nôkố kơbố troh lăm pôu xuân kheăn kơdeăn tâi tâng’’.

Tơdrêng hnê mơhno a tíu mơjiâng pro tơmeăm, Thiê̆u tă Nguyễn Văn Vượng, Tiêuh đoân 35, Lưh đoân Đăk kŏng 198 tối ăm ‘nâi, kơpong đông pơkuâ pro ai mêi ton châ khế. Tơdrêng amê, troăng prôk kŭn, pá vâ pơto prếi, xơmong, gât, meăm. Ai kơtâu kŭn ối tơdế klâng kân rơdâ, troăng kân ôh tá châ vâ prôk lăm a dêi pó, mô đô̆i thế prôk tơkâ hluâ trâp, xui rêm kơxâk xơmong, rêm pŭm gât vâ meăn mơjiâng pro. Laga ƀă hiâm mơno khŏm mơ-eăm, mơhé kong măng, tơkâ hluâ pá puât, kăn ƀô̆, mô đô̆i hiăng ƀeăn ƀĕng xing xoăng chôu, hbrâ rêm kong prâi lĕm tơ’lêi hlâu vâ mơjiâng pro rĕng.

‘’Tung tơdroăng gum kuăn pơlê a kố mê ngin mơnhông tâi tâng hiâm mơno pôu râng hnoăng cheăng, ôh tá xâu kơmăng, kong tô, kong prâi akố mê tô mêi ôh tá tơniăn. Laga ƀă hiâm mơno khŏm mơ-eăm, kăn ƀô̆, mô đô̆i ngin tơrŭm môi tuăn, hâk vâ dêi pó, tối dêi pó tung tơdroăng pêi pro hnoăng cheăng ƀă kêi đeăng lĕm tro hnoăng tung môi pơla’’.

Troh nôkố, “Cheăng pêi thâ Quang Trung’’ mơjiâng hngêi ăm kuăn pơlê kơpong têa lân lu Dak Lak dế mot tung hneăng mơ’nui. Ƀă Lưh đoân Đăk kŏng 198, hiăng ai 5 hngêi kêi đeăng. Mâu toăng hngêi kêi đeăng. Mâu toăng hngêi ki ê kô châ pơcháu tung to lâi hâi la ngiâ, hdrối tơdroăng pơkâ thế klêi lơ 15/1/2026 ki Ngế pro xiâm hnê ngăn Chin phuh pơcháu.

Rơtế ƀă mê, vâ gum kuăn pơlê rĕng tơniăn tơdroăng rêh ối, tíu cheăng hiăng hbrâ cho tŭm mâu tơmeăm kal xúa tung hngêi môi tiah tơvi, kơƀăng tăng, xoăng  koi, hdro, kơ’lo ô têa, mŏng mơngeăn, pơkhom kơmung, tơmeăm ki kal xúa rêm hâi vâ diâp ăm rêm rơpŏng drêng mot ối hngêi nếo. Thươ̆ng tă Phạm Sỹ Cương, Phŏ Chính ŭy Lưh đoân Đăk kŏng 198 tối ăm ‘nâi:

“Ngin mơ-eăm sap ing apoăng cho kô tơkâ hluâ tơdroăng mơjiâng pro klêi hdrối hâi khế pơkâ, tâi tâng mâu toăng hngêi ngin mơjiâng mê troh hâi lơ 9/1 kô kêi đeăng, pơcháu ăm kuăn pơlê. Ing mê, gum kuăn pơlê ai môi Têt Bính Ngọ cho phiu ro, tơkŭm dêi pó”.

Têt Lo hơnăm nếo 2026 hiăng vâ chê troh, thôn Phú Phong, cheăm Hòa Thịnh, kong pơlê Dak Lak dế chôa ‘lâng sâp a chê môi ngiâ méa nếo. A ƀăng tơnêi hên hĭn to tơmeăm tơ’nhê tơ’nhĕng klêi kơ’nâi têa lân lu mơ’nui khế 11 hơnăm 2025, mâu toăng hngêi krá kâk kân rơdâ hiăng ƀă dế kêi đeăng. Amê, ai tơdroăng ki tơbâ vế lĕm mâu ngế mô đô̆i đăk kông 198, dế mơ-eăm rêm chô vâ Kuăn pơlê rĕng tơniăn tơdroăng rêh ối.

Mâu toăng hngêi nếo ôh tá xê to châ mơdâng pro ƀă gât hmốu, xơmong, mê ối châ mơjiâng ƀă têa kơxôu, tơdroăng ki pơxâu tâng pro xôi ƀă tuăn pâ trâu hơngế dêi mô đô̆i ƀă kuăn pơlê. Tơdroăng Lưh đoân Đăk kŏng a’nâi 198 (Binh chủng Đăk kŏng – Khu xiâm pơkuâ mô đô̆i) mơ-eăm ‘na kêi đeăng rĕng “Cheăng pêi thâ Quang Trung” tơ’nôm môi xôh mơnhên hiâm mơno ki lĕm dêi Mô đô̆i Pôa Hồ - đi đo ai mâ drêng kuăn pơlê kal, hbrâ tơkâ hluâ pá puât xua tơdroăng rêh ối tơniăn lĕm dêi kuăn pơlê.