Mơ-éa pơchuât a roh leh tối nhên, hâi lơ 6/1/1946 cho môi tơdroăng ki hdró eăng po môi chal mơnhông nếo dêi hdroâng mơngế Việt Nam. Ƀlêi trâng dêi roh tâ phĭu rah xo kăn Kuô̆k hô̆i hiăng mơnhên krá hnoăng pro pơkuâ dêi kuăn pơlê, ing cho ngế têk xông tơtrâ vâ châ tơniăn krê, tơkŭm po chiâng Tơnêi têa dêi tơná, ƀă tŭm tơdroăng tro luât teăng mâ ăm tâi tâng kuăn pơlê pin a tung tơnêi têa ƀă lâp plâi tơnêi, ƀă cho Tơnêi têa kuăn pơlê pơkuâ dêi hnoăng cheăng apoăng a Đông Nam Á.

Plâ 80 hơnăm hiăng hluâ, ƀă 15 hneăng, hmâ tơdroăng môi tiah lâi, Kuô̆k hô̆i pơrá ai tơdroăng veăng tơlo ki kal tung tơdroăng cheăng kăch măng ƀlêi trâng kân dêi Đảng, dêi hdroâng mơngế, tơxâng cho kơ koan teăng mâ kân má môi dêi Kuăn pơlê, kơ koan hnoăng kân má môi tơnêi têa ƀă cho tíu chiâng tuăn ngôa rơkê, tơdroăng khŏm mơ-eăm, pói vâ dêi hdroâng mơngế.

Xông tơpui a roh leh, pôa Tô Lâm, Kăn xiâm pơkuâ hnê ngăn Đảng môi xôh nếo mơnhên, ing tơdroăng roh nah hơnăm 1946, Kuô̆k hô̆i Việt Nam đi đo xông kân, rơdêi, mơnhên hnoăng cho tíu xiâm dêi tơdroăng rêh ối kal kí – luât tơnêi têa, cho kơ koan tơnêi têa tơniăn krê rak tíu ki xiâm tung tơdroăng mơjiâng ƀă kêi đeăng Tơnêi têa tiô luât xah hô̆i chuh ngiah Việt Nam.

Tơmiât troh leh tơbâ 100 hơnăm mơjiâng Đảng (1930 – 2030), 100 hơnăm mơjiâng tơnêi têa (1945 – 2045) ƀă mơhno tơdroăng ki pói vâ Việt Nam chiâng tơnêi têa mơnhông mơdêk, ó rơdêi, kro mơdrŏng ƀă hơniâp lĕm, Kăn xiâm pơkuâ hnê ngăn Đảng tối nhên troăng tơmiât hnoăng dêi Kuô̆k hô̆i tung mơjiâng luât mơnhông ai kơnâ kal khât, po troăng ăm pơhlêh nếo tơmiât pêi rơkê, ăm mơnhông mơdêk rĕng ƀă krá tơniăn tơnêi têa.