Mâu hâi dêi mơ’nui hơnăm, Kơpong rak vế kong kế nhâ loăng ki chiâng xêh Kon Ka Kinh tơdah khu kăn pơkuâ kong pơlê Gia Lai lăm ngăn tơnêi tơníu kong kế ƀă pơkâ troăng hơlâ vâ mơjiâng pro ôm hyô kong kế nhâ loăng. Klêi kơ’nâi vâ chê môi chôu prôk tơkâ luâ kong, hlo ƀă mâ tơdroăng ki ai hên hĭn ‘na sinh hok ƀă tơdroăng ki ối lĕm môi tiah ton iâ ai, pôa Phạm Anh Tuấn, Kăn hnê ngăn Vi ƀan kong pơlê Gia Lai kơdrâ hlo mâu kong kế ki ối lĕm môi tiah ton:

“Chiâng vâ tối, Kơdrum Kong ilâng Tơnêi têa Kon Ka Kinh cho kế ki kơnía dêi kong kế diâp ăm ôh ti xê ăm to Gia Lai, mê ối ăm Việt Nam ƀă lâp plâi tơnêi. Hâi kố, khu ki pêi dêi hnoăng cheăng tung mê ai tŭm mâu khu râ, kơvâ cheăng ƀă tíu pêi cheăng ôm hyô rơtế lăm ngăn vâ tăng troăng hơlâ rế rak vế, rế mơnhông ki kơnía ôm hyô, tơdrêng amê hlối krếo thế mâu vâi pú kong têa ê troh lăm ngăn kơpong kong kế nhâ loăng ki lĕm tơdrŏm kố”.

Pôa Võ Văn Thắng – Kăn pơkuâ Kơdrum kong ilâng Tơnêi têa Kon Ka Kinh ăm ‘nâi, kơdrum ai môi tung mâu kong kế nhâ loăng ki krê má môi dêi ngo Trường Sơn. Ƀă lối hrĭng mâu túa loăng kân, mâu kế tơmeăm ki chiâng tung kong, mâu kuăn kiâ ki kơnía ƀă hên troăng prôk ki ai xêh lĕm tơdrŏm, Kon Ka Kinh ai tŭm tơmeăm vâ chiâng tíu troh ‘na kong kế nhâ loăng ki lĕm krih dêi Gia Lai. Tung la ngiâ ah, pơkâ pêi dêi tíu pêi cheăng mơjiâng pro ôm hyô kong kế nhâ loăng, pro ăm kong kế nhâ loăng ôm hyô krá tơniăn ăm kuăn pơlê a kong pơlê ƀă veăng gum rak vế kong krá tơniăn.

“Tung la ngiâ ah, ngin kô mơdêk rơdêi pơkuâ ngăn, rak vế vâ rak tơdroăng ki lĕm, kơnía dêi kong ăm hnoăng cheăng rak vế; tơdrêng amê hlối thăm mơnhông tơrŭm ƀă mâu tíu pêi cheăng ki rak ngăn tơmối mơjiâng pro mâu kế tơmeăm, tê mơdró ƀă troăng klông ăm tơmối; mơnúa ngăn mâu tour – troăng tiô tơdroăng ki hnê hriâm, hriăn ngăn; mơđah tơbleăng um kơdrum kong ilâng troh mâu viê̆n, mâu hngêi trung. Ngin kô chêh pro hồ sơ, tơdroăng tơkêa vâ pơkâ mơ’no thế pêi pro klêi troăng klông, lĕm tro má môi ăm tơmối”.

Rơtế tung kong kế nhâ loăng ôm hyô tơnêi tơníu ƀă Kon Ka Kinh cho ain klâng kơlo Đăk Tơ Pê )cheăm Kdang), kơtăn ôh tá hngế ing kơphô̆ Pleiku. Tung rôh kong tôu lĕm a kơxê, tá tơnêi tơníu kong rơ’eăng lĕm xua ing mơngiơk trĭng – ngiât – prâp tơvât, pro chiâng môi um kơchuâ kong ngo ki lĕm krip tơdrŏm. Ki lĕm mê pro ăm tíu kố rế hía rế chiâng tíu troh ki kơnía, vâ check-in, xup um dêi hên ngế tơmối. Hlo nhên ki ai hlâu, Đảng ƀô̆, kăn pơkuâ cheăm Kdang, kong pơlê Gia Lai dế rế hía rế pơkâ pro ôm hyô mâu tour ôm hyô pơlê pơla, ôm hyô lăm troh ngăn a tơnêi tơníu kong ki chiâng xêh kố. Jâ Lê Thị Huệ, Kăn pơkuâ Đảng ủi, Kăn hnê ngăn Hô̆i đong cheăm Kdang ăm ‘nâi:

“Cheăm dế séa ngăn ƀă kô krếo thế khu ki ‘no liăn tung la ngiâ. Cheăm rơhêng vâ hơnăm 2035, kơpong ôm hyô kố kô châ xúa, cho tíu troh dêi tơmối ôm hyô achê hngế”.

