Teăng amê, hên tơdroăng pêi pro ai pơxúa ‘na túa lĕm tro, ngê̆ thuât kô châ tơbleăng pêi pro sap ing râ kong pơlê troh cheăm bêng, pro chiâng tơdroăng ki sôk ro, phiu niu vâ kuăn pơlê tơdah Têt. Tơdroăng pơkâ ôh tá pĕng mlŏi reăng cho vâ kơdĭng liăn tơkŭm lăm pôu, hbru tơmeăm tŏng gum kuăn pơlê, kơjo gum ‘na hnoăng cheăng ‘mâi mơnhông mâu kế tơmeăm klêi kơ’nâi kong mêi khía mơhot têa kân lân lu, ‘mâi mơnhông pêi cheăng kâ ăm kuăn pơlê mâu cheăm bêng ki tro tơdjâk ó xua kong mê khía mơhot têa kân lân lu sap nah hâi chói ai.

Phiu ro hơnăm nếo Bính Ngọ 2026, kong pơlê Dak Lak kô tơkŭm po tơdroăng ngê̆ thuât hâk Đảng, hâk rơnó Hơngui dó inâi “Dak Lak – Kong ngo ƀă Têa kơxĭ, púi vâ mơ-eăm tơdjâk troh hngế”. Tơdroăng kố châ po a kong măng lơ 16/2, tơkéa vâ tối cho hâi má 29 Têt, a bêng Buôn Ma Thuột ƀă bêng Tuy Hòa.