Ea Knir Farm châ mơjiâng pro a thôn Hoà Thành, cheăm Ea Knuêč, kong pơlê Dak Lak, kơtăn ing tơdế Ƀuôn Ma Thuột châ dâng chât km. Kố cho tíu ki mâu tơmối tăng vâ châ ngăn, châ hlo tung tơdroăng rêh ối, pêi kâ tung ƀăng chiâk deăng. Tung mê, tơmối kô rơhêng vâ châ hnêi kơxêt klôa ƀă châ kâ rơhé pế ƀă í  tơvât ƀă kơxêt klôa. Nâ Êban Thái Ân, hdrông kuăn ngo Bơhnéa, ngế pơkuâ ngăn Ea Knir Farm tối ăm ngin ‘nâi: kơxêt klôa châ ngăn cho “mêa rơbông” dêi kong ngo, ga huăn xêh tiô rơnó, xú kơhiâm, rơbĕn ƀă hơ-iâ, cho môi hdrê kơxêt ki kơhiâm ôh tá ai kơxêt ki lâi tơ’mô.

“Kơxêt klôa cho tơmeăm ki chiâng xêh ing tơnêi. Ngin ôh tá ai râm ki klâi hên, mê ngin hnêi xo xếo krúa, pế rơhé ƀă í, ôh tá râm ki klâi ki ê. Rêm xoh troh a rơnó kơxêt kố, mâu tơmối troh akố hnêi xo bố bố tá hâk nâ xua kơxêt ki kố ga nếo hnêi xo, kơbâng lĕm, krúa, tâng kâ tâ ki kơhiâm dêi kong kế, ngo ngối”.

Rơhé ki pế tơvât ƀă í, ƀă kơxêt kố a Ea Knir Farm châ pế pơchên tro tiô tơdroăng ki kuăn pơlê hmâ pế, pế trối hmâ la xuân kal athế ngăn i nhên, xếo krúa. Í xuân păn kơ’nêi tung kơdrum, tâ tá ai kơnâng kâng tung deăng ki kố. Phái ki vâ pế rơhé mê cho báu phái chiâk tâng ôh, vâi hmâ pế rơhé ƀă phái tum kong ngo, cho hdrê báu ki kơhiâm, rơmuăn ƀă xú hŏm.

Tơdroăng ki pro rơhé í pế tơvât ƀă kơxêt kố a Ea Knir Farm hiăng chiâng tơdroăng ki tơviah, ôh ta xê to kế ki kơhiâm, mê ối cho roh ki vâ mơjiâng chiâng kế kâ ki kơhiâm mê. A tíu ôm hyô kố, tơmối kô châ lăm ngăn, lăm hlo tâi tâng tơdroăng ki pêi pro, trối ing tơná ngế tơmối mê lăm hnêi dêi kơxêt klôa tung kong kế, klêi mê, hnối veăng pơchên pế rơhé. Tơmối kố châ hnê tối ‘na túa pế rơhé ƀă kơxêt, hriâm túa ki hnêi kơxêt vâ trối lâi klêi hnêi mê ah, kơxêt kô vêh huăn nếo. Ngoh Nguyễn Trịnh Minh, lo ing Pơlê kong kân hồ Chí Minh ai tối tiah kố:

“Kố cho roh apoăng á châ lăm hnêi kơxêt tung kong, cho kơxêt klôa. Drêng pui kơxêt ing tơnêi, ối tâ hyôh ki lĕm ing tơnêi, ối hơtô ƀă châ hlo nhên mâu xiâm kơxêt rơbông huăn pơtâ dêi pó, ngăn khu kơxêt huăn tiah mê mơnâ mâ ngăn păng ‘nâng. Ing tơná mâu tơmối hnêi dêi kơxêt, klêi mê, xếo krúa, pế pơchên dêi kơxêt ki mê ga ro há. La ngiâ ah, á xuân pơtối vêh akố nếo vâ ‘nân ối a kơxo má kong khía lơ kơxê măng, ká rơhé ki dế tô, kơlung kơlăng ƀă châ tâng í kơtốu á kơdâm ngo xuân tâ hơniâp ro há”.

Xuân trối mâu kơpong ôm hyô, pơtê pơto u ê, Ea Knir Farm ăm phep tơmối châ ối achê kơnoh on, châ tơmâng tơná ngế ki pơkuâ vâ hnê tối ‘na túa pế rơhé, túa ki rah xo í, túa ki vâ râm mâu po, ƀôt ngot tro tiô túa Tây Nguyên tiô khôi hmâ. Nâ Hồng Anh, tơmối lo ing Vũng Tàu ai tối tah kố:

“Á vâ má môi mê cho châ ối achê kơnoh on ki mơdrâu ƀă hdréa, châ tâng xú xâk í ƀă xú ki kơhiâm dêi kơxêt ga tơmot dêi pó. Tung hyôh kong prâi rơngiâp lĕm, ai khía mơhot kân pế ho hói, tâ trối tơdroăng rêh ối a môi kơpong pơlê cheăm ki tiah hmâ, ôh tá xê a pơlê kong kân”.

Mŏng rơhé ki pế ƀă kơxêt klôa dế ối tô hiăng châ ‘măn a xơtâu ki kân. Hlo to ngôi kơlung kơlăng, ki xú dêi kơxêt klôa mê hiăng pơtroh ăm kế xú dêi hơ’nêh í ki kơ’nêi tung kơdrum, ing mê, mơjiâng chiâng tơdroăng ki tâ, ki hlo phâi tơtô vâ mơhno tối kế kâ ki kơhiâm dêi Tây Nguyên. Ai môi ngế tơmối lo ing Pơlê kong kân Đà Nẵng, cho nâ Nguyễn Thị Yến ai tối tiah kố:

“Á hiăng hmâ lăm kâ rơhé pế ƀă í, laga, rơhé ki pế ƀă kơxêt klôa akố ga hơ-iâ, kơhiâm phá xêh, ôh tá hên rơmâ to lâi, ôh tá xăng po. Tâ tá tung tơnêi deăng kố ngăn lĕm ro mơnâ mâ, xua mê á xuân rơhêng vâ ối a kố nếo”.

Tơdroăng ki châ lăm ngăn, lăm hlo khôi túa, vêa vong-tơdroăng pế pơchên rơhé ƀă í, ƀă kơxêt hiăng chiâng môi tơdroăng ki krê xêh dêi Ea Knir Farm. Kố ôh tá xê to kế kâ ki kơhiâm, hơ-iâ, ai trếo lĕm, mê ối cho kế kâ ki vâ mơhno tối, i hiâm mơno dêi mơngế: achê, tơdrăng khât ƀă ai hiâm tuăn mơjo pâ trối mơhúa pơlê pơla.