Nôkố, a kong ngo peăng mâ hâi Lâ kong pơlê Gia Lai ai hên tơdroăng ki ai hlâu ăm mơjiâng pro ôm hyô kong kế nhâ loăng ƀă mâu kong kế ki lĕm krip tơdrŏm, ai hên kong kế ki lĕm. Biển Hồ – pơ’leăng mâ Pleiku,  đi đo rak tíu ki tơvgiah tung hiâm mơno kuăn pơlê ƀă tơmối. Ngâ têa tơniăn lĕm séa hlo xok a plêng, mâu loăng hngó ki kân ton lối hrĭng hơnăm pro chiâng tơnêi tơnêi tíu ki lĕm rế krip tơdrŏm. Kơtăn mê ôh ti hngế, ngo on Chư Đang Ya cho tíu troh ki hâk vâ dêi vâi hdrêng ƀă mâu khu ki xup um ƀă kuăn pơlê rêm rơnó reăng mâ hâi kong tơpo. Ngoh Nguyễn Việt Cường, ngế ki xup um lo ing Hà Nội, tối ki lĕm drêng rôh apoăng troh a kơpong tơnêi kố:

“Hlo lĕm khât, gá lĕm. Á rơhêng vâ kong pơlê kô mơnhông tíu kố, vâ hên ngế ‘nâi troh châ ngăn hlo ki lĕm kố hên tâ nếo”.

Vâ pro ivá ăm mơnhông, mâu hơnăm achê kố, Gia Lai hiăng pro klêi troăng prôk troh a mâu kơpong ki rak vế ƀă kong kế tơnêi tíu ki lĕm; vêh pơkâ mâu tơdroăng ki mơjiâng pro xêh a mâu tíu “check-in”; tơdrêng amê hlối mơdêk ki rơkê tung hnê mơhno dêi mâu ngế tơdjâ tơmối pơlê pơla ƀă pơhlêh túa ki tơdah tơmối a mâu tíu ôm hyô kong kế nhâ loăng. Kơnôm po rơdâ tơdroăng cheăng pơkâ mơdêk, Gia Lai hiăng hlo ai nhên tâ a mâu troăng ôm hyô tơdjâk kơpong Tây Nguyên – Kĭng têa kơxĭ tơdế Tơnêi têa, pro chiâng ai hên tơmeăm sap ing trekking, lăm hyô tăng ngăn tung kong, mơnúa pêi chiâk troh ôm hyô long têa – ngo ngối – túa lĕm tro. Hơnăm 2025, kong pơlê Gia Lai hiăng tơdah lối chât rơtuh ngế tơmối ôm hyô, ôh tá iâ tung kơxô̆ ki mê sap ing túa ôm hyô kong kế nhâ loăng a peăng mâ hâi Lâ. Jâ Đỗ Thị Diệu Hạnh – Kăn pơkuâ Khu ngăn túa lĕm tro, Tơ’noăng ivá ƀă Ôm hyô Gia Lai ăm ‘nâi, tung hneăng hơnăm 2026-2030,  ôm hyô châ mơnhên cho môi tung mâu kơvâ cheăng ki xiâm ‘na pêi lo liăn dêi kong pơlê:

“Tơkŭm rak vế, mơdêk mâu ki kơnía túa lĕm tro, kong kế nhâ loăng, kế tơmeăm ton nah. Tơkŭm chêh pro tơdroăng mơđah tơbleăng inâi dêi ôm hyô, tơkŭm tơdjêp peăng mâ hâi Lo – peăng mâ hâi Lâ, mơjiâng pro ôm hyô têa kơxĭ, ôm hyô pơlê pơla, ôm hyô lăm prôk ngăn tung kong. Mơ’nui cho hnê mâu ngế cheăng mơjiâng pro ôm hyô, pro chiâng mâu tơmeăm ôm hyô ki lĕm tro tung la ngiâ”.

Mơjiâng pro ôm hyô kong kế nhâ loăng dế po troăng ăm Gia Lai môi troăng prôk ki krá tơniăn, vâ kong kế nhâ loăng châ rak vế, ki kơnía dêi kế tơmeăm a kong pơlê châ mơnhông, tơdrêng amê hlối pro tơdroăng ki tăng liăn ngân ton xŏn ăm kuăn pơlê. Mê cho ivá vâ Gia Lai mơnhông cheăng kâ kong pơlê tiô troăng ngiât ƀă krá ton tung la ngiâ.