Tiô pơkâ, 9 to kuât tiô túa lĕm tro châ ‘no liăn pro tâi tâng kơxô̆ liăn 20 rơtal liăn. Rêm to kuât rơdâ dâng 130m2, xŏn ngi ‘ngêi 17m. mâu kuât mê pro tro tiô túa ton nah dêi, hlối tơtro ƀă khôi túa, vêa vong dêi mâu hdroâng kuăn ngo kơpong tơkăng kong Gia Lai ƀă Quảng Ngãi. Tiô tối hdrối, tâi tâng 9 tơmeăm khoăng mê kô pro klêi ƀă am xúa tung khế 9/2026.

Tối tơbleăng a hâi leh pơxiâm pro, Thượng tướng Trương Thiên Tô, Ngế pơkuâ Khu xiâm Kal kí Mâu lêng kuăn pơlê Việt Nam ăm ‘nâi: Tơdroăng ‘no liăn pro kuât túa lĕm tro a mâu cheăm tíu tơkăng kong Tây Nguyên mơhno ki tơmâng khât dêi Đảng, Tơnêi têa dêi mâu lêng ƀă kuăn pơlê kuăn ngo, vâ ‘mâi mơnhông ki tơrŭm môi tuăn tâi tâng kuăn pơlê, mơjiâng krá kak “hiâm tuăn chân krá dêi kuăn pơlê”, rơtế ƀă tơdroăng rak tơniăn kal kí, đông lêng tơkăng kong – vế kring tơniăn pơlê cheăm. Thượng tướng Trương Thiên Thiên Tô pơkâ thế:

 “Tung la ngiâ, pâ thế mâu kơ koan, đông lêng, tíu pêi cheăng, cheăm bêng tơrŭm krá, tơkŭm tơbleăng pêi pro vâ rĕng pê klêi tro tiô tơdroăng pơkâ, pơtối rak ki tơƀrê xúa, ai tiô púi vâ tơkŭm hôp, tơkŭm po leh dêi kuăn pơlê; tơkŭm tơbleăng pro tro tiô troăng hơlâ, tơniăn tơƀrê cho pơkâ má môi ƀă tơniăn khât, ôh tá pro rĕng vâ rĕng kêi tro tiô pơkâ, pro rĕng la thế krá lĕm”.

Tung tơdroăng rêh ối túa lĕm tro Tây Nguyên, kuât cho tíu kuăn pơlê tơkŭm hêi, tíu tơkŭm po mơdĭng, tơkŭm hôp ƀă hnê rak vế ‘na luât tiô túa dêi ton nah dêi pơlê. La nốkố, a hên cheăm tíu tơkăng kong, kuât hiăng tơ’nhiê ki ‘nâ hâi ‘no liăn pro lĕm tơdâng, hâi pro ai tíu púi vâ tơkŭm tung mâu hâi po mơdĭng tiô túa lĕm tro ton nah dêi kuăn pơlê. Tơdroăng mâu đông lêng tíu pêi cheăng dêi Khu xiâm pơkuâ ngăn lêng pro ăm 9 to kuât túa lĕm tro kô pro hlâu vâ kuăn pơlê kơpong tơkăng kong peăng Kơnhŏng mâ hâi lu Tây Nguyên châ tơkŭm po hôp, po leh, mơdĭng krip ro, krá tâ.

Teăng mâ Đảng ủy, Khu xiâm pơkuâ ngăn lêng dêi Binh đoân 15, Thiê̆u tươ̆ng Hoàng Văn Sỹ- Pơkuâ lêng dêi Binh đoàn tối:

“Kố ôh ti xê to pơxiâm pro tơmeăm khoăng ki vâ pro pơxúa tơkŭm hôp tơdjuôm dêi pơlê mê ối mơhno hnoăng cheăng pêi nhên, ton hơnăm dêi mâu lêng tung tơdroăng rơtế ƀă kuăn pơlê. Ing mê tơrŭm krá môi tuăn rơtế hmâ pơla kăn ƀô̆ mâu lêng tâi tâng mâu lêng ƀă kuăn pơlê mâu hdroâng kuăn ngo. Binh đoân 15 tơhrâ kô tơrŭm krá khât ƀă mâu lêng, mâu râ ủy, mâu kăn tơbleăng pêi tơƀrê mâu tơdroăng cheăng pêi, ki hdrối cho pro 9 to kuât vế hdró tơniăn, mơjiâng pro tro hâi khế pơkâ, mơnâ mâ ngăn, pro krá kak tro tiô tơdroăng hiăng pơkâ”.