Tiô inâi Tíu xiâm mơhnhôk ‘no liăn cheăng ƀă Tơrŭm cheăng dêi kong pơlê Gia Lai tơbleăng, tung tâi tâng kơxxô̆ 138 tơdroăng tơkêa bro ai 24 tơdroăng tơkêa bro châ tơkŭm tơbleăng tơ’noăng yă xúa tơnêi. Ki vâ tối, hên tơdroăng tơkêa bro ki kân châ tơbleăng tơ’noăng yă a mâu kơpong xiâm ƀă a tíu ai pơxuá tâng vâ mơnhông cheăng kâ.

A pơlê kong kơdrâm Pleiku ai kơphô̆ CK54 tơnêi rơdâ 65,8 ha ƀă Kơpong kơphô̆ lĕm tơniăn Trà Đa rơdâ 53 ha. Pakĭng mê ối ai mâu kơpong kuăn pơlê a mâu cheăm Đức Cơ (12,21 ha) ƀă cheăm Cát Tiến (15ha). Ƀă tơdroăng tơbleăng inâi mâu tơdroăng tơkêa bro, kong pơlê tơngah kô tí tăng pêi châ tơƀrê xiâm tơnêi tơníu, tơ’mot mâu khu ‘no liăn ai ivá pêi cheăng, veăng mơnhông cheăng kâ rêh ối - pơlê pơla, chôa lâng pê klêi tơmeăm khoăng kơphô̆, tê mơdró, ôm hyô ƀă ôm hyô tung kong pơlê tung la ngiâ.