Tung dế khế 1 pơla kố nah, Vi ƀan bêng Ea Kao, kong pơlê Dak Lak tơkŭm po tơdroăng livestream ƀă dó inâi “Buôn Tơng Jŭ, Ea Kao koh hmât”, mơ’no tơdrêng tung mâu um tiô troăng hyôh măng pơlê pơla môi tiah Facebook, Zalo, OA, TikTok. Tung lối môi chôu, kong kế, tíu mơhno khôi túa lĕm tro ƀă tơdroăng rêh ối pêi cheăng, pêt mơjiâng tơmeăm dêi kuăn pơlê mơngế Rơđế châ tơbleăng tơdrêng troh kơdrâm mơngế ki vâ ngăn.

Tiô pôa Trần Công Hữu, Phŏ Kăn hnê ngăn Vi ƀan bêng Ea Kao, troăng pêi kố ôh tá xê inhên Tơdroăng pơkâ 57 mê ối mơjiâng troăng ki pơhlêh tung troăng tơmiât mơđah tơbleăng bă tê tơmeăm dêi pơlê.

‘’Tơdroăng livestream djâ tơdroăng ki chông djâ khu tơrŭm teăn ếo pơtâk Tơng Bông tối krê ƀă mâu tíu cheăng khu tê mơdró tung bêng tối tơdjuôm mơnhông mơdêk cheăng kâ xúa kŏng ngê̆ tung la ngiâ. Tơdroăng ôh tá xê to bu tơbleăng mâu ki kơnâ tiô khôi vâi krâ nah, tíu rêh, pêi cheăng pêt mơjiâng tơmeăm dêi mơngế Rơđế mê ối veăng gum mơdêk tê tơmeăm dêi pơlê, hlối mơnhông cheăng kâ ƀă rak vế khôi túa lĕm tro. Ing troăng livestream kố, ngin pói vâ djâ troh mâu tơdroăng ki châ tâ achê, ro hơniâp tiah hlo ƀă mâ ƀă hên tơdroăng ki tâ rơrêk tung hiâm mơno’’.

Rơtế ƀă tơmeăm ki pro ƀă kŏng, tơdroăng livestream ối tơbleăng kơchâi kâ tiô khôi vâi krâ nah ƀă troăng pêi ôm hyô pơlê pơla ƀuôn Tơng Jŭ. Ƀă troăng pêi kố, tơmối kô chiâng lăm ngăn tíu a pơlê, ti tăng plĕng khôi túa vâi krâ nah, kâ mâu kơchâi kâ, châ tâ châ hlo tơdroăng rêh ối, pêi cheăng rơtế ƀă kuăn pơlê. Jâ H’Yam ɃKrông, kăn pơkuâ khu ôm hyô pơlê pơla ƀuôn Tơng Jŭ, bêng Ea Kao, kong pơlê Dak Lak tối.

“Veăng ôm hyô kuăn pơlê kô chiâng pêi hên tơdroăng cheăng, pơtih môi tiah pêt kơchâi drêh, păn mơnăn mơnôa, pêt tơmeăm, mâu tơmeăm dêi kuăn pơlê pêi lo tê a tíu tơná rêh ối, mê cho tơdroăng ki phiu ro. Xua mê drêng ôm hyô mơnhông mơdêk a bêng Ea Kao mê á rơtế ƀă kuăn pơlê cho phiu ro ‘nâng, vâ ai troăng pơhlêh tơdroăng rêh ối rêm hâi dêi tơná rế hía rế lĕm tro tâ. Pakĭng mê, cho rơtế rak khôi túa lĕm tro dêi bêng’’.

Rơtế ƀă mâu troăng pêi a bêng, pơhlêh xúa kŏng ngê̆ tung kơvâ khôi túa lĕm tro dế châ kong pơlê Dak Lak pêi pro tơdâng tơ’mô. A tíu chôu ‘măn tơmeăm khoăng Dak Lak, Phŏ Kăn pơkuâ Trần Quang Năm, tối ăm ‘nâi, tơdroăng xúa kŏng ngê̆ kơxô̆ hiăng mơnhông ki châ tơƀrê tung tơdroăng ti tăng, rah tiô khu ƀă rak tơmeăm ai nôkố, ‘noăng chư chêh gum mâu chuyên đê mơđah tơbleăng. Tơdrêng amê gum mơdêk ki hôm lĕm tung tơdah tơmối lăm ngăn.

‘’Tíu chôu ‘măn tơmeăm khoăng roh ton nah hiăng pêi pro tung kŏng ngê̆ tơmeăm ki ai nôkố, xúa kŏng ngê̆ mâu tơdroăng po, tơdroăng mơdĭng, mơdĭng tiô khôi vâi krâ nah dêi mâu hdroâng kuăn ngo tung kong pơlê. Xúa mâu kŏng ngê̆ AR, VR vâ ai tơdroăng ki ai tơdjâk dêi pó, châ tâ châ hlo pơla tơmối ƀă mâu ki kơnâ tơmeăm mơhno khôi túa lĕm tro tiô khôi vâi krâ nah dêi kong pơlê Dak Lak’’.

Troh nôkố, ‘noăng chư chêh tung kŏng ngê̆ gum chiâng pơchuât xêh hiăng mơjiâng a 3  tíu chôu ‘măn tơmeăm khoăng roh nah tơnêi têa tung kong pơlê Dak Lak, mê cho Hngêi kroăng phâk Ƀuôn Ma Thuột, Biệt điê̆n Bảo Đại ƀă Đình Lạc Giao. Kŏng ngê̆ thông xuân châ xúa mâu tơmeăm ki xiâm tung mơđah tơbleăng khôi túa lĕm tro ƀă ôm hyô. Tơdroăng xiâm pơtâng tối châ pêi pro hên tung kŏng ngê̆ măng pơlê pơla, gum po rơdâ tơdroăng ki châ achê dêi kuăn pơlê. Pôa Trần Hồng Tiến, Kăn pơkuâ Khu pơkuâ khôi túa lĕm tro, Tơ’noăng ivá ƀă Ôm hyô kong pơlê Dak Lak, tối ăm ‘nâi:

“Ngin hiăng tơkŭm po hên tơdroăng hnê pơtâp, xúa kŏng ngê̆ ăm kăn ƀô̆ kŏng chưk tung tâi tâng kơvâ cheăng xuân môi tiah kăn ƀô̆ kŏng chưk dêi ƀơrô mơhno khôi túa lĕm tro pơlê pơla dêi mâu cheăm, bêng. Tơrŭm ƀă mâu khu tê mơdró kŏng ngê̆, mơjiâng pơkâ pêi, pêi pro mâu tơdroăng xiâm ‘na pơhlêh xúa kŏng ngê̆ tung kơvâ tơmeăm kơnía, ôm hyô, tơ’noăng ivá xuân môi tiah tung mâu tơdroăng mơhno khôi túa lĕm tro’’.

Pơhlêh xúa kŏng ngê̆ dế mơjiâng tơ’nôm tíu vâ mơhno khôi túa lĕm tro ai mâ nhên tâ tung tơdroăng rêh ối tiah hmâ rêm hâi a Dak Lak. Ing mê, gum troh lâp lu ki kơnâ khôi túa lĕm tro, po rơdâ roh tơ’lêi mơnhông tăng cheăng pêi ăm kuăn pơlê ƀă mơnhên troăng prôk la ngiâ krá tơniăn ăm ôm hyô kong pơlê tung hneăng nếo.