Klêi kơ’nâi 18 hâi ƀă tơdroăng tŏng gum hên dêi mâu khu cheăng, troh nôkố toăng hngêi tung “tơdroăng pro hngêi Quang Trung” hiăng kêi đeăng ƀă pơcháu ăm jâ Nguyễn Thị Sáng (thôn Phú Thành, bêng Hàm Thẳng). A leh phiu ro hiăng mơjiâng pro kêi đeăng, teăng mâ Khu tơkŭm po hiăng diâp kơƀăng chêh chư phiu ro hiăng mơjiâng pro klêi hngêi ối ăm jâ Sáng, rơtế ƀă mê, hên tíu cheăng diâp tơ’nôm tơmeăm xúa tung rơpŏng.

Kong pơlê Lâm Đồng cho môi tung mâu chiu tơdjâp râ ó xua kong mêi kân ôh tá ‘nâi hdrối, hiăng pro tro lŭp ‘na kế tơmeăm khoăng, hên rơpŏng hía hngêi ối, tơdroăng rêh ối chiâng ôh tá tơniăn. Ing hnê mơhno dêi Ngế xiâm Kŏng an, khu kŏng an hiăng rĕng pơtroh mơngế, tơrŭm ƀă cheăm, bêng tŏng gum kuăn pơlê rơnêu kế tơmeăm khoăng.

Tung la ngiâ, kŏng an kong pơlê kô pơtối tơkŭm mơhnhôk khu vâ kêi đeăng tơkâ hluâ tơdroăng ki pro mâu toăng hngêi tung pơlê, mơ-eăm kêi đeăng hdrối hâi lơ 15/1.