Tung mê, Leh hô̆i Tơmeăm kơnía kơphế lâp plâi tơnêi tơkŭm po sa phâi lơ 18/12 troh lơ 2/1/2026, ƀă ki má môi cho tíu châ tâ, châ hlo tơmeăm kơnía kơphế lâp plâi tơnêi, kơpong mơđah tơbleăng – ôu kơphế, kơchâi kâ ƀă mâu tơdroăng ngê̆ thuât kơmăng xah prôa kơphế - kơphô̆ ngo, mơngiơk Peăng hdroh Mih, Noel ƀă koh hơnăm nếo 2026. Pôa Nguyễn Văn Lộc - Kăn pơkuâ Khu pơkuâ Khôi túa lĕm tro, Tơ’noăng ivá ƀă Ôm hyô kong pơlê Lâm Đồng mơnhên, kơphế ôh tá xê to tơmeăm cheăng kâ ki xiâm mê ối cho um mơhno khôi túa lĕm tro, tơmeăm kơnía rêh ối ƀă tơdroăng ron nah, tơdroăng rêh ối ƀă khôi túa lĕm dêi hên kong têa.

Ƀă lối môi chal mơjiâng ƀă mơnhông mơdêk, Lâm Đồng hiăng mơnhên hnoăng ki kal tung tơdroăng ki kơnâ kơphế Việt Nam, ƀă pêt mơjiâng tơmeăm ki dâi lĕm, uâ bro trâu, tơmiât pêi rơkê ƀă ôm hyô kơphế.

‘’Ing mâu tíu châ tâ châ hlo, mơđah tơbleăng tơmeăm, mơhno khôi túa lĕm tro ƀă hneăng hôp lâp plâi tơnêi, leh hô̆i kô mơjiâng chiâng môi roh hôp tơpui tơno ki po, tíu kơphế Việt Nam hiăng pro tung troăng hiu tơdjuôm dêi tơmeăm kơnía kơphế lâp plâi tơnêi. Tung la ngiâ, kong pơlê Lâm Đồng pói tơngah leh hô̆i kô chiâng tơdroăng ki kal tiah hmâ rêm hơnăm ai loi tơngah khât, djâ hên tơdroăng ki tơbâ dêi Lâm Đồng, cho tíu tơkêa dêi mâu ngế hâk vâ kơphế tung lâp plâi tơnêi.’’

Tung tơdroăng tơkŭm po leh hô̆i tơkŭm po Hneăng hôp kơphế lâp plâi tơnêi, mâu tơdroăng mơđah tơbleăng troăng kơphô̆ ƀă tơbleăng Khu tơrŭm Kơphế Việt Nam – Lâp plâi tơnêi, mơhnhôk kơdrâm kuăn pơlê ƀă tơmối, po roh tơ’lêi hlâu tơrŭm lâp plâi tơnêi, mơdêk mơnhông krá tơniăn kơvâ kơphế ƀă ôm hyô khôi túa lĕm tro Đà Lạt – Lâm Đồng.

Drêng kong hngíu ki phá tơ-ê dêi Đà Lạt, kơpong rơtâ tá long têa Hồ Xuân Hương hên mơngiơk lĕm ƀă kơdrâm phiu ro ƀă Leh hô̆i troăng kơphô̆, môi tơdroăng ki má môi tung tơdroăng tơkŭm po Leh hô̆i Chêng koăng Đông Nam Á hơnăm 2025. Tung tíu lĕm môi tiah pốu dêi long têa, kong loăng hngó ƀă reăng tơpo hên mơngiơk lĕm, tơdrá chêng koăng chuât xơtó troh hơngế, rơtế xuăng dêi hrĭng ngê̆ nhân troh ing mâu kong pơlê: Dak Lak, Gia Lai, Quảng Ngãi, Phú Thọ ƀă kong pơlê Lâm Đồng. Rêm khu, rêm hdroâng kuăn ngo djâ troh leh hô̆i troăng kơphô̆ mơngiơk khôi túa lĕm tro krê, gum mơjiâng chiâng um méa ki lĕm hên, pêng păm khôi túa dêi khôi túa chêng koăng Việt Nam ƀă kơpong Đông Nam Á. Mot tung hâi leh, ngê̆ nhân Trần Ngọc Dũng, hdroâng kuăn ngo Thái, troh ing kong pơlê Phú Thọ, rơrêk tung hiâm mơno:

‘’Ƀă kơpong rơpâu reăng Đà Lạt ai môi tơdroăng ki tâ tung hiâm mơno nếo phá tơ-ê. Cho môi tiah pốu, kong kế lĕm, kuăn mơngế ai hiâm mơno lĕm. Trâm châ hên hdroâng mơngế ki phá tơ-ê dêi pó tá mâu hdroâng kuăn ngo kong têa ê djâ troh mâu khôi túa lĕm tro cho ki phá tơ-ê. Rơrêk tung hiâm mơno dêi kuăn mơngế cho ôh tá vâ vêh ôh drêng troh a kố’’.

Ôh tá xê to hâi xah hêi ro dêi mâu hdroâng mơngế Việt Nam, leh hô̆i troăng kơphô̆ ối cho tíu trâm mâ mơhno khôi túa lĕm lâp plâi tơnêi. Ngê̆ nhân Thong Souphoni, troh ing pơlê kong xiâm Viêng Chăn, kong têa Lếo tối ăm ‘nâi, veăng Leh hô̆i Chêng koăng Đông Nam Á hơnăm 2025 xua kong pơlê Lâm Đồng tơkŭm, Khu ngê̆ nhân ing tơnêi têa Rơtuh to Rui djâ troh mâu idrâp chuât chêng koăng, ếo pơtâk tiô khôi vâi krâ nah ƀă hên tơdroăng ki phá krê ƀă Đà Lạt – Lâm Đồng xuân hiăng lôi ăm hên tơdroăng ki tâ rơrêk tung hiâm mơno ƀă ngê̆ nhân:

‘’Mâu diên viên dêi Lếo hâi kố sâp pơtâk Lếo, kên pâng Lếo cho lĕm ‘nâng. A Lâm Đồng hên tíu ôm hyô lĕm, hyôh kong prâi cho rơngiâp lĕm. Hên khu reăng ki lĕm. Kuăn pơlê tơdroăng rêh ối tơniăn lĕm ƀă hên kơchâi kâ kơhiâm’’.

Tung tơdroăng tơkŭm po Leh hô̆i Chêng koăng Đông Nam Á hơnăm 2025, Leh hô̆i troăng kơphô̆ tơkŭm po rơdâ tá Long têa Hồ Xuân Hương – Đà Lạt ôh tá xê to roh vâ mơđah tơbleăng, mê ối cho kông tơdjêp mâu pơlê pơla hdroâng kuăn ngo, mâu kong têa tung kơpong ing tíu mơhno khôi túa lĕm tro chêng koăng – tơmeăm kơnía dêi kuăn mơngế. Mâu tơdrá chêng chuât xơtó tung dế Đà Lạt dế troh lâp lu tơdroăng pơtâng hnê tối ‘na tơdroăng ki tơrŭm môi tuăn, nhuô̆m ƀă rak ki kơnâ khôi túa lĕm tro tung tơdroăng rêh ối tiô rơxông nếo.