Pêi pro ‘’Cheăng pêi thâ Quang Trung’’, Kuân khu 5 hiăng mơhnhôk tâi tâng mơngế, tŏng gum mơjiâng 610 toăng hngêi nếo ƀă rơnêu 314 toăng hngêi tro tơ’nhê râ tung lâp kơpong lêng ối. Krê a kong pơlê Dak Lak, 331 toăng hngêi hiăng châ pro nếo, tung mê 96 toăng kêi đeăng rĕng ƀă pơcháu tung roh 1 kố.

Xông tơpui a roh leh, Trung tươ̆ng Lê Ngọc Hải – Kăn pơkuâ Kuân khu 5 tối ăm ‘nâi, pêi pro “Cheăng pêi thâ Quang Trung’’, mô đô̆i hiăng vêh ƀă kuăn pơlê rĕng má môi, mơdâng hngêi rĕng má môi, vâ kuăn pơlê rêh ối, tơniăn tơdroăng rêh ối, tơdah Têt tŭm, hơtô tâ. Mâu toăng hngêi nếo ôh tá xê to tíu ối, mê ối cho tíu ki hgiên hiâm mơno, tơ’nôm tơdroăng loi tơngah vâ kuăn pơlê tơkâ hluâ pá puât, vêh mơjiâng tơdroăng rêh ối klêi kơ’nâi kong prâi pro ôh tá tơniăn.

A Khánh Hòa, rôh pơcháu hngêi drêng kố ai 6 rơpŏng dêi bêng Đô Vinh, cheăm Phước Hậu ƀă cheăm Tây Khánh Sơn. Vâ mâu hngêi châ pro klêi tiô tơdroăng, tơniăn lĕm, Khu xiâm pơkuâ ngăn lêng Kuân khu 5 hiăng hnê ăm Khu xiâm pơkuâ ngăn lêng kong pơlê Khánh Hòa tơrŭm krá ƀă 4 kơpong lêng tuk mâu lữ đoân Đặc công  tơnêi têa 5 ƀă mâu lêng kuăn pơlê dêi kong pơlê, mơ-eăm tơkâ luâ xơpá xua kong tô mêi hmâng vâ, tơkŭm pro plâ hâi măng, pro tá hâi pơtê.

Tung mê, Khu xiâm pơkuâ ngăn lêng kong pơlê Khánh Hòa, kơpong 4 lêng tuk ƀă Lữ đoàn Đặc công tơnêi têa 5 rêm tíu pêi cheăng ki mơjiâng pro ai veăng pro 2 toăng hngêi. Tơbleăng a hâi leh pơcháu, Thiếu tướng Trần Thanh Hải,  Phŏ Ngế pơkuâ ngăn lêng Kuân khu 5, tối “Cheăng pêi thâ Quang Trung” cho mơhno ki tro ing tuăn ‘nâi hơ-ui pâ dêi rơpó, ing hiâm mơno lĕm dêi mơngế Việt Nam drêng trâm pá; mơhno nhên troăng hơlâ pêi pro “A lâi ai kuăn pơlê trâm pá, a mê ai mố đô̆i”